मिरचीची भजी - Mirchichi Bhaji

Mirchi Pakoda in English

वाढणी: २ ते ३ जणांसाठी
वेळ: १५ मिनिटे

साहित्य:
८ ते १० लांबड्या मिरच्या
३/४ कप बेसन
१ टेस्पून तांदुळाचे पीठ
१/४ टीस्पून हळद
चिमूटभर खायचा सोडा
चवीपुरते मीठ
तळण्यासाठी तेल

कृती:
१) मिरच्या धुवून घ्याव्यात. एका बाजूने चीर देऊन आतील बिया काढाव्यात. (टीप)
२) बेसन, तांदूळ पीठ, हळद, मीठ एकत्र करून घ्यावे. त्यात साधारण पाउण कपापेक्षा थोडे कमी पाणी घालून पीठ भिजवावे. सोडा घालून मिक्स करावे. पिठाची कन्सिस्टन्सी थोडी दाटसर असावी.
३) तळणीसाठी तेल तापत ठेवावे. मिरच्या पिठात बुडवून नीट कोट करून घ्याव्यात. मध्यम आचेवर टाळाव्यात.
गरमागरम सर्व्ह कराव्यात.

टीपा:
१) तुम्ही कोणत्या प्रकारच्या मिरच्या वापरत आहात त्यावर आतील बिया काढायच्या कि नाही ते ठरवावे. जर मिरच्या खूप तिखट असतील तर बिया काढाव्यात. किंवा काही जणांना भजी कदम झणझणीत असली तर आवडते. तर अशावेळी आवडीनुसार बिया कमी कराव्यात.
२) खूप जाड सालीच्या मिरच्या वापरू नये. त्या तळल्यावर पटकन शिजत नाहीत आणि भजी कचकचीत लागतात. त्यामुळे पातळ सालीच्या आणि मध्यम तिखट अशा मिरच्या घ्याव्यात.
३) मिरचीच्या आतील बिया काढून आत वेगवेगळे सारण भारत येईल. मी बटाट्याची तिखट भाजी (आले-लसूण लावून) आत भरली होती. आणि पिठात बुडवून नेहेमी प्रमाणे तळून काढली.

बेबी कॉर्न पकोडा - Baby Corn Pakoda

Baby Corn Pakoda in English

वेळ: १५ मिनिटे
३ जणांसाठी

साहित्य:
१५ बेबी कॉर्न
३ टेस्पून कॉर्न फ्लोअर
१/४ टिस्पून हळद
१ टिस्पून लाल तिखट
१/२ टिस्पून जिरेपूड
१/२ टिस्पून धणेपूड
१/४ टिस्पून आमचूर
चवीपुरते मिठ
तळणीसाठी तेल

कृती:
१) बेबी कॉर्न धुवून साफ कपड्याने पुसून घ्यावी.
२) कॉर्न फ्लोअर एका लहान वाडग्यात घ्यावे. त्यात सर्व मसाले आणि मिठ घालून मिक्स करावे. या मिश्रणात २ ते ३ टेस्पून पाणी घालून मध्यमसर भिजवावे.
३) कढईत तेल तापवावे. तेल व्यवस्थित तापले कि आच मध्यम करावी.
४) कॉर्न फ्लोअरच्या मिश्रणात ३ ते ४ बेबी कॉर्न घोळवून घ्यावी. गरम तेलात तळावीत. सोनेरी रंग येईस्तोवर तळावी. अशा प्रकारे सर्व बेबी कॉर्न तळून घ्यावीत.
टोमॅटो केचप बरोबर सर्व्ह करावीत.

कच्च्या केळ्याचे कटलेट - Plantain Cutlets

Plantain Cutlets in English

वेळ: पूर्वतयारी- २० मिनीटे (साबुदाणा भिजवणे सोडून)। पाकृसाठी वेळ: २० मिनीटे
नग: साधारण १२ ते १४ मध्यम कटलेट


साहित्य:
२ कच्ची केळी
१ मध्यम बटाटा, उकडलेला
१/४ कप साबुदाणा
२ टेस्पून उपासाची भाजणी
३ टेस्पून शेंगदाण्याचा कूट
३ हिरव्या मिरच्या + १/२ टिस्पून जिरे + १/४ कप कोथिंबीर यांची पेस्ट
१ टेस्पून लिंबाचा रस
चवीपुरते मिठ
तूप किंवा शेंगदाणा तेल, तळण्यासाठी

कृती:
१) साबुदाणा धुवून त्यातील पाणी काढून टाकावे. झाकण ठेवून ४ तास झाकून ठेवावा.
२) साबुदाणा निट भिजला कि केळे सोलून किसून घ्यावे. नंतर साबुदाणा, किसलेले केळे, उकडून कुस्करलेला बटाटा, उपासाची भाजणी, शेंगदाणा कूट, मिरचीपेस्ट, लिंबू रस, आणि मिठ एकत्र करावे. निट मळून गोळा तयार करावा. हा गोळा समान विभागून मध्यम आकाराचे कटलेट बनवावे. आवडीप्रमाणे आकार द्यावा.
३) तेल किंवा तूप गरम करावे. तयार कटलेट मध्यम आचेवर तळून घ्यावे.
गोड लिंबाच्या लोणच्याबरोबर किंवा हिरव्या चटणीबरोबर सर्व्ह करावे.

