दह्यातील वांग्याचे भरीत - Vangyache Bharit

Baigan Bhurta (in yogurt) in English

वेळ: १० मिनिटे
साधारण १ कप भरीत
साहित्य:
१ कप भाजलेल्या वांग्याचा गर
१/२ कप बारीक चिरलेला कांदा
१ टीस्पून तेल, १ चिमटी मोहोरी (ऐच्छिक) , २ चिमटी जिरे, १/४ टीस्पून हिंग
२ हिरव्या मिरच्या, उभ्या चिरून
२ ते ३ टेस्पून कोथिंबीर, बारीक चिरून
३/४ कप किंवा गरजेनुसार दही
चवीपुरते मीठ

कृती:
१) वांग्याचा गर सुरीने थोडा कापून घ्यावा. कढल्यात तेल गरम करावे. त्यात जिरे घालून तडतडेस्तोवर थांबावे. हिंग आणि हिरवी मिरची घालावी. तयार फोडणी वांग्यावर घालावी.
२) कांदा आणि मीठ घालून मिक्स करावे. दही आणि कोथिंबीर घालून मिक्स करावे.
जेवणात तोंडीलावणी म्हणून दह्यातील वांग्याचे भरीत छान लागते.

उपवासाची भाजणी - Upvasachi Bhajni

Upasachi Bhajani in English



वेळ: ३० ते ४० मिनिटे

३०० ग्राम भाजणी



साहित्य:

१०० ग्राम साबुदाणा

दिडशे ग्राम वरी तांदूळ

१०० ग्राम राजगिरा

१ टीस्पून जिरं



कृती:

१) साबुदाणा, वरी तांदूळ, आणि राजगिरा गुलाबी रंग येईस्तोवर मंद आचेवर वेगवेगळे भाजावे.

२) भाजलेले सर्व जिन्नस एकत्र करावे. त्यात जिरे न भाजताच घालावे.

३) मिक्सरमध्ये एकदम बारीक करावे किंवा गिरणीतून बारीक दळून आणावे.



टीपा:

१) साबुदाणा भाजण्यापूर्वी त्याला १ टीस्पून तूप लावून घ्यावे म्हणजे भाजताना कढईला चिकटणार नाही.

२) साबुदाणा, वरी, राजगिरा खूप जास्त रंग बदलेस्तोवर भाजू नये. त्यामुळे भाजणीचा रंग डार्क येतो आणि चवही चांगली नाही.

३) जिरे भाजू नये. कच्चेच घालून भाजणी दळावी.

४) आवडीनुसार साबुदाणा, वरी, राजगिरा यांचे प्रमाण कमीजास्त करू शकतो. बऱ्याच जणांना साबुदाण्याचा त्रास होतो. त्यांनी साबुदाणा कमी करून वरी किंवा राजगिरा यांचे प्रमाण वाढवावे.

वांगी बटाटा काचऱ्या - Vangi Batata Kacharya

Aloo Baingan Stir Fry in English

वेळ: २० मिनिटे
वाढणी: ३ जणांसाठी

साहित्य:
८ ते १० लहान वांगी (टीप १)
२ मध्यम बटाटे
१/२ कप बारीक चिरलेला कांदा
फोडणीसाठी: २ टेस्पून तेल, चिमूटभर मोहोरी, १/८ टीस्पून हिंग, १/४ टीस्पून हळद, १/२ टीस्पून लाल तिखट
४ ते ५ कढीपत्ता पाने
२ टेस्पून शेंगदाण्याचा कूट
२ टेस्पून ताजा खोवलेला नारळ
चवीपुरते मीठ
१/२ टीस्पून साखर किंवा चवीनुसार

कृती:
१) वांगी धुवून घ्यावीत आणि देठं कापून टाकावीत. प्रत्येक वांग्याच्या उभ्या चार फोडी कराव्यात. आणि चतकोर आकाराच्या काचऱ्या कराव्यात. गार पाण्यात बुडवून ठेवाव्यात.
२) बटाटे सोलून उभे चार भाग करून पातळ काचऱ्या कराव्यात.
३) कढईत तेल गरम करावे. मोहोरी, हिंग, हळद, लाल तिखट आणि कढीपत्ता घालून फोडणी करावी. कांदा आणि बटाटा घालावा. थोडे मीठ घालावे. झाकण ठेवून बटाटे ५०% शिजवावे.
४) वांग्यातील पाणी पूर्णपणे काढून टाकावे. वांग्याच्या काचऱ्या कढईत घालाव्यात. झाकण न ठेवता वांगी परतत राहावी. वांगी पटकन शिजतात, म्हणून कढईवर झाकण ठेवू नये.
५) वांगी शिजली कि चव पाहून लागल्यास मीठ घालावे. आता शेंगदाण्याचा कूट, साखर, आणि नारळ घालून मिक्स करावे. एक दोन मिनिटे भाजी परतावी आणि गरमच पोळीबरोबर किंवा आमटी भाताबरोबर वाढावी.

टीपा:
१) मोठे वांगेसुद्धा वापरता येईल. तेव्हा वांगं-बटाट्याचे प्रमाण १ कप वांग्याच्या काचऱ्यांना ३/४ कप बटाट्याच्या काचऱ्या असे असावे.
२) आंबटपणासाठी १ टीस्पून लिंबाचा रस भाजी तयार झाल्यावर शेवटी घालावा.

उकडपेंडी - Ukadpendi

ukadpendi in English

वेळ: १५ मिनीटे
वाढणी: २ जणांसाठी

साहित्य:
१/२ कप रवाळ कणिक
३ टेस्पून तेल
१/४ कप कांदा, बारीक चिरून
४ ते ५ कढीपत्ता पाने
फोडणीसाठी: चिमटीभर मोहोरी, १/४ टिस्पून हिंग, १/८ टिस्पून हळद, २ सुक्या लाल मिरच्या
१/२ कप दही, घोटलेले
१/४ कप पाणी (टीप १)
चवीपुरते मिठ

कृती:
१) कढईत तेल गरम करावे. कणिक मध्यम आचेवर गुलाबीसर भाजून घ्यावी (साधारण ५ ते ७ मिनीटे). भाजलेली कणिक लहान वाडग्यात काढून ठेवावी.
२) त्याच कढईत १ टेस्पून तेल घालावे. मोहोरी, हिंग, हळद, लाल मिरच्या आणि कढीपत्ता घालून फोडणी करावी. कांदा घालून गुलाबीसर होईस्तोवर परतून घ्यावा. मिठ घालून मिक्स करावे.
३) भाजलेली कणिक घालून एक-दोन मिनीट मिक्स करावे. दही आणि पाणी मिक्स करावे आणि हे मिश्रण कढईत ओतावे. आणि पटापट मिक्स करावे. मिश्रणाचा गोळा तयार होईल. एकदम व्यवस्थित मिक्स करावे, गुठळी होवू देऊ नये. झाकण ठेवून मंद आचेवर काही मिनीटे वाफ काढावी.
कोथिंबीरीने सजवून सर्व्ह करावे.

