अळूचं फदफदं - Aluchi Patal Bhaji

Aluchi Patal Bhaji in English



वेळ: २५ मिनिटे

वाढणी: ७ ते ८ मध्यम वाट्या (३ ते ४ जणांसाठी)



साहित्य:

७ ते ८ अळूची मध्यम पाने

३ ते ४ टेस्पून शेंगदाणे

२ ते ३ टेस्पून चणा डाळ

फोडणीसाठी: १ टेस्पून तेल, २ चिमटी मोहोरी, १/८ टीस्पून हिंग, १/४ टीस्पून हळद, १/४ टीस्पून लाल तिखट

३ टेस्पून बेसन

१ टीस्पून चिंच

२ टीस्पून गोडा मसाला

२ टीस्पून गूळ

चवीपुरते मीठ



कृती:

१) शेंगदाणे आणि चणा डाळ किमान २ तास पाण्यात भिजत घालावी. नंतर प्रेशर कुकरमध्ये १ किंवा २ शिट्ट्या करून शिजवून घ्यावे.

२) चिंच १/२ कप पाण्यात १० मिनिटे भिजत ठेवावी. नंतर चिंच कुस्करून कोळ काढून घ्यावा.

३) अळूची पाने धुवून पुसून घ्यावी. देठं वेगळी काढावीत आणि सोलून घ्यावीत. नंतर पानं बारीक चिरून घ्यावी. देठंही चिरून घ्यावीत.

४) कढईत तेल गरम करून मोहोरी, हिंग, हळद, तिखट घालून फोडणी करून घ्यावी. यात चिरलेली अळूची पाने आणि देठं घालावीत. १/२ टीस्पून मीठही घालावे. झाकण ठेवून ६ ते ७ मिनिटे शिजवावे. अळू जर कोरडा वाटत असेल तर थोडे पाणी शिंपडावे.

५) चिंचेचा कोळ घालून अजून ३-४ मिनिटे शिजू द्यावे. १/२ कप पाण्यात २ टेस्पून बेसन गुठळी न होता मिक्स करून घ्यावे.हे मिश्रण कढईत घालून ढवळावे.

६) यात शिजवलेली चणा डाळ आणि शेंगदाणे घालावे. गरजेनुसार थोडे पाणी घालावे. (भाजी पळीवाढी करावी, प्रचंड घट्टही नको आणि पातळही नको.)

७) गोडा मसाला, गूळ, आणि लागल्यास मीठ घालून मिक्स करावे. बेसन शिजेस्तोवर उकळी काढावी.

गरमागरम तूप भाताबरोबर किंवा भाकरीबरोबर सर्व्ह करावे.



टीपा:

१) अळूची पाने फोडणीला टाकून मग शिजवण्याऐवजी आधी प्रेशर कुकरमध्ये शिजवली तरीही चालतात. चिरलेली पाने शिजवून मग फोडणीस टाकावी.

२) पारंपारिक पद्धतीनुसार या भाजीत आंबट चुका आणि मुळा घालतात. आवडत असल्यास १/४ ते १/२ कप बारीक चिरलेला आंबट चुका अळूबरोबरच फोडणीला टाकावा. याला चव फार आंबट असते त्यामुळे जर आंबट चुका वापरणार असाल तर चिंच घालू नये. आणि घातल्यास आधी चव पाहून मगच घालावी. तसेच १/२ मुळा बारीक चिरून फोडणीस घालावा.

३) ओल्या नारळाच्या पातळ चकत्या शेंगादाण्याबरोबर घालाव्यात.

४) तिखट मीठ गुळ चिंच आणि गोड मसाला आवडीप्रमाणे कमी किंवा जास्त करावा. पण या भाजीला मसाले आणि आंबट गोडपणा थोडा पुढे असल्यास भाजी लज्जतदार लागते.

Aluchi patal Bhaji

Aluchi Bhaji in Marathi



Time: 25 minutes

Yield: 7 to 8 small bowls (enough for 3 to 4 persons)



Ingredients:

7 to 8 Alu Leaves, medium size (Colacasia/Taro leaves)

3 to 4 tbsp Peanuts

2 to 3 tbsp Chana dal

For tempering: 1 tbsp oil, 2 pinches mustard seeds, 1/8 tsp hing, 1/8 tsp turmeric powder, 1/4 tsp red chili powder

3 tbsp besan

1 tsp tamarind

2 tsp Goda masala

2 tsp jaggery

Salt to taste



Method:

1) Soak peanuts and chana dal for 2 hours. Then pressure cook upto 1 or 2 whistles.

2) Soak tamarind in 1/2 cup warm water for 10 minutes. Squeeze the tamarind and extract the juice.

3) Wash and pat dry alu leaves. Separate the stems and peel them. Finely chop the leaves and peeled stems.

4) Heat oil in a kadai. Prepare tadka by adding mustard seeds, hing, turmeric powder and red chili powder. Add chopped Alu leaves and chopped stems. Add 1/2 tsp salt. Cover and cook for 6 to 7 minutes to soften the alu leaves. Sprinkle little water if alu leaves become dry.