पालकाची भजी - Palak Bhajji

Palak Pakoda in English

२ जणांसाठी (साधारण १० ते १२ भजी)
वेळ: २० मिनीटे

साहित्य:
२ ते अडीच कप भरडसर चिरलेली पालकाची पाने
१/४ कप कांदा, उभे पातळ काप
६ ते ७ टेस्पून बेसन
१ टेस्पून तांदूळ पिठ
१/२ टिस्पून आलेलसूण पेस्ट
५ ते ७ कढीपत्त्याची पाने, बारीक चिरून
१ टिस्पून तिळ (ऐच्छिक)
१ टिस्पून कसूरी मेथी
१/२ टेस्पून लाल तिखट किंवा गरजेनुसार
१/४ टिस्पून हळद
चिमूटभर खायचा सोडा
चवीपुरते मिठ
२ ते ३ टेस्पून पाणी
तेल, भजी तळण्यासाठी

कृती:
१) मोठ्या वाडग्यात चिरलेला पालक, कांदा आणि मिठ घालून मिक्स करावे. १० मिनीटे तसेच ठेवावे म्हणजे कांद्याला थोडे पाणी सुटेल.
२) नंतर त्यावर प्रथम एकूण बेसनपैकी ४ टेस्पून बेसन आणि तांदूळ पिठ पेरावे. १ टिस्पून तेल कडकडीत गरम करून पिठावर घालावे. २ मिनीटांनी हलकेच चमच्याने मिक्स करावे. अंदाज घेऊन उरलेले बेसनही घालावे.
३) आता उरलेले जिन्नसही घालावेत. (आलेलसूण पेस्ट, कसूरी मेथी, तिळ, लाल तिखट, हळद, सोडा, आणि थोडे मिठ) सर्व निट मिक्स करा. लागल्यास अगदी थोडे पाणी घाला आणि चिकटसर असा गोळा तयार करा. हे मिश्रण पातळ नको, घट्ट पण चिकटसर गोळा बनवा.
४) भजी तळण्यासाठी कढईत तेल तापवा आणि आच मिडीयम-हायवर ठेवा. छोटी छोटी बोंडं, गोल्डन ब्राऊन आणि कुरकूरीत होईस्तोवर तळा. तेल टिपण्यासाठी टिश्यु पेपरवर काढा.
गरमा गरम भजी टोमॅटो केचप, हिरवी चटणी किंवा लसणीच्या तिखटाबरोबर सर्व्ह करावी.

टीप्स:
१) पालकाबरोबर थोडी मेथी घातल्यास खुप छान चव येते.
२) १ टिस्पून गरम तेल भजीच्या पिठात घातल्याने भजी छान कुरकूरीत होतात.
३) भजी एकदम मोठ्या आचेवर किंवा कमी आचेवर तळू नयेत. मोठ्या आचेवर तळल्याने भजी बाहेरून लगेच ब्राऊन होतात पण आतमध्ये कच्च्याच राहतात. तसेच एकदम कमी आचेवर तळल्या तर तेलकट होतात. म्हणून नेहमी मिडीयम ते मिडीयम हायवर तळावे.
४) खायचा सोडा घातल्याने भजी हलक्या होतात. पण जास्त प्रमाणात सोडा घातल्यास भजी तेल पितात.
५) पाण्याचे प्रमाण गरजेपेक्षा जास्त पडले तर मिश्रण पातळ होईल आणि भजी कुरकूरीत होणार नाहीत.

Labels:
Palak bhaji, Spinach Pakoda, Palak Pakoda

खेकडा भजी - Khekada Bhaji

kanda Bhaji in English

कांद्याच्या या भज्यांना खेकडा भजी म्हणतात. बेसनाचे प्रमाण कमी असल्याने कांदा छान तळला जातो आणि त्यामुळे भज्यांना खेकड्यासारखे पाय असल्यासारखे वाटतात.

साधारण ३ प्लेट
वेळ: ४५ मिनीटे

Tips 4 Kitchen: Cut Onion without tears

साहित्य:
२ मध्यम कांदे
१/४ टिस्पून हिंग
१/२ टिस्पून हळद
२ टिस्पून लाल तिखट
१/२ टिस्पून जिरे
१/४ कप कोथिंबीर,बारीक चिरून
बेसन साधारण १/४ ते १/२ कप
१ टेस्पून तांदूळ पिठ
चवीपुरते मिठ
५ ते ६ कढीपत्ता पाने (ऐच्छिक)
१/४ टिस्पून किसलेले आले (ऐच्छिक)
तळण्यासाठी तेल

कृती:
१) कांद्याचे पातळ उभे स्लाईस करावेत. त्यात हळद, लाल तिखट, हिंग आणि मिठ असे मिक्स करावे आणि १/२ तास झाकून ठेवून द्यावे. यामुळे कांद्याला थोडे पाणी सुटेल.
२) कांद्याला पाणी सुटले कि त्यात १ चमचा तांदूळ पिठ घालावे आणि साधारण ४ ते ५ टेस्पून बेसन घालावे. व्यवस्थित मिक्स करावे. यामध्ये अधिकचे पाणी अजिबात घालू नये, कांद्याला सुटलेल्या पाण्यातच पिठ घट्टसर भिजवावे. तसेच खुप जास्त बेसनसुद्धा घालू नये, थोडा कांदा दिसला तरी चालेल.
३) नंतर यात कोथिंबीर, जिरे, कढीपत्ता चिरून, आले असे घालून मिक्स करावे. फायनल चव पाहून गरजेनुसार जिन्नस घालावेत.
४) तेल गरम करून त्यात भिजवलेल्या पिठाचे छोटे छोटे भाग मोकळे मोकळे करून तेलात सोडावेत. भजी खमंग तळून घ्यावीत. गरमागरम भजी चटणीबरोबर खावी.

टीप:
१) भजीच्या पिठात अधिकचे पाणी घातले तर भजी अजिबात कुरकूरीत होत नाहीत आणि चांगली लागत नाही.

Labels:
kanda bhaji, onion bajji, onion pakoda

बटाटा भजी - Batata Bhaji

Batata Bhaji in Enlgish

साधारण २ प्लेट
वेळ: २० मिनीटे

साहित्य:
२ मध्यम बटाटे
१/२ कप बेसन
३ टेस्पून पाणी
१ टेस्पून तांदूळ पिठ
चिमूटभर खायचा सोडा
१/२ टिस्पून जिरे
चवीपुरते मिठ
तळण्यासाठी तेल