टीपा:
१) उकड पातळ किंवा घट्ट हवी असेल त्याप्रमाणे पाण्याचे प्रमाण कमी किंवा जास्त करावे. वरील कृतीमध्ये घट्ट उकड होईल एवढे पाण्याचे प्रमाण दिले आहे. पण उकड पातळ हवी असेल तर पाणी जास्त घालावे.
२) उकड ही कच्चं तेल घालून, चांगली मळून मग खातात. त्यासाठी घट्ट उकड करावी. गरमच असताना परातीत घेऊन थोडे तेल घालून लगेच मळावी. गरम मळताना चटका बसतो म्हणून उकड मळण्यासाठी लाकडी चकती मिळते ती वापरावी. ती जर नसेल तर खलबत्त्यातील खलायचे भांडे घ्यावे. त्याच्या तळाला तेल लावून त्याने मळावी. गरम गरम उकड सर्व्ह करावी.
३) लाल मिरची ऐवजी काहीजण हिरवी मिरची किंवा लाल तिखटही वापरतात.
४) कांदा हा ऐच्छिक आहे. पण चव चांगली येते कांद्यामुळे. तसेच कांद्याऐवजी लसूण वापरता येते. अधिक पौष्टीक बनवायची असल्यास मटार, गाजराचे तुकडे, भिजवलेली मूग-मटकीही घालू शकतो.
५) ही उकड तांदूळाची, बेसनाची, ज्वारीच्या पिठाची करता येते. पद्धत हीच फक्त पिठ वेगवेगळे वापरावे. किंवा मिश्र पिठाची सुद्धा उकड बनवता येते.

व्हेज कोल्हापूरी - Veg Kolhapuri

Veg Kolhapuri in English

वेळ: ४० मिनीटे
वाढणी: ४ जणांसाठी

साहित्य:
१/२ कप गाजराचे चौकोनी तुकडे
३/४ कप बटाटयाचे मोठे तुकडे (बटाटा सोलून)
१/२ कॉलीफ्लॉवरचे मध्यम तुरे (फ्रोझन)
१/२ कप हिरवे मटार (फ्रोझन)
१/४ कप फरसबीचे तुकडे (१ इंच)
१/२ कप कांदा, बारीक चिरून
१ कप टोमॅटो, बारीक चिरून
१/२ इंच आल्याचा तुकडा, बारीक चिरून
४ ते ६ मोठ्या लसूण पाकळ्या, बारीक चिरून
१ ते दिड टेस्पून काश्मिरी लाल तिखट (टीप ३ व ५)
२ टिस्पून साधं लाल तिखट
१/४ टिस्पून हळद
६ टेस्पून तेल
२ टेस्पून कोल्हापूरी मसाला
इतर मसाले:
१/४ टिस्पून वेलची पावडर
२ चिमटी लवंग पावडर
१/२ टिस्पून बडीशेप पावडर
१/२ टिस्पून दालचिनी पावडर
१ चिमटी जायफळ पावडर
चवीपुरते मिठ

कृती:
१) कढईत २ टेस्पून तेल गरम करावे. त्यात आलं-लसूण परतून घ्यावे. कांदा घालून लालसर होईस्तोवर परतावे. साधं लाल तिखट आणि टोमॅटो घालावा.मिठ घालून टोमॅटो अगदी नरम होईस्तोवर परतावे. हा मसाला थोडा गार होवू द्यावा. नंतर थोडे पाणी घालून मिक्सरमध्ये एकदम बारीक वाटून घ्यावे.
२) त्याच कढईत ३ टेस्पून तेल, मध्यम आचेवर गरम करावे त्यात हळद आणि १/२ टिस्पून काश्मिरी लाल तिखट घालून लगेच फरसबी आणि बटाट्याचे तुकडे घालावे. मिक्स करून २ ते ३ वाफा काढाव्यात. बटाटे किंचीतच शिजू द्यावे. आच मोठी करून (बटाटे व तिखट करपणार नाही याची काळजी घ्यावी.) कांदा-टोमॅटोची प्युरी घालावी. आच मोठी ठेवल्याने तेल व्यवस्थित तापते आणि फोडणी चांगली बसते. मिश्रण निट ढवळून गरजेपुरते पाणी घालावे.
३) कढईतील मिश्रणाला उकळी येऊ द्यावी. त्यात कोल्हापूरी मसाला, बडीशेप पावडर, लवंग पावडर, दालचिनी पावडर, वेलचीपूड आणि चवीपुरते मिठ घालावे. गाजर, मटार आणि कॉलीफ्लॉवर घालावा. मध्यम आचेवर झाकण ठेवून शिजू द्यावे. १० मिनीटे शिजवावे.
भाजी तयार झाली कि १ ते दिड टिस्पून तेल फोडणीसाठीच्या कढल्यात गरम करावे. १ टेस्पून काश्मिरी लाल तिखट घालावे. आणि लगेचच हि फोडणी भाजीवर ओतावी. (टीप)
ढवळून भाजी सर्व्ह करावी.

टीप:
१) हि भाजी तिखटच असते, पण आपल्या आवडीनुसार तिखटाचे प्रमाण कमीजास्त करावे.
२) काश्मिरी लाल तिखटाला खुप छान लाल रंग असतो पण तिखटपणा नसतो. म्हणून नेहमीच्या वापरातील लाल तिखट हे तिखटपणासाठी आणि काश्मिरी लाल तिखट हे रंगासाठी वापरले आहे.
३) शेवटला जी काश्मिरी लाल तिखटाची फोडणी घालायची आहे ती पूर्णत: ऐच्छिक आहे, या फोडणीमुळे भाजीवर मस्तपैकी लालसर तवंग येतो. तसेच हि फोडणी घालताना तिखट गरम तेलात टाकल्याटाकल्या भाजीवर ओतावी, वेळ लावू नये नाहीतर तिखट करपते.
४) जे मसाले वापरले आहेत ते जरी कमी प्रमाणात आहेत तरी एकत्रितपणे खुप छान हलकासा स्वाद या भाजीला येतो. आवडीनुसार कुठलाही मसाल्याचे प्रमाण किंचीत वाढवले तरी चालते.
५) काश्मिरी लाल तिखटाने स्वाद आणि रंग चांगला येतो. जर अगदीच काश्मिरी लाल तिखट मिळाले नाही तर त्याऐवजी खायचा लाल रंग चिमूटभर वापरू शकतो.

वांग्याचे भरीत - vangyache bharit

Baingan Bharta in English

वेळ: वांग भाजण्यासाठी: भाजण्याच्या पद्धतीनुसार । पाकृसाठी वेळ: ५ ते १० मिनीटे
वाढणी: ३ ते ४ जणांसाठी

साहित्य:
१ मोठे वांगे
१ मोठा कांदा, बारीक चिरून (साधारण ३/४ ते १ कप)
३ हिरव्या मिरच्या, उभ्या चिरून
फोडणीसाठी: १ टेस्पून तेल, २ चिमटी मोहोरी, १ चिमटी जिरे, १/८ टिस्पून हिंग, १/८ टिस्पून हळद
चवीपुरते मिठ
कोथिंबीर सजावटीसाठी

कृती:
१) वांगं भाजून घ्यावं.
i) गॅसवर: गॅसच्या शेगडीवर वांगं भाजण्यासाठी आधी वांग्याला किंचीत तेल चोळून घ्यावे आणि आचेवर भाजावे. मधेमधे वांगं फिरवावे म्हणजे सर्व ठिकाणी वांगं निट भाजले जाईल. (नोट- गॅसवर वांगं भाजताना वांग्यातील पाणी शेगडीवर पडून डाग पडतात. पण थोडे घासून स्वच्छ करता येते.)
ii) ओव्हनमध्ये: ओव्हन ४०० F वर प्रिहीट करावे. वांग्याला बाहेरून तेल लावून सुरीने किंवा काट्याने (Fork) काहीवेळा टोचावे. अल्युमिनीयम फॉइलमध्ये गुंडाळून ४५ ते ५० मिनीटे बेक करावे. (या पद्धतीने वांग्याचा आतील गर शिजतो पण थेट विस्तवावर भाजल्याने जो स्वाद येतो तो मात्र येत नाही.)
iii) बार्बेक्यु ग्रिलसुद्धा वांगं भाजायला वापरू शकतो.
iv) फायरप्लेस (टीप): ऐकायला मजेशीर वाटेल पण मी वांगं फायरप्लेसमध्ये भाजलं. वांग्याला तेल लावून काहीवेळा सुरीने किंवा काट्याने टोचून घ्यावे. अल्युमिनीयम फॉइलमध्ये व्यवस्थित गुंडाळून घ्यावे. फायरप्लेसमध्ये वरच्या बाजूस धूर बाहेर जाण्यासाठी छोटी खिडकी असते ती प्रथम उघडावी. नंतर २ ते ३ जाडसर फांद्या फायरप्लेसमध्ये रचाव्यात. खाली १-२ नारळाच्या करवंट्या ठेवाव्यात. १-२ चमचे तेल फांद्यांवर शिंपडावे. जागा करून मधल्या जागी वांगं ठेवावे. आग पेटवावी. लागल्यास पेपर किंवा कार्डबोर्डचे तुकडे वापरून आग सुरू करावी. शेकोटी व्यवस्थित पेटल्यावर १० ते १५ मिनीटात वांग भाजलं जातं. वांगं भाजलं गेल्यावर अगदी सांभाळून पापड तळायच्या चिमट्याने बाहेर काढावे.

२) वांगं थोडं गार होवू द्यावं. सालं काढून शेंडी कापून टाकावी. आतील गर जाडसर कापून घ्यावा.
३) वांगं आणि कांदा एकत्र करावा. वांगं भाजल्यावर त्यातून जो रस निघतो तो फेकून देवू नये, तोही वापरावा.
४) कढईत तेल तापवून मोहोरी, जिरे, हिंग, हळद घालून फोडणी करावी. मिरची परतावी. नंतर कांदा-वांग्याचे मिश्रण घालून २-३ मिनीटे परतावे. कोथिंबीरीने सजवून भाकरीबरोबर सर्व्ह करावे.

टीप:
१) वांगं भाजण्यासाठी बाजारात जो फायर स्टार्टर लॉग मिळतो तो वापरला नव्हता कारण तो बनवण्यासाठी कोणत्या गोष्टी किंवा रसायनं वापरतात ते माहीत नसतं. म्हणून झाडाच्या तुटलेल्या फांद्याच वापरल्या होत्या.

मायक्रोवेव्ह उपमा - Microwave Upma

Microwave Upma in English

वेळ: साधारण २० मिनीटे
वाढणी: ३ जणांसाठी

साहित्य:
३/४ कप रवा
१ ते २ टेस्पून तूप
फोडणीसाठी - १ टेस्पून तूप, चिमूटभर मोहोरी, १/४ टिस्पून जिरे, १/२ टिस्पून उडीद डाळ, चिमूटभर हिंग, ३ हिरव्या मिरच्या, ४-५ कढीपत्ता पाने, १/४ टिस्पून आले
१/२ कप कांदा, बारीक चिरलेला
१/४ कप मटार (ऐच्छिक)
१/२ कप टोमॅटो, बारीक चिरलेला (ऐच्छिक)
मिठ, साखर चवीनुसार
१ टेस्पून तूप (ऐच्छिक)
सजावटीसाठी कोथिंबीर, लिंबू, ताजा खोवलेला नारळ
मायक्रोवेव्ह सेफ ग्लास बाऊल विथ ग्लास लिड

कृती:
रवा भाजणे
१) ३/४ कप रवा मायक्रोवेव्ह सेफ झाकणात समान पसरवून हाय पॉवरवर दिड मिनीट मायक्रोवेव्ह करा. डीश बाहेर काढून चमच्याने रवा ढवळावा. परत दिड मिनीट मायक्रोवेव्ह करावा. डीश बाहेर काढून ढवळावा. नंतर अजून २ मिनीटे मायक्रोवेव्ह करावा. (दिड मिनीट + दिड मिनीट + १ मिनीट + १ मिनीट) (महत्त्वाची टिप १)
फोडणी:
२) आता मायक्रोवेव्ह सेफ काचेच्या वाडग्यात १ टेस्पून तूप घ्या. हाय हाय पॉवरवर दिड मिनीट मायक्रोवेव्ह करा. त्यात मोहोरी, जिरे आणि उडीदडाळ घालून दिड मिनीट ते दोन मायक्रोवेव्ह करा. वाटल्यास मध्येच भांडे बाहेर काढून ढवळा.
३) आता हिंग, चिरलेल्या मिरच्या, कढीपत्ता, ठेचलेले आले घालून ३० ते ४० सेकंद मायक्रोवेव्ह करा.
४) बारीक चिरलेला कांदा घालून मिक्स करा. साधारण दिड मिनीट असे ३ वेळा मायक्रोवेव्ह करा.
५) आता चिरलेला टोमॅटो, मटार घालून मिक्स करा. दिड मिनीट असे दोनदा मायक्रोवेव्ह करा. मधे भांडे बाहेर काढून ढवळा.
६) सव्वा कप पाणी घाला. चवीपुरते मिठ आणि साखर घालून पाण्याची चव पाहून लागल्यास मिठ किंवा साखर अड्जस्ट करा. १ मिनीट मायक्रोवेव्ह करा.
७) भाजलेला रवा घालून मिक्स करा. झाकण ठेवून २ मिनीटे मायक्रोवेव्ह करा. भांडे बाहेर काढून थोडे तूप घाला आणि मिक्स करा. परत २ मिनीटे मायक्रोवेव्ह करा. आणि थोडावेळ वाफ मुरावी म्हणून तसाच आत ठेवा. ३ ते ४ मिनीटांनी तयार उपमा बाहेर काढून कोथिंबीर, लिंबू, ओला नारळ यांनी सजवून सर्व्ह करा.