कृती:
१) बटाटे सोलून पातळ चकत्या करून साध्या पाण्यात साधारण १५ मिनीटे घालून ठेवावेत. जर जमत असेल तर भजी बनवायच्या ३-४ तास आधी बटाट्याच्या कापट्या पाण्यात घालून ठेवाव्यात. यामुळे बटाट्याचा स्टार्च काहीप्रमाणात कमी होतो.
२) बटाट्याच्या चकत्या पाण्यात भिजताहेत तोवर एका मध्यम वाडग्यात बेसन तांदूळ पिठ एकत्र करून त्यात ३ ते ४ टेस्पून पाणी घालून पिठ भिजवावे. त्यात जिरे, मिठ आणि सोडा घालून मिक्स करावे.
३) तेल तापत ठेवावे. बटाट्याच्या चकत्या पाण्यातून २ मिनीटे उपसून काढाव्यात, म्हणजे बटाट्यावरचे एक्स्ट्रा पाणी भिजवलेल्या पिठात जाऊन पिठ अजून पातळ होणार नाही. तेल तापले कि बटाट्याच्या चकत्या पिठात बुडवून भजी तळून काढाव्यात.
गरमागरम भजी लसणीच्या तिखटाबरोबर सर्व्ह कराव्यात.
तसेच लादीपाव असेल तर हिरवी चटणी, चिंचेची आंबट-गोड चटणी आणि लसणीचे तिखट घालून भजीपावही सुंदर लागतो.

टीप:
१) भजीसाठीचे पिठ घट्ट नसावे. जर पिठ घट्ट असेल तर भजी कुरकूरीत होत नाहीत आणि चवही चांगली लागत नाही.
२) आवडीनुसार थोडे लाल तिखट, १ टेस्पून चिरलेली कोथिंबीर, आणि चिमूटभर ओवा भजीच्या पिठात घालावा.
३) कदाचित तुम्हाला भिजवलेले पिठ कमी वाटेल पण मध्यम आकाराच्या २ बटाट्यांना १/२ कप बेसन आणि १ चमचा तांदूळ पिठ व्यवस्थित पुरते. जास्त पिठ भिजवले गेले तर भजी तळून ते पिठ परत उरते आणि मग त्यासाठी अजून काहीतरी पदार्थ जबरदस्ती बनवावा लागतो.

Label:
Batata Bhaji, Batata bhajji, aloo pakoda

ब्रेड पकोडा - Bread Pakoda

Bread Pakoda in English

१६ बाईट साईझ भजी
वेळ: ४० मिनीटे (बटाटा भाजी + भजी)

साहित्य:
८ ब्रेड स्लाईस
दिड कप बटाट्याची तिखट भाजी (३ ते ४ मध्यम बटाटे)
१ कप बेसन
२ टेस्पून तांदूळ पिठ
१ कप पाणी
१/४ टिस्पून हळद
१/२ टिस्पून जिरे
चिमुटभर खायचा सोडा
चवीपुरते मिठ
तळण्यासाठी तेल

कृती:
१) बटाटे शिजवल्यावर लगेचच भाजी बनवावी म्हणजे बटाटे चांगल्याप्रकारे मॅश होतात आणि गुठळ्या राहात नाही. बटाट्याची भाजी जरा तिखट असावी नाहीतर भजी तळल्यावर तिखटपणा कमी लागतो.
२) वाडग्यात बेसन आणि तांदूळ पिठ एकत्र मिक्स करावे त्यात पाणी घालून पिठ भिजवावे. हे पिठ पातळही नसावे आणि एकदम घट्ट सुद्धा नसावे. त्यात हळद, खायचा सोडा आणि चवीपुरते मिठ घालून मिक्स करावे.
३) ब्रेड स्लाईसच्या कडा काढून टाकाव्यात (टीप १) एक ब्रेडचा स्लाईस घेऊन त्यावर २ ते ३ चमचे भाजी एकसमान पसरवावी. त्यावर दुसरा ब्रेड स्लाईस ठेवावा. सुरीने आवडीनुसार कापून तुकडे करावेत. (टीप २)
४) प्रत्येक तुकड्यावर पावाच्या दोन्ही बाजूंवर ३ ते ४ थेंब पाणी शिंपडून हलकेच प्रेस करावे. (टीप ३)
५) तळण्यासाठी तेल गरम करत ठेवावे. बटाटा भाजी घातलेले पावाचे तुकडे भिजवलेल्या पिठात घोळवून मिडीयम हाय गॅसवर गोल्डन रंगावर तळून घ्यावेत.
सर्व्ह करताना पुदीना चटणी, चिंचेची चटणी, किंवा टोमॅटो केचपबरोबर द्यावे. ज्यांना एक्स्ट्रा स्पाईसी खायला आवडत असेल त्यांनी शेजवान सॉसबरोबर हे पकोडे ट्राय करून पाहावेत.

टीप:
१) उरलेल्या पिठात थोडी जिरपूड, लाल तिखट, आमचूर किंवा चाट मसाला घालून मिक्स करावे ब्रेडच्या उरलेल्या कडा या पिठात घोळवून भजीप्रमाणेच तळाव्यात.
२) दुकानात किंवा गाडीवर त्रिकोणी तुकडे मिळतात. मी शक्यतो ४ तुकडे करते म्हणजे खायला सोपे पडते.
३) ब्रेडचा कोरडा तुकडा पिठात घोळवल्यावर, तो पिठ आत शोषून घेतो आणि मग आतपर्यंत गेलेले पिठ निट न शिजल्याने भजी कच्ची राहते म्हणून ब्रेडवर थोडे पाणी शिंपडल्याने, पिठ आतपर्यंत शोषले जात नाही आणि भजी छान तळली जाते.
४) जर प्लेन पकोडे बनवायचे असतील तर बटाट्याची भाजी करू नये फक्त ब्रेडचे कापलेले तुकडे भिजवलेल्या पिठात बुडवून नेहमीसारखे तळावे.