टीप:
१) प्रत्येक मायक्रोवेव्हची पॉवर वेगवेगळी असते त्यामुळे वर दिलेल्या कालावधी एखाद मिनीट कमी किंवा जास्त होवू शकते याची नोंद घ्यावी.
२) तूपाऐवजी तेलही वापरू शकतो. तूपामुळे खुप छान चव येते.
३) आवडीनुसार काजूही घालू शकतो.
४) वेळ व्यवस्थित वापरल्यास २०-२२ मिनीटांत उपमा बनतो. म्हणजे रवा भाजताना कांदा, टोमॅटो चिरून घ्यावा तसेच बाकीची तयारी घ्यावी.
५) १ ते ६ स्टेप्स काचेचे भांडे न झाकता फॉलो करा, आणि फक्त ७ व्या स्टेपमध्ये भांड्यावर झाकण ठेवावे.

उपम्याच्या इतर रेसिपीज
रवा उपमा - शेगडी वापरून
शेवई उपमा

Labels:
Upma, rava upma, Microwave upma

वरी तांदूळ - Vari Tandul Bhat

Vari Tandulacha Bhat in English

वेळ: १० ते १५ मिनीटे
वाढणी: २ ते ३ जणांसाठी

वरी तांदूळाचा भात शेंगदाण्याच्या आमटीबरोबर अतिशय सुरेख लागतो. शेंगदाणा आमटीच्या कृतीसाठी इथे क्लिक करा.
इतर संबंधित पाककृती : उपासाची बटाटा भाजी । उपासाच्या इतर पाककृती.

साहित्य:
३/४ कप वरी तांदूळ (उपासाची भगर)
अडीच कप गरम पाणी
१ टिस्पून तूप
१/४ टिस्पून जिरे
चवीपुरते मिठ

कृती:
१) पातेल्यात तूप गरम करावे, त्यात जिरे घालून थोडे तडतडू द्यावे. वरी तांदूळ घालून थोडावेळ परतावे.
२) तांदूळ जरासे गुलाबीसर झाले कि अडीच कप गरम पाणी घालावे. चवीनुसार मिठ घालून ढवळावे आणि पातेल्यावर झाकण ठेवून मंद आचेवर वरी तांदूळ शिजू द्यावा.

टीप:
१) वरी तांदूळ आपापल्या चवीनुसार बनवता येतो. काही जण प्लेन वरी तांदूळ बनवतात. ज्यामध्ये तूपात फक्त तांदूळ परतून मिठ घालून शिजवतात.
२) वरी तांदूळ शिजताना एखादे आमसुल घातल्यास छान आंबटसर चव येते.
३) जर एकदम मऊसर भगर (वरी तांदूळ) हवी असेल तर पाण्याचे प्रमाण पाऊण कपाने वाढवावे.

Labels:
vari Tandul, Bhagar, Samo seeds rice, fasting recipes,

वांगी बटाटा रस्सा - Vangi batata Rassa

Vangi Batata Rassa in English

२ ते ३ जणांसाठी
वेळ: २० ते ३० मिनीटे

साहित्य:
५-६ लहान जांभळी वांगी (टीप १ आणि ३)
२ मध्यम बटाटे
१ टेस्पून तेल
फोडणीचे साहित्य: १/८ टिस्पून मोहोरी, १/४ टिस्पून जिरे, चिमूटभर हिंग, १/४ टिस्पून हळद, १/२ टिस्पून लाल तिखट, २ कढीपत्ता पाने
१ ते दिड टेस्पून दाण्याचा कूट
१ टिस्पून काळा मसाला
१ टेस्पून चिंचेचा कोळ
१ टेस्पून गूळ
चवीपुरते मिठ
१ टेस्पून बारीक चिरलेली कोथिंबीर

कृती:
१) वांग्याची देठं काढून टाकावीत. आणि प्रत्येक वांग्याचे ८ लहान तुकडे करावे. गार पाण्यात घालून ठेवावेत. बटाटे सोलून त्याचे मध्यम चौकोनी तुकडे करावेत आणि दुसर्‍या गार पाण्याच्या वाडग्यात ठेवावे.
२) कढईत किंवा जाड बुडाच्या पातेल्यात तेल गरम करावे. त्यात मोहरी, जिरे, हिंग, हळद, लाल तिखट, आणि कढीपत्ता घालून फोडणी करावी. बटाट्याच्या फोडी पाण्यातून उपसून काढाव्यात आणि फोडणीत घालाव्यात. २ ते ३ मिनीटे व्यवस्थित परतून घ्याव्यात. थोडावेळ वाफ काढावी.
३) त्यात वांग्याच्या फोडी घालाव्यात. त्यात थोडे पाणी घालून मंद आचेवर वाफ काढावी. त्यात मिठ, चिंचेचा कोळ, आणि काळा मसाला घालून बटाटा आणि वांग्याच्या फोडी शिजू द्याव्यात. गरज लागल्यास थोडे पाणी घालावे.
४) बटाटा आणि वांग्याच्या फोडी शिजल्या नंतरच त्यात गूळ घालावा (टीप २). दाण्याचा कूट घालून उकळी काढावी.
गरमागरम रस्सा पोळी किंवा भाकरीबरोबर सर्व्ह करावा.

टीप:
१) जर लहान वांगी नाही मिळाली तर १ चायनीज वांगे वापरावे किंवा अर्धे मोठे वांगे (भरीताचे) वापरावे.
२) बटाटा आणि वांगे शिजल्यावरच त्यात गूळ घालावा, जर अगोदरच गूळ घातला तर बटाटा आणि वांगे आवठरतात आणि पटकन शिजत नाहीत.
३) कधी कधी मोठी वांगी घशाला खवखवतात, अशावेळी छोटी वांगी बरी पडतात.