मेदू वडा - Medu Vada Sambhar

Medu Vada Sambhar in English

मेदू वडा

वाढणी: साधारण ४ प्लेट (१२ मध्यम वडे)


साहित्य:
दिड कप उडीद डाळ
४ ते ६ मिरे, भरड कुटलेले
२ टेस्पून खोबर्‍याचे पातळ काप (१ सेंमी)
२ हिरव्या मिरच्या, बारीक चिरून
५ ते ६ कढीपत्ता पाने, बारीक चिरून
१/२ टिस्पून जाडसर किसलेले आले
चवीपुरते मिठ

Click here to see how to prepare vada step by step


कृती:
१) उडीद डाळ धुवून ४ ते ५ तास पाण्यात भिजत घालावी. नंतर त्यातील पाणी काढून टाकावे आणि मिक्सरमध्ये व्यवस्थित वाटावे. वाटताना पाणी अजिबात घालू नये (टीप १ आणि ३).
२) मिक्सरमधून वाटण एका खोलगट वाडग्यात काढावे. हॅण्ड मिकसरने, एग बिटरने किंवा चमच्याने ३ ते ४ मिनीटे घोटावे. यामुळे उडीद डाळीचे वाटण हलके होते, तसा फरक लगेचच जाणवतो. नंतर मिरे, खोबर्‍याचे काप, हिरव्या मिरच्या, आले, कढीपत्ता पाने आणि चवीपुरते मिठ असे घालून मिक्स करावे.
३) वडे तळायला घ्यायच्या आधी एका बोलमध्ये पाणी घ्यावे. उडदाचे मिश्रण हाताळताना आधी हात ओला करावा, म्हणजे वड्याला मध्यभागी भोक पाडून तेलात सोडताना पिठ हाताला चिकटणार नाही.
४) तळणीसाठी तेल गरम करावे आणि गॅस मिडीयम हायवर ठेवावा. (टीप २)


Click here to see मेदू वडा बनवण्याच्या 3 पद्धती

वडे सोनेरी किंवा गडद सोनेरी रंगावर तळून घ्यावे. चटणी आणि सांबाराबरोबर गरम गरम सर्व्ह करावे.

टीप:
१) मिश्रण खुप घट्ट वाटत असेल आणि हलके वाटत नसेल अशावेळी एक वडा तळून बघावा, वडा आतून गच्चं लागत असेल तर अगदी किंचीत पाणी घालावे.
२) वडे बारीक आचेवर तळू नयेत त्यामुळे वडे तेलकट होतात.
३) भिजवलेले पिठ पातळ झाले तर पिठाला दाटपणा येण्यासाठी २ ते ३ चमचे तांदूळाचे पिठ वापरतात. तांदूळाच्या पिठामुळे वडे वरून कुरकूरीत होतात परंतु आतून किंचीत घट्ट राहतात.

Labels:
Medu Vada Sambhar, Udipi Vada Sambhar, Medu Wada Sambar

इडली फ्राय - Idli Fry

Idli Fry in English

वाढणी: ३ जणांसाठी (प्रत्येकी ६ तुकडे)



साहित्य:
६ उरलेल्या इडल्या
तळण्यासाठी तेल
१/४ टिस्पून मिठ
१/२ टिस्पून लाल तिखट
१/२ टिस्पून चाट मसाला

कृती:
प्लेन इडली फ्राय बनवण्यासाठी
कढईत तेल गरम करत ठेवावे. प्रत्येक इडलीचे ३ उभे तुकडे करावे किंवा आवडीच्या शेपमध्ये कापावेत. गरम तेलात मिडीयम हाय गॅसवर तळून काढा. इडलीमध्ये आधीच मिठ असल्याने गरज असल्यास थोडे मिठ भुरभूरावे.
मसालेदार इडली बनवण्यासाठी
वरील प्रमाणेच इडल्या तळून घ्याव्यात. गरम असतानाच त्यावर थोडे मिठ, तिखट आणि चाट मसाला भुरभूरवून निट मिक्स करावे.

गरमागरम इडली फ्राय टोमॅटो केचप किंवा चटणीबरोबर खावे.

Labels:
Idli Fry, Fried Idli, Spicy Idli fry

मेथीच्या देठाची भजी - Methichi Bhaji

Methichya Dethachi Bhajji (English version)



साहित्य:
१ वाटी बारीक चिरलेली मेथीची देठं
१ मध्यम कांदा
अर्धी वाटी चणाडाळ
१ चमचा भरून तांदूळपिठ
१ चमचा कणिक
५-६ हिरव्या मिरच्यांची पेस्ट
३-४ लसूण पाकळ्या बारीक चिरलेल्या
१ चमचा जिरं
मिठ
तळणीसाठी तेल

कृती:
१) चणाडाळ पाण्यात ४-५ तास भिजत घालावी. नंतर अगदी थोडे पाणी घालून घट्ट पेस्ट बनवून घ्यावी.
२) कांदा बारीक चिरावा. एका वाडग्यात मेथीची चिरलेली देठं, चिरलेला कांदा, चणाडाळ पेस्ट, चवीप्रमाणे हिरवी मिरची, तांदूळ पिठ, कणिक, जिरं, लसूण आणि चवीपुरते मिठ घालून मिक्स करावे. मिश्रण भज्यांची बोंडं तेलात सोडता येतील इतपत घट्ट ठेवावे.
३) कढईत तेल गरम करून त्यात वरील मिश्रणाची बोंडं तळून घ्यावी.
चिंच गूळाच्या चटणीबरोबर किंवा नारळाच्या चटणीबरोबर हि भजी मस्त लागते.

टीप:
१) मेथी निवडताना ताजी व कोवळी मेथी निवडावी. यामुळे मेथीची देठं कोवळी मिळतील. खुप जून मेथी असेल तर देठातील धागे भजी खाताना तोंडात येतात.
२) आवडीनुसार तिखट कमीजास्त करावे.