भाज्यांचे इंस्टंट लोणचे - Instant vegetable Pickle

Instant Vegetable Pickle in English

साधारण दिड कप
वेळ: २० मिनीटे

साहित्य:
१ कप गाजराचे छोटे तुकडे
१/२ कप कॉलिफ्लॉवरचे एकदम छोटे तुकडे
१/४ कप मटाराचे दाणे
१ टिस्पून मिठ किंवा चवीनुसार
दिड टिस्पून लाल तिखट
१/२ टिस्पून हळद
१/४ टिस्पून हिंग
४ ते ५ मेथीचे दाणे
१/४ + १/४ टिस्पून मोहरी
१ लिंबाचा रस
२ टिस्पून तेल

कृती:
१) गाजर, कॉलिफ्लॉवर, मटार एकत्र करावेत. त्यात मिठ, लाल तिखट, हळद, हिंग, एकत्र करावे. १/४ टिस्पून मोहरीची भरडसर पावडर करून मिक्स करावी.
२) तेल गरम करून त्यात मेथी दाणे गुलाबी रंगावर तळून घ्यावे. मेथीदाणे बाजूला काढून त्याच तेलात १/४ टिस्पून मोहरी घालून फोडणी करावी. हि फोडणी गार झाली कि लोणच्यामध्ये घालावी.
३) तळलेले मेथीदाणे खलबत्त्यात कुटून घ्यावे आणि लोणच्यात मिक्स करावे.
४) लिंबाचा रस घालून मिक्स करावे.
हे लोणचे लगेच खाण्यासाठी छान लागते. फ्रिजमध्ये ४-६ दिवस सहज टिकते.

Label:
Instant vegetable pickle, Indian pickle recipe

वेजिटेबल सूप - Vegetable Coriander Soup

Vegetable Coriander Soup in English

वाढणी: प्रत्येकी साधारण १ कप (३ ते ४ जणांसाठी)

साहित्य:
२ टेस्पून किसलेले गाजर
२ टेस्पून कॉलीफ्लॉवर,एकदम बारीक चिरून
२ टेस्पून कोबी, एकदम बारीक चिरून
२ टिस्पून लसूण पेस्ट
२ टिस्पून तेल
३ टेस्पून कोथिंबीर, बारीक चिरून
४ टेस्पून पाती कांदयाची हिरवी पात बारीक चिरून
चवीपुरते मिठ
१/४ टिस्पून मिरपूड
१ टिस्पून विनेगर किंवा लिंबाचा रस
२ टेस्पून कॉर्न स्टार्च
४ कप पाणी
१ टिस्पून सोयासॉस (ऐच्छिक)

कृती:
१) कढईत तेल गरम करावे त्यात लसूण पेस्ट घालून गुलाबी रंग येईस्तोवर परतावी, जास्त ब्राऊन करू नये.
२) त्यात कॉलीफ्लॉवर, गाजर आणि कोबी घालून ३० ते ४० सेकंद मोठ्या आचेवर परतावे. नंतर ४ टेस्पूनपैकी २ टेस्पून कांद्याची पात घालून १० ते १५ सेकंद परतावे. लगेच ४ पैकी साडे तीन कप पाणी घालावे. चवीपुरते मिठ घालावे.
३) सूपला घट्टपणा येण्यासाठी आपण कॉर्न स्टार्च वापरणार आहोत. तेव्हा सूपला उकळी येईस्तोवर उरलेल्या १/२ कप पाण्यात २ टेस्पून कॉर्न स्टार्च निट मिक्स करून ते मिश्रण उकळत्या सूपमध्ये घालावे. घालताना सारखे ढवळावे म्हणजे गुठळ्या होणार नाहीत.
४) सूप १ ते २ मिनीट उकळू द्यावे म्हणजे कॉर्न स्टार्च कच्चा राहणार नाही. त्यानंतर गॅस बंद करून त्यात विनेगर आणि कोथिंबीर घालून ढवळावे. बोलमध्ये सर्व्ह करावे. सर्व्ह करताना वरून थोडी मिरपूड आणि पाती कांदा घालावा. तसेच १/४ टिस्पून सोयासॉसही घालू शकतो.

टीप:
१) या सूपमध्ये विनेगर जास्त चांगले लागते पण विनेगरचा वास आवडत नसेल तर लिंबाचा रसही वापरू शकतो.
२) सूपचा घट्टपणा अडजस्ट करण्यासाठी गरजेनुसार पाण्याचे प्रमाण कमीजास्त करावे.

Labels:
Coriander Soup, Vegetable Soup

चिंचकोळाचे वांग्याचे भरीत - Vangyache Bharit

Vangyache Bharit in English

वाढणी: २ जणांसाठी


साहित्य:
१/४ कप वांग्याचा गर (वांगे भाजून आणि सोलून घ्यावे. आतील गर मॅश करावा)
१ टेस्पून गूळ
२ टेस्पून चिंचेचा घट्ट कोळ
२ ते ३ टेस्पून कांदा बारीक चिरून
१ टेस्पून तिळाचा कूट (तिळ भाजून मिक्सरमध्ये भरडसर वाटणे)
१ टेस्पून तेल
१/८ टिस्पून मोहोरी (Know More - Facts and Benefits of Mustard Seeds)
१/४ टिस्पून जिरे
चिमूटभर हिंग
२ सुक्या लाल मिरच्या, तुकडे करावे
१/२ टिस्पून लाल तिखट
१ टिस्पून गोडा मसाला
चवीपुरते मिठ
२ टेस्पून कोथिंबीर, बारीक चिरून

कृती:
१) एका वाडग्यात १/४ कप गरम पाणी घ्यावे त्यात १ टेस्पून गूळ किंवा मध्यमसर गूळाचा खडा घालून कुस्करावे किंवा १० मिनीटे तसेच ठेवावे.
२) गूळ पाण्यात मिक्स झाला कि त्यात तिळकूट, गोडा मसाला, थोडे मिठ, कांदा, कोथिंबीर आणि वांग्याचा गर घालून छान मिक्स करावे. हे भरीत किंचीत पातळसर असते त्यामुळे गरजेनुसार पाणी घालावे.
३) कढल्यात तेल गरम करून त्यात मोहोरी, जिरे आणि हिंग घालून फोडणी करावी. गॅस बंद करून सुक्या मिरच्यांचे तुकडे घालावे. हि फोडणी भरीतावर घालावी. चिंचेचा कोळ घालून ढवळावे.
हे भरीत गारच खातात. मूग-तांदूळ खिचडी, मसालेभात किंवा भाकरीबरोबर हे भरीत उत्तम लागते.