चकली

Labels:
Methichi bhajji, methi Bonda, fenugreek pakoda, Methi Pakora, Methichya Dethachi Bhaji, Methi Pakoda

ब्रेड रोल - Bread Roll

Bread Roll (English Version)

वाढणी : ५ ते ६ ब्रेड रोल


साहित्य:
५-६ ब्रेडचे स्लाईस (व्हाईट)
१ कप उकडलेल्या बटाटा फोडी
१/४ कप मटार
१/४ कप कांदा, बारीक चिरून
१/४ कप कोथिंबीर, बारीक चिरून
१/२ टिस्पून किसलेले आले
२ हिरव्या मिरच्या, बारीक चिरून
१ टिस्पून गरम मसाला
१/२ टिस्पून आमचुर पावडर
फोडणीसाठी : २ टिस्पून तेल, १/२ टिस्पून जिरे, १/४ टिस्पून हिंग, १/४ टिस्पून हळद, १/२ टिस्पून लाल तिखट
कढीपत्ता
चवीनुसार मिठ
तळण्यासाठी तेल

कृती:
१) बटाटा उकडून, सोलून त्याच्या फोडी करून घ्याव्यात. मटार वाफवून घ्यावेत.
२) कढईत तेल गरम करून जिरे, हिंग, हळद, लाल तिखट घालून फोडणी करावी. फोडणीत कढीपत्ता, हिरव्या मिरच्या आणि आले घालावे. काही सेकंद परतून कोथिंबीर घालावी, कांदा घालावा. थोडे मिठ घालून कांदा शिजेस्तोवर परतावे.
३) नंतर मटार आणि बटाटा घालून परतावे. गरम मसाला, आमचुर पावडर घालून निट मिक्स करावे. मध्यम आचेवर एक वाफ काढावी. गरजेनुसार मिठ व तिखट वाढवावे. भाजी थोडी गार होवू द्यावी.
४) ब्रेड स्लाईसच्या कडा काढून टाकाव्यात. ब्रेड हातात घेऊन त्यावर थोडे पाणी शिंपडावे आणि ब्रेड ओलसर करावा. अधिकचे पाणी ब्रेड दोन्ही हातांमध्ये चेपून काढून टाकावे. ब्रेड काळजीपूर्वक हाताळावा.



५) या ओलसर ब्रेड स्लाईसच्या मध्यभागी एक ते दिड चमचा भाजी ठेवावी व चित्रात दाखविल्याप्रमाणे फोल्ड करून रोल बनवावा. रोल एकदम छान बांधला गेला पाहिजे. आवरणाच्या फटी राहिल्या तर तेल आत जाईल आणि खाताना रोल तेलकट लागेल.
६) तयार रोल तेलात सोनेरी रंगावर तळून काढावेत.
टोमॅटो सॉसबरोबर गरम गरम सर्व्ह करावेत.

टीप:
१) स्टफिंग आपल्या आवडीनुसार वेगवेगळ्या कॉंम्बिनेशनमध्ये बनवू शकतो.

Labels:
bread roll, veg bread roll, easy bread roll recipe, stuffed bread rolls

कोबीची वडी - Kobichi vadi

Kobichi wadi (English version)



साहित्य:
२ कप बारीक चिरलेली कोबी
१ टेस्पून लसूणपेस्ट
२ टिस्पून लाल तिखट
१/२ टिस्पून जिरं
१/२ टिस्पून हळद
२ टेस्पून तांदूळ पिठ
४ टेस्पून ज्वारीचे पिठ
२ टेस्पून बेसन
चवीपुरते मिठ
२ टेस्पून + वड्या शालो फ्राय करण्यासाठी तेल


कृती:
१) एका भांड्यात चिरलेली कोबी घ्यावी त्यात वरील सर्व जिन्नस घालावेत. थोडेसे पाणी घालून घट्टसर मळून घ्यावे. नंतर तेल घालून थोडे मळून घ्यावे.
::::जर कूकर असेल तर::::
२) त्या कूकरच्या आतील डब्याला आतून तेल लावून घ्यावे व मळलेले पिठ त्यात घालावे व हाताने दाबून सपाट करावे. या डब्यावर झाकण ठेवावे आणि कूकर बंद करून वड्यांचे पिठ शिजवून घ्यावे.
३) वड्यांचे शिजवलेले पिठ थंड झाले कि त्याच्या वड्या पाडाव्यात. आवडीनुसार शालो फ्राय किंवा डिप फ्राय कराव्यात.
::::जर कूकर नसेल तर:::: (Images)
४) मोठे पातेले घ्यावे त्यात १ ते २ लिटर पाणी गरम करत ठेवावे. एका स्टिलच्या भांड्याला आतून तेल लावून घ्यावे. मळलेल्या पिठाचे २ ते ३ उंडे (रोल) करावेत व भांड्यात किंचीत अंतराने ठेवावे.
५) वरून झाकण ठेवावे. झाकणाला पंचा किंवा सुती कपडा बांधावा ज्यामुळे वाफेचे पाणी पिठात पडणार नाही. मोठ्या आचेवर १२-१५ मिनीटे वाफवावे. गॅस बंद करावा. ८-१० मिनीटांनी झाकण उघडून उंडे बाहेर काढावे. वड्या पाडून आवडीनुसार शालो फ्राय किंवा डिप फ्राय कराव्यात.

Labels:
Cabbage Pakoda, Kobi vadi, Kobichi wadi, gobhi pakora,kobiche wade, kobichya vadha, maharashtrian cabbage recipes

कोबीची भजी - Kobichi Bhaji

Kobi Pakoda (English Version)



साहित्य:
३/४ कप बारीक चिरलेली कोबी
१/४ कप बारीक चिरलेली भोपळी मिरची
४ टेस्पून बेसन
१ टेस्पून कॉर्न स्टार्च किंवा कॉर्न फ्लोअर
२ हिरव्या मिरच्या
३ लसणीच्या पाकळ्या
१ टिस्पून जिरे
१/२ टिस्पून हिंग
१ टिस्पून हळद
१ टिस्पून लाल तिखट
१/४ कप कोथिंबीर, बारीक चिरून
चवीपुरते मिठ
तळण्यासाठी तेल

कृती:
१) प्रथम चिरलेली कोबी आणि भोपळी मिरची एका वाडग्यात एकत्र करावे. त्याला थोडे मिठ चोळावे ज्यामुळे भाज्यांना थोडे पाणी सुटेल.
२) मिरच्या आणि लसणीच्या पाकळ्या मिक्सरवर वाटून घ्याव्यात. किंवा मिरचीची आणि लसणीची पेस्ट उपलब्ध असेल तर ती वापरावी.
३) मिठ लावलेल्या भाज्यांमध्ये वर दिलेले सर्व साहित्य घालून मिक्स करावे. अगदी थोडे पाणी घालून कांदा भजीला भिजवतो तितपत घट्टसर भिजवावे.
४) तेल गरम करून भिजवलेल्या पिठाची लहान लहान बोंडं तळून घ्यावीत. भजी तळताना मध्यम आचेवर तळावीत नाहीतर भजी आतमध्ये कच्ची राहण्याचा संभव असतो.