टीप:
१) यामध्ये २ चमचे ताजा खोवलेला नारळ घातल्याच चव छान लागते.
२) आंबटपणा जास्त हवा असल्यास अजून थोडा चिंचेचा कोळ घालावा.

Labels:
Tamarind Eggplant Bharta, Baingan Bharta

व्हेजिटेबल सॅन्डविच - Veg Sandwich

Vegetable Sandwich (English Version)

वाढणी - १ सॅन्डविच




साहित्य:
२ ब्रेडचे स्लाईस
काकडीचे पातळ काप ६-७
टोमॅटोचे पातळ काप ५
शिजलेल्या बटाट्याचे पातळ गोल काप ४-५
कांद्याची पातळ चकती १-२
१ टेस्पून बटर
चिमूटभर काळे मिठ
:::::हिरवी चटणी::::
दिड कप कोथिंबीर
४-५ हिरव्या मिरच्या
१ टिस्पून जिरपूड
किंचीत साखर
चवीनुसार मिठ


कृती:
१) सर्वात आधी हिरवी चटणी बनवून घ्यावी. दिड कप कोथिंबीर, ४-५ हिरव्या मिरच्या, १ टिस्पून जिरपूड, चवीनुसार मिठ, साखर आणि थोडे पाणी एकत्र करून मिक्सरमध्ये बारीक वाटून चटणी करावी.
२) ब्रेडच्या कडा नको असतील तर काढून टाकाव्यात. दोन्ही ब्रेडच्या एका बाजूला आधी बटर आणि चटणी लावून घ्यावी.
३) एका ब्रेडवर आधी काकडीचे काप पसरून लावावेत. त्यावर टोमॅटोचे काप ठेवावेत. त्यावर काळे मिठ भुरभुरावे. त्यावर बटाट्याच्या चकत्या लावाव्यात, किंचीत मिठ पेरावे आणि त्यावर कांद्याची चकती ठेवावी. बटर आणि चटणी लावलेला ब्रेडचा स्लाईस यावर ठेवावा.
सुरीने तुकडे करावेत. हिरवी चटणी किंवा टोमॅटो सॉसबरोबर सर्व्ह करावे.

Labels:
vegetable sandwich, veg sandwich, quick and easy sandwich, sanwich recipe, sandvich recipe

मिनी उत्तप्पा - Mini Uttappa

Mini Uthappa (English Version)



साहित्य:
१/२ कप उडीद डाळ
सव्वा ते दिड कप तांदूळ
चवीपुरते मिठ
१ कांदा
१ टोमॅटो
१ टीस्पून मिरचीचा ठेचा (ऑप्शनल)
कोथिंबीर
१/२ वाटी तेल

कृती:
१) तांदूळ आणि उडीद डाळ पाण्यात साधारण ७-८ तास भिजत घालावे. नंतर मिक्सरमध्ये थोडे बारीक वाटून घ्यावे. मिश्रण एकदम पातळ किंवा घट्टं नसावे. मध्यमसरच वाटावे, त्यानुसार वाटताना पाणी घालावे. मिक्सरमध्ये डाळ व तांदूळ वाटताना १ चमचाभर मिठ घालावे.
२) वाटलेले मिश्रण आंबवण्यासाठी उबदार ठिकाणी किमान १०-१२ तास झाकून ठेवावे. जर वातावरण खुप थंड असेल तर ओव्हन २-३ मिनीटे प्रिहीट करून बंद करावा व मिश्रण झाकून ओव्हनमध्ये ठेवावे. तेवढ्या उबेवर पिठ आंबते. आवश्यकतेनुसार आंबवलेल्या पिठात मिठ घालावे.
३) पिठ आंबले कि कांदा पातळ आणि उभा चिरावा. कांद्याला थोडे मिठ चोळून घ्यावे. टोमॅटो बारीक चिरून घ्यावा.
४) नॉनस्टीक तवा गरम करावा. १/२ चमचा तेल घालावे. आंबवलेल्या पिठापैकी १ डाव पिठ तव्यावर घालून थोडे जाडसर पसरवावे. त्यावर चिरलेला कांदा, टोमॅटो, कोथिंबीर आणि आवडत असल्यास किंचीत मिरचीचा ठेचा लावावा.
५) मध्यम आचेवर तव्यावर झाकण ठेवून थोडी वाफ काढावी. एक बाजू शिजली कि सावकाशपणे कालथ्याने बाजू पलटावी कारण वरच्या बाजूवर आपण कांदा टोमॅटो घातले आहेत. दुसरी बाजू शिजू द्यावी. गरम गरम मिनी उत्तपा, सांबार आणि चटणीबरोबर सर्व्ह करावे.


टीप:
१) मसाला डोसा बनवताना जी बटाट्याची भाजी करतो ती भाजी, उत्तप्प्यावर कांदा टोमॅटो घालून एक वाफ काढली कि पसरवावी आणि हि बाजू शेकवावी. हा मसाला उत्तप्पाही मस्त लागतो.

Labels:
Mini Uttappa, Onion Uttappa, Tomato Uthappa, South Indian Recipe, Onion Tomato Uthappa

वरी तांदूळाची खांडवी - Vari Tandul Khandavi

Upavasachi Khandvi (English Version)


साहित्य:
१/२ कप वरी तांदूळ
१/२ कप किसलेला गूळ
दिड कप पाणी
२ चमचे तूप
१ लहान चमचा वेलची पूड
१/४ कप ओले खोबरे

कृती:
१) वरी तांदूळ पाण्याखाली धुवून निथळत ठेवावा. सर्व पाणी निघून जावू द्यावे.
२) पातेल्यात २ चमचे तूप गरम करून त्यावर हे तांदूळ थोडे भाजून घ्यावे. दुसर्‍या पातेल्या दिड कप पाणी उकळत ठेवावे.
३) भाजलेल्या तांदूळात उकळलेले पाणी घालून ढवळावे १-२ वेळा वाफ काढावी. कधी कधी तांदूळ सर्व पाणी शोषून कोरडे होतात त्यामुळे थोडे पाणी वाढवावे लागते. त्याची काळजी घ्यावी. वरी तांदूळ निट शिजले आहेत कि नाही हे चव घेऊन बघावे.
४) तांदूळात पाणी शोषले गेले कि गूळ, नारळ आणि वेलचीपूड घालावी व ढवळावे. १-२ वेळा वाफ काढावी. तूप लावलेली थाळी तयार ठेवावी. मिश्रण दाटसर झाले कि थाळीत घालून थापावे व १ सेंमी चा थर करावा.
वरून खवलेला नारळ घालावा व वड्या पाडाव्यात.