Labels:
bhajee, bhajji, Bonda, Gobhi Pakoda, kobiche wade, kobi wade, pakora recipe, gobi pakora recipe

मटार बटाटा करंजी - Matar Batata Karanji

Matar Batata Karanji (English version)

मटाराच्या करंज्या बर्याच पद्धतीने बनवता येतात. आमच्या घरी या करंज्यांमध्ये मसाले आवडत नाहीत त्यामुळे हि माझी सोपी साधी पद्धत, नक्की करून पाहा आणि सांगा कशी झाली ते !!

साधारण २० मध्यम आकाराच्या करंज्या


साहित्य:
आवरणासाठी
१ वाटी मैदा
दिड चमचा रवा
२-३ चमचे तेल
मीठ
सारणासाठी:
२ वाटी मटार
२ लहान बटाटे
२-३ हिरव्या मिरच्या
फोडणीसाठी: ३ चमचे तेल, १/२ चमचा जिरे, चिमुटभर हिंग, १/२ चमचा हळद
३-४ पाने कढीपत्ता (चिरून घ्यावा)
२ लसूण पाकळ्या बारीक चिरून
१ लहान चमचा मिरपूड
मीठ
तळणासाठी तेल

कृती:
१) आवरणासाठी मैदा आणि रवा एकत्र करावे. तेल कडकडीत तापवून मोहन घालावे. चवीपुरते मीठ घालावे व पाणी घालून घट्ट मळून घ्यावे. मटाराची भाजी होईस्तोवर झाकून ठेवावे.
२) बटाटे सोलून लहान लहान फोडी कराव्यात. नॉनस्टीक फ्राईंग पॅनमध्ये तेल गरम करावे. त्यात जिरे, हिंग, हळद, कढीपत्ता घालून फोडणी करावी. लसूण आणि मिरच्या घालून काही सेकंद परतावे. त्यात चिरलेला बटाटा घालावा, मिठ घालावे व ढवळावे. २-३ मिनीटे वाफ काढून मटार घालावेत. वाफ काढावी. मध्ये मध्ये ढवळत राहावे. हि भाजी सुकी झाली पाहिजे.
३) भाजी शिजत आली कि त्यात थोडी मिरपूड घालावी आणि झार्याने किंवा मॅशरने मटार व बटाटा चेपावेत म्हणजे सारण एकजीव होईल.
४) भाजी झाली कि आवरणासाठीचे पिठ घ्यावे त्याचे सुपारी एवढे गोळे करावे. त्याच्या पुर्या लाटून सारण अर्ध्या गोलावर १ चमचा सारण ठेवावे. पुर्या अगदी पातळ लाटू नयेत. त्याबाजूच्या कडा मोकळ्या ठेवाव्यात. दुसरी अर्धी बाजू सारणावर आणून कडा चिकटवाव्यात. कातणाने जास्तीची कड काढून घ्यावी. जर कातण नसेल तर सुरीने अलगदपणे कडा काढून टाकाव्यात व कड एकदा चेपून घ्यावी. फरक फक्त एवढाच कि कातणामुळे करंज्या सुबक दिसतात.
५) कढईत तेल गरम करून करंज्या गोल्डन ब्राऊन तळून काढाव्यात.
या करंज्या टोमॅटो सॉस किंवा चिंच गूळाच्या चटणी बरोबर छान लागतात.

टीप:
१) आवडत असेल तर भाजीत गरम मसाला घालू शकतो.

Labels:
Maharashtrian, Potato snacks, Fritters recipe, karanji recipe, gujia recipe

पट्टी सामोसा - Patti Samosa

Patti Samosa (English Version)

फोटो १
फोटो २

फोटो ३

साहित्य:
२ वाट्या मैदा
१ वाटी बेसन
मोहन घालायला ४ चमचे तेल
१ ते दिड वाटी मटार
२ बटाटे
३-४ मीरच्या
पाउण वाटी ओले खोबरे
फोडणीचे साहित्य: ३-४ चमचे तेल, मोहोरी, जिरे, हिंग, हळद
१ चमचा गरम मसाला
१ चमचा लिंबू रस
मीठ
तळण्यासाठी तेल



कृती:
१) सर्वप्रथम मैदा व बेसन एकत्र करावे. ४-५ चमचे तेल कडकडीत गरम करावे आणि पिठाला मोहन घालावे. चवीपुरते मीठ घालावे. पाणी घालून पिठ घट्टसर मळावे व झाकून ठेवावे.
२) बटाटे सोलून त्याच्या बारीक चौकोनी फोडी कराव्यात. नॉनस्टीक फ्राईंग पॅनमध्ये ३-४ चमचे तेल गरम करावे. त्यात मोहोरी, जिरे, हिंग, हळद, मिरच्या घालून फोडणी करावी त्यात मटार आणि बटाटे घालून परतावे. मध्यम आचेवर वाफ काढावी. मधेमधे ढवळावे. बटाटे व मटार शिजले कि त्यात ओले खोबरे, गरम मसाला, मीठ, लिंबू रस घालून ढवळावे.
३) भिजवलेल्या पिठाच्या फुलक्याच्या आकाराच्या पातळसर पोळ्या लाटाव्यात. प्रत्येक पोळी फक्त ४-४ सेकंद भाजावी. (फोटो २) अशा प्रकारे पोळ्या भाजून घेतल्याने समोश्यावर फुगवटे कमी येतात.
४) १/२ वाटी कणिक किंवा मैदा घेउन त्याची घट्टसर पेस्ट बनवावी. भाजलेल्या प्रत्येक पोळीचे सुरीने दोन अर्धगोलाकार भाग करावेत. अर्धगोलाच्या दोन बाजू पेस्टने जोडून कोन बनावावा [फोटो ४ (२) व फोटो ३]. त्यात १-२ चमचे भाजी भरून आधी १ बाजू आत मुडपावी दुसर्या बाजूला पेस्ट लावून ती बाजू दुमडून चिकटवावी [फोटो ४ (३)]. त्रिकोणी समोसे मध्यम आचेवर तळून काढावे.
हे सामोसे चिंचगूळाच्या चटणीबरोबर छान लागतात.

टीप:
१) आवडीनुसार तिखटपणा कमीजास्त करावा.

Labels
Samosa Recipe, Indian Samosa, Fried Snacks, Potato and green peas recipe

कोथिंबीर देठाची भजी - Kothimbir Bhajji

Cilantro stem's pakoda in English

आपल्या जेवणात कोथिंबीर ही आवर्जून वापरली जाते. त्याची देठं आपण फेकून देतो. जर देठे कोवळी असतील तर या देठांचा वापर करून मस्तपैकी भजी करता येतात. त्याचीच हि कृती:

साहित्य:
१ वाटी चिरलेली कोथिंबीरीची देठं
१ मध्यम कांदा
१/२ वाटी भिजवलेली चणाडाळ
१ चमचा भरून तांदूळपिठ
१ चमचा कणिक
५-६ हिरव्या मिरच्यांची पेस्ट
१ चमचा जिरं
मीठ
तळणीसाठी तेल

कृती:
१) १/२ वाटी चणाडाळ ४-५ तास भिजत घालावी. मिक्सरवर पाणी न घालता पेस्ट करावी.
२) कांदा बारीक चिरावा. एका वाडग्यात कोथिंबीरीची चिरलेली देठं, चिरलेला कांदा, चणाडाळ पेस्ट, चवीप्रमाणे हिरवी मिरची, तांदूळ पिठ, कणिक, जिरं आणि चवीपुरते मिठ घालून मिक्स करावे. मिश्रण भज्यांची बोंडं तेलात सोडता येतील इतपत घट्ट ठेवावे.
३) कढईत तेल गरम करून त्यात वरील मिश्रणाची बोंडं तळून घ्यावी. हि भजी चिंच गूळाच्या चटणीबरोबर किंवा हिरव्या झणझणीत चटणी बरोबर छान लागते.

टीप:
१) आवडत असल्यास यात लसूणसुध्दा वापरू शकतो.

Labels:
Cilantro Fritters, Indian Fritters Recipe, Pakoda Recipe, pakora recipe, Appetizer recipe

मूगडाळीची कचोरी - Moogdal Kachori

Moogachi Kachori



साहित्य:
सारणासाठी:
१ वाटी हिरवी मूगाची डाळ
१ चमचा आले पेस्ट
३ हिरव्या मिरच्या/ लाल तिखट
१ चमचा आमचूर पावडर
१ चमचा बडीशेप
१ चमचा गरम मसाला
दिड चमचा साखर
हिंग, हळद, कढीपत्ता
तेल
मिठ
आवरणासाठी:
२ वाट्या गव्हाचे पिठ
३-४ चमचे तेल
पिठ भिजवण्यासाठी पाणी
चवीपुरते मिठ
तळण्यासाठी तेल

कृती:
१) मूग डाळ ४-५ तास भिजत ठेवावी. भिजवलेली मूगडाळ जाड बुडाच्या पातेल्यात घेऊन १ वाटी पाण्यात उकळवावी. उकळवताना गॅस मध्यम असावा आणि पातेल्यावर झाकण ठेवावे. मूगडाळ अगदी नरम शिजवू नये. सर्व पाणी निघून जाऊ द्यावे. नंतर मूगडाळ थोडी चेचून घ्यावी.
२) गव्हाचे पिठाची कणिक भिजवावी. अगदी घट्ट किंवा अगदी सैल भिजवू नये. कणिक झाकून ठेवावी.
३) कढईत २ चमचे तेल गरम करावे. त्यात हिंग, हळद, आले पेस्ट, मिरच्या/लाल तिखट, कढीपत्ता घालून फोडणी करावी. त्यानंतर मूगडाळ, गरम मसाला, बडीशेप, आमचूर पावडर, मिठ, साखर घालून ढवळावे. सारण थंड होवू द्यावे. हाताने एकत्र करावे म्हणजे ते मिळून येईल.
४) कणकेचे दोन-दोन इंचाचे गोळे करावे. गोल पुरीसारखे लाटावे. पुरी डाव्या हातात घेऊन उजव्या हाताने त्यात एक चमचा सारण घालावे आणि सर्व कडा एकत्र आणून व्यवस्थित बंद करावे. हे करत असतानाच तळणासाठी कढईत तेल गरम करत ठेवावे. मिडीयम हाय हिटवर कचोर्या गोल्डन ब्राउन होईस्तोवर तळून काढाव्यात. या कचोर्या गरम असतानाच खाव्यात. थंड झाल्यावर चव फार चांगली लागत नाही.
या कचोर्या कोथिंबीर-पुदीना मिरचीच्या चटणीबरोबर किंवा चिंच खजूराच्या चटणीबरोबर अगदी झकास लागतात.

टीप:
१) गरम मसाल्याबरोबर २ चमचे गोडा मसाला (काळा मसाला) वापरल्यास चव छान येते.
२) आवडत असल्यास सारण परतताना काळ्या मनुका किंवा बेदाणे घालू शकतो.

वांग्याची भजी - Vange Bhaji

Vangyachi Bhaji (English Version)



साहित्य:
१ वांगे
1/२ कप बेसन पिठ
१ टेस्पून तांदूळ पिठ
१/२ टिस्पून हळद
१ टिस्पून तिखट
१/४ टिस्पून जिरे
चवीपुरते मिठ
तळण्यासाठी तेल

कृती:
१) वांग्याचे गोल पातळ काप करावे. मिठाच्या पाण्यात काप १० मिनीटे घालावेत.
२) बेसन पिठात पाणी घालून गुठळ्या न होता नेहमी बटाटे वड्याला जितके घट्ट भिजवतो त्यापेक्षा थोडे पातळ भिजवावे, ज्यामुळे वांग्याच्या कापांना बेसनाचे कमी आवरण होईल आणि थोडा कुरकूरीतपणा येईल.
३) बेसनाच्या पिठात तांदूळ पिठ, लाल तिखट, जिरे, मिठ, हळद घालावे. जर उपलब्ध असेल तर थोडा ओवा, चिरलेली कोथिंबीर घालावी.
४) कढईत तेल गरम करावे. बेसन पिठात वांग्याचे काप बुडवून तळून काढावेत. हिरवी चटणी किंवा लसणीच्या चटणीबरोबर गरम गरम भजी खावी.