Labels:
Khandavi Recipe, Sweet Khandavi, Vari Tandul Khandavi, Bhagar khandavi, vari tandool khandavi

उपवासाचे घावन - Upavasache Ghavan

Upavasache Ghavan (English Version)



साहित्य:
१ वाटी वरी तांदूळ
१ वाटी साबुदाणे
२ हिरव्या मिरच्या
२ चमचे नारळाचा चव
२ चमचे दाण्याचे कूट
१ चमचा जिरे
चवीपुरते मिठ
साजूक तूप

कृती:
१) साबुदाणा आणि वरीतांदूळ एकत्र भिजवावे. पाण्याची पातळी साबुदाणा व वरीतांदूळ बुडून वरती २ इंच एवढी असावी. अशाप्रकारे दोन्ही ४-५ तास भिजवावे.
२) दोन्ही व्यवस्थित भिजल्यावर मिक्सरमध्ये वाटून घ्यावे. वाटतानाच त्यात मिरची, जिरे, खोबरे, दाण्याचा कूट, मीठ घालावे. आपण नेहमीच्या घावनाला जेवढे घट्ट भिजवतो तेवढेच घट्ट भिजवावे. म्हणजे त्या अंदाजाने मिक्सरमध्ये पाणी घालावे.
३) नॉनस्टीक तव्याला तूप लावून घ्यावे. एक डाव मिश्रण पातळसर पसरवावे. कडेने एक चमचा तूप सोडावे. एक वाफ काढावी. एक बाजू शिजली कि दुसरी बाजू निट होवू द्यावी.
गरम गरम घावन नारळाच्या चटणी सर्व्ह करावे.

टीप:
१) कधी कधी साबुदाणा चिकट असला तर वाफ काढल्याने घावन गदगदलेले होते आणि घावन कालथ्याने उलथायला सुद्धा त्रास होतो. म्हणून पहिल्या घावनाला वाफ काढून पाहावी. जर घावन चिकट होत असेल तर वाफ न काढता मध्यम आचेवर दोन्ही बाजू निट भाजून घ्याव्यात.
२) घावनात थोडीशी चिरलेली कोथिंबीर सुद्धा छान लागते.
3) मिरची आवडीनुसार कमीजास्त वापरावी.

चकली

Labels:
Fasting Recipes, Sabudana Ghavan, Sago Recipes, Fasting meal, Fasting food. Vari Tandul recipe, sabudana recipe

उकडीचे मोदक - Ukadiche Modak

Modak in English

Ukadiche modak is a sweet dumpling very much popular in Maharashtra and south India. Modak can be fried or steamed. Ukadiche Modak is a marathi word which means "Steamed modak". The filling is made of fresh coconut and jaggery, the cover is made of Rice flour.
Modak has a special importance in the worship of the Hindu elephant god, Ganesh. Modak is believed to be his favorite food and Ganesh worship ceremony pooja concludes with offering of 21 modaks to the deity.

साहित्य:
१ मोठा नारळ
किसलेला गूळ
२ कप तांदूळाचे पिठ
वेलचीपूड
मिठ
तांदूळाच्या उकडीत घालण्यासाठी तेल, तूप

कृती:
१) सारण बनवण्यासाठी नारळ खवून घ्यावा. प्रमाणासाठी एक स्टीलची वाटी घ्यावी. जितकया वाट्या खवलेला नारळ असेल त्याच्या निमपट किसलेला गूळ घ्यावा. (उदाहरणार्थ २ वाटीभर नारळाचा चव त्यासाठी १ वाटी किसलेला गूळ).पातेल्यात खवलेला नारळ आणि गूळ एकत्र करून मंद आचेवर ढवळत राहावे. गूळ वितळला कि वेलची पूड घालावी. ढवळून बाजूला ठेवून द्यावे.
२) आवरणासाठी तांदूळाची उकड करण्यासाठी नेहमी जितके पिठ तितके पाणी असे प्रमाण घ्यावे. २ कप तांदूळ पिठासाठी २ कप पाणी गरजेचे असते. जाड पातेल्यात २ कप पाणी उकळवत ठेवावे. त्यात १ चमचा तेल किंवा तूप घालावे. चवीसाठी थोडे मिठ घालावे. गॅस बारीक करून पिठ घालावे. कालथ्याच्या मागच्या दांडीने ढवळावे, काहीवेळा कालथ्याच्या अग्रभागाने मिक्स केल्यास पिठाचे गोळे राहतात. मध्यम आचेवर २-२ मिनीटे २-३ वेळा वरती झाकण ठेवून वाफ काढावी. गॅसवरून उतरवून ५ मिनीटे झाकून ठेवावे.
३) परातीत तयार उकड काढून घ्यावी. हि उकड व्यवस्थित मळून घ्यावी लागते. त्यासाठी बाजूला वाडग्यात कोमट पाणी आणि वाटीत थोडे तेल घ्यावे. उकड मळताना तेल आणि थोडे पाणी लावून मऊसर मळून घ्यावी.
४) उकड व्यवस्थित मळून झाली कि त्याचे सुपारीपेक्षा थोडे मोठे गोळे करून त्याची पारी तयार करावी. त्यात एक चमचाभर सारण भरून बोटाने पारीच्या चुण्या कराव्यात आणि सर्व चुण्या एकत्र आणून मोदक बंद करावा.
५) जर मोदकपात्र उपलब्ध असेल तर पात्रात पाणी उकळत ठेवावे .त्यातील चाळणीत स्वच्छ धुतलेले सुती कापड ठेवून किंवा प्लास्टीकची जाड शिट ठेवून त्यावर मोदक ठेवावेत. वरून झाकण लावून १०-१२ मिनीटे वाफ काढावी.
६) जर मोदकपात्र उपलब्ध नसेल तर मोदकांना वाफवण्यासाठी उपलब्ध असलेल्या चाळणीपेक्षा मोठ्या तोंडाचे जाड बुडाचे पातेले घ्यावे. त्यात ३-४ भांडी पाणी उकळावे. मोठे भोक असलेल्या स्टीलच्या किंवा अल्युमिनीयमच्या चाळणीत स्वच्छ सुती कापड ठेवून किंवा प्लास्टीकची जाड शिट ठेवून त्यावर मोदक ठेवावेत. एकावर एक मोदक ठेवू नयेत. त्यामुळे मोदक फुटण्याचा संभव असतो. जेवढे मावतील तेवढेच मोदक ठेवावेत. पातेल्यातील पाणी उकळले कि मिडीयम हाय गॅसवर पातेल्यात कूकरचा डबा ठेवावा त्यावर मोदकांची चाळण ठेवावी. पाणी मोदकांच्या तळाला स्पर्शेल एवढे असले पाहिजे. वरून झाकण ठेवून १२-१५ मिनीटे वाफ काढावी.
७) जर मोदक केल्यावर तांदूळाची उकड उरली असेल तर त्यात मिरची, मिठ, जिरे, हिंग, हळद, थोडी चिरलेली कोथिंबीर घालून मळून घ्यावी आणि त्याच्या गोल छोट्या चपट्या पुर्या करून शेवटचे मोदक वाफवताना त्यातच या निवगर्या वाफवून घ्याव्यात.
गणपती बाप्पाला याचा नैवेद्य दाखवून साजूक तूप घालून गरमागरम मोदक खावेत.