Labels:
Eggplant Recipe, Eggplant Fritters, Eggplant Pakoda, Vangyachi Bhajji, Maharashtrian Eggplant recipe, Spicy Eggplant bhaji, Pakoda

साबुदाणा वडा - Sabudana Vada

Sabudana Vada in English

साधारण १५ मध्यम वडे
वेळ: ३० मिनीटे (साबुदाणा भिजवण्याचा वेळ वगळून)

साहित्य:
१ कप साबुदाणे
२ मोठे बटाटे उकडून
५-६ तिखट हिरव्या मिरच्या
१/४ कप चिरलेली कोथिंबीर
१/२ टिस्पून जीरे
१/४ ते १/२ कप शेंगदाण्याचा कूट
१/२ लिंबाचा रस
चवीपुरते मीठ
वडे तळण्यासाठी तेल

कृती :
१) साबुदाणे पाण्यात भिजवावे. उरलेले पाणी काढून टाकावे. झाकण ठेवून ४ ते ५ तास भिजत ठेवावेत.
२) शिजलेले बटाटे नीट कुस्करून घ्यावे.
३) मिरच्या बारीक वाटून घ्याव्यात.
४) शेंगदाण्याचा कूट : शेंगदाणे भाजून त्याची साले काढावीत आणि मिक्सरवर भरडसर बारीक करावेत.
५) भिजवलेले साबुदाणे, बटाटे, मिरच्यांचे वाटण, जीरे, शेंगदाण्याचा कूट, कोथिंबीर, लिंबाचा रस आणि चवीपुरते मीठ घालून नीट मिक्स करावे.
६) भिजवलेल्या मिश्राणाचे छोटे गोळे तयार करावेत. कढईत तेल गरम करावे आणि मीडियम हाय गॅस वर गोल्डन ब्राउन तळावेत.

खवलेला नारळ, मिरची, आणि कोथिम्बीरच्या चटणीबरोबर वडे छान लागतात. चटणीच्या रेसिपीसाठी इथे क्लिक करा.

Labels:
Sabudana Vada, Sago Vada, sabudana wada

बटाटा वडा पाव- Batata Wada pav

Batata Vada in English

वेळ: ३५ ते ४० मिनीटे
नग: १२ ते १४ वडे

साहित्य:
वडापाव करायचा असल्यास लादीपाव
४ शिजवलेले मोठे बटाटे
४ ते ५ हिरव्या मिरच्या
वडे तळण्यासाठी तेल
१ टिस्पून चमचा उडीद डाळ
४-५ लसणींची पेस्ट
१ इंच आले पेस्ट
३-४ कढीपत्ता पाने
२ टेस्पून कोथिंबीर
१ टेस्पून लिंबाचा रस
फोडणीसाठी: २ टिस्पून तेल, १/४ टिस्पून मोहोरी, १/४ टिस्पून जिरे, चिमूटभर हिंग, १/४ टिस्पून हळद
चवीपुरते मीठ
आवरणासाठी
१ कप चणा पिठ, ३/४ ते १ कप पाणी, १/२ टिस्पून हळद, चवीपुरते मीठ, चिमूटभर खायचा सोडा

कृती:
१) शिजवलेले बटाटे व्यवस्थित कुस्करून घ्यावे. किसणीवर किसू नये एकदम लगदा पण चांगला लागत नाही. तसेच खुप गुठळ्याही ठेवून नये. (नोट ३)
२) कढईत २ चमचे तेल गरम करावे. मोहोरी, जिरे, हिंग, हळद, कढीपत्ता, मिरच्या आणि नंतर आले-लसूण पेस्ट घालावी. थोडे परतून त्यात उडीद डाळ घालावी. उडीद डाळ गोल्डन ब्राउन झाली कि त्यात कुस्करलेला बटाटा घालून परतावे. चवीपुरते मीठ घालावे. मीठ आणि फोडणीचे तेल बटाट्याला व्यवस्थित लागेल असे कालथ्याने मिक्स करावे. लिंबूरस घालावा. तयार भाजीचे २ इंच इतपत गोळे करावे.
३) भाजी तयार झाली कि आवरणासाठी चणा पिठ पाण्यात भिजवावे. अर्धा चमचा हळद, सोडा आणि चवीपुरते मिठ घालावे. पिठ अगदी पातळ किंवा अगदी घट्ट भिजवू नये.
४) कढईत तेल गरम करावे. तळताना वडा तेलात पुर्ण बुडेल इतपत तेल कढईत घालावे. तेल व्यवस्थित तापू द्यावे. भिजवलेल्या पिठाचा एक थेंब तेलात टाकावा. जर तो टाकल्या टाकल्या वर आला तर तेल तापले आहे असे समजावे. तेल तापले कि गॅस मिडीयम हायवर ठेवावा.
४) भिजवलेल्या पिठात तयार भाजीचा एक गोळा बुडवून तेलात सोडावा. असे तिन चार वडे (किंवा तळताना कढईत सुटसुटीत मावतील एवढे) गोल्डन ब्राउन होईस्तोवर तळावेत.
कोथिंबीर मिरचीच्या हिरव्या चटणीबरोबर किंवा लसणीच्या तिखटाबरोबर गरमागरम खावेत.

टीप:
१) पावामध्ये चटणी आणि वडा घालून वडा पावही खाऊ शकतो.
२) वड्यातील भाजीचा तिखटपणासाठी आवडीनुसार मिरचीचा ठेचा वापरावा.
३) रेड पोटॅटो वडे बनवायला वापरू नये. वड्याचे सारण चिकट होते. रसेट पोटॅटो चालतील.

Labels:
Batata Wada, Batata Vada, Potato Vada, Maharashtrian Batata wada, Mumbai Vada Pav, Vada Pav recipe, Aloo Bonda Recipe