टीप:
१) आवडत असल्यास सारणात काजू-बदामाचे पातळ काप घालू शकतो.



चकली

Labels:
Sweet Dumplings, Marathi Modak, Ganapati Naivadya Sweet Coconut, Steamed Dumpling, Ganesh Chaturthi, Ganeshostav, Naivedyam, Indian Food, Indian Sweets

वांग्याची भजी - Vange Bhaji

Vangyachi Bhaji (English Version)



साहित्य:
१ वांगे
1/२ कप बेसन पिठ
१ टेस्पून तांदूळ पिठ
१/२ टिस्पून हळद
१ टिस्पून तिखट
१/४ टिस्पून जिरे
चवीपुरते मिठ
तळण्यासाठी तेल

कृती:
१) वांग्याचे गोल पातळ काप करावे. मिठाच्या पाण्यात काप १० मिनीटे घालावेत.
२) बेसन पिठात पाणी घालून गुठळ्या न होता नेहमी बटाटे वड्याला जितके घट्ट भिजवतो त्यापेक्षा थोडे पातळ भिजवावे, ज्यामुळे वांग्याच्या कापांना बेसनाचे कमी आवरण होईल आणि थोडा कुरकूरीतपणा येईल.
३) बेसनाच्या पिठात तांदूळ पिठ, लाल तिखट, जिरे, मिठ, हळद घालावे. जर उपलब्ध असेल तर थोडा ओवा, चिरलेली कोथिंबीर घालावी.
४) कढईत तेल गरम करावे. बेसन पिठात वांग्याचे काप बुडवून तळून काढावेत. हिरवी चटणी किंवा लसणीच्या चटणीबरोबर गरम गरम भजी खावी.

Labels:
Eggplant Recipe, Eggplant Fritters, Eggplant Pakoda, Vangyachi Bhajji, Maharashtrian Eggplant recipe, Spicy Eggplant bhaji, Pakoda

व्हेजी रॅप्स - Veggie Wraps

Veggie Wraps (English Version)

व्हेजी रॅप्स म्हणजे माझा आवडता आणि पौष्टीक असा मधल्या वेळी खायचा पदार्थ !!! हे व्हेजी रॅप्स चविष्ट आणि तेलविरहित (oil Free) तर आहेतच पण पटकन होणारे सुद्धा आहेत.. जरूर करून बघा.

साहित्य:
२ गव्हाच्या पोळया (चपात्या)
१ लहान कांदा उभा बारीक चिरून
३ काड्या पाती कांदा बारीक चिरून
१ लहान टोमॅटो बारीक चिरून
१ लहान सोललेली काकडी
अर्धी वाटी भोपळी मिरची
अर्धी वाटी चिरलेली कोथिंबीर
अर्धी वाटी चिरलेली पुदीन्याची पाने
२ वाट्या घट्ट दही (घोटलेले) (NonFat Yogurt)
१ चमचा लिंबाचा रस
१ हिरवी मिरची
२ चिमटी मिरपूड
१ चिमूटभर चाटमसाला (ऑप्शनल)
मीठ

कृती:
१) प्रथम कांदा तेल न घालता फ्राईंग पॅनमध्ये परतून घ्यावा. जरा रंग बदलला कि बाजूला काढून ठेवावा. काकडी सोलून गोल चकत्या कराव्यात. भोपळी मिरचीचे अगदी बारीक तुकडे करावेत.
२) घोटलेल्या घट्ट दह्यात मिरपूड, कोथिंबीर, पुदीना, लिंबाचा रस, मिरच्या, मिठ, घालून ढवळून घ्यावे.
३) तयार पोळ्या तव्यावर गरम कराव्यात. ताटलीमध्ये काढून त्यावर प्रथम दह्याचे तयार केलेले मिश्रण चमच्याने पसरावे, त्यावर सर्व भाज्या घालाव्यात. वरून थोडे मिठ पेरावे. हवा असल्यास चाट मसाला घालावा आणि गुंडाळी करून गरम गरम खावे.

टीप:
१) शक्यतो पोळ्या आकाराने लहान असाव्यात. जर आकार मोठा असेल तर व्हेजी रॅप्स मधून कट करावा.
२) जर आदल्या दिवशीच्या पोळ्या उरल्या असतील तर त्या संपवण्यासाठी व्हेजी रॅप्स हा चांगला पर्याय आहे.
३) वरील दिलेल्या भाज्यांबरोबर कोबीची पाने, लेट्युस, किसलेले गाजर अशा भाज्यासुद्धा घालून व्हेजी रॅप्स अजून पौष्टीक बनवता येवू शकतो.

Labels:
veggie wraps, oil free wraps, healthy vegetable wraps

वेजिटेबल स्टॉक - Vegetable stock

Vegetable Stock
१) रेडिमेड वेजिटेबल स्टॉक कॅन कोणत्याही सुपरमार्केट मध्ये उपलब्ध असतो.
२) जर वेजिटेबल स्टॉक घरी बनवायचा असेल तर घरात उपलब्ध पालेभाज्या, गाजराचे तुकडे, पाती कांदा, सेलरी चिरून पाण्यात टाकून फ्लेवर येईस्तोवर (अंदाजे ९-१० मिनीटे) उकळवाव्यात. ते पाणी गाळून वापरावे.
३) बाजारात ’Knorr’, ’maggi'...इत्यादींचे ”vegetable Bouillon" किंवा "vegetable stock" क्युब्सच्या स्वरूपात उपलब्ध असतात. त्यातील एक क्युबपासून अंदाजे २ मोठे कप स्टॉक बनतो. २ कप पाणी गरम करावे. त्यात एक क्युब घालून क्युब विरघळेस्तोवर उकळावे.
४) पालेभाज्यांच्या उरलेली देठं (कडवट भाज्या सोडून) तसेच इतर भाज्यांचे तुकडे पाण्यात उकळवूनही स्टॉक बनवता येतो.

Labels:
Vegetable Stock, How to make vegetable stock, homemade vegetable stock, healthy vegetable stock