5) Add tamarind juice and cook for another 3 to 4 minutes. Mix 1/2 cup water and 3 tbsp besan in a bowl without any lumps. Add this mixture to kadai and mix well.

6) Add cooked chana dal and peanut. Add water to adjust the consistency (not too thick not too thin).

7) Add goda masala, jaggery, little salt. Boil till besan cooks.

Serve hot with white rice or Millet roti (bhakari)



Notes:

1) Chopped Alu leaves can be pressure cook to save time.

2) Traditionally, Ambat Chuka (green sorrel) is used to give sour taste to this curry. If you want, you may use 1/4 to 1/2 cup of chopped ambat chuka. But then, do not add tamarind or add in very little amount after checking the taste. Otherwise, curry would taste very sour.

Additionally, 1/2 small raddish can be use.

3) Fresh coconut slices can be added alongwith peanuts.

4) Adjust the seasoning according to your taste

मलाई कोफ्ता - Malai Kofta

Malai Kofta in English

वेळ: साधारण दीड तास
३ जणांसाठी

साहित्य:
कोफ्ता आवरणासाठी:
३ मध्यम बटाटे
२ टेस्पून कॉर्न फ्लोर
चवीपुरते मीठ (१/४ चमचा)
तळणीसाठी तेल
सारणासाठी:
१/२ कप किसलेले पनीर
२ चिमटी मीठ
१/२ टीस्पून साखर
१ हिरवी मिरची, बारीक चिरून
२५ बेदाणे
२ टीस्पून बारीक चिरलेली कोथिंबीर
ग्रेव्हीसाठी:
१ मोठा पांढरा कांदा, मधोमध अर्धा चिरून सोलून घ्यावा
२ टीस्पून बटर
२ हिरव्या मिरच्या
३ मोठ्या लसणीच्या पाकळ्यांची पेस्ट
१/२ टीस्पून आलेपेस्ट
अख्खा गरम मसाला:- २ तमालपत्र, २-३ लवंग, ३ मिरी दाणे, १ लहान दालचीनी, २ वेलची
२ टेस्पून दाटसर काजूपेस्ट
१/२ कप हाफ अँड हाफ (टीप ५)
चवीपुरते मीठ
कृती:
कोफ्ता:
१) बटाटे उकडून घ्यावेत. सोलून व्यवस्थित मॅश करून घ्यावेत. गुठळी अजिबात राहू देवू नये. यामध्ये २ टेस्पून कॉर्न फ्लोर आणि चवीपुरते मीठ घालून माळून घ्यावे. या मिश्रणाचे साधारण ८ समान भाग करावेत.
२) सारणाचे सर्व जिन्नस एकत्र करून मिक्स करावे. याचेही ८ समान भाग करावेत.
३) बटाट्याचे मिश्रण घेउन हातानेच चपटे करून परी तयार करावी (साधारण अडीच ते ३ इंच). मधोमध सारण ठेवून सर्व कडा एकत्र आणाव्यात आणि सीलबंद करावे. अशाप्रकारे सर्व कोफ्ते तळण्यासाठी तयार करावेत. कोफ्त्याचा सरफेस एकदम स्मूथ असावा. भेग पडली असेल तर नीट बंद करावी. कारण तळताना सारण बाहेर येउन कोफ्ता फुटतो.
४) सर्व कोफ्ते मध्यम आचेवर गोल्डन रंगावर तळून घ्यावे. टिपकागदावर काढून ठेवावे.
ग्रेव्ही:
५) कांदा उकडून घ्यावा. (मी प्रेशर कुकरमध्ये २ शिट्ट्या करून कांदा उकडला होता). उकडलेल्या कांद्याची बारीक पेस्ट करावी.
६) पॅनमध्ये बटर गरम करून त्यात अख्खे गरम मसाले घालावेत. नंतर हिरवी मिरची आणि आलेलसूण पेस्ट घालावी. १५ सेकंद परतावे. आता कांद्याची पेस्ट आणि मीठ घालून हाय हिटवर परतावे. जोवर रंग किंचित गुलाबी होईतोवर सतत ढवळावे.
७) काजू पेस्ट घालावी. तळापासून ढवळत राहावे, कारण काजू पेस्ट तळाला चिकटू शकते. किंचित पाणी घालावे. झाकण ठेवून काजूचा कच्चट वास जाईस्तोवर मध्यम आचेवर शिजवावे (३ ते ४ मिनिटे) (टीप)
८) आच एकदम कमी करावी आणि उष्णता थोडी कमी होईस्तोवर थांबावे. आता हाफ अँड हाफ घालून जोरजोरात ढवळावे. कारण कांदा आणि मीठ यामुळे हाफ अँड हाफ फुटण्याची शक्यता असते. एकदा का व्यवस्थित मिक्स झाले कि आच मिडीयम वर ठेवावी आणि काही मिनिटे शिजवावे.
कोफ्त्यावर हि गरमागरम ग्रेव्ही घालून लगेच सर्व्ह करावे.

टीपा:
१) स्टेप ७ मध्ये, काजूपेस्ट व्यवस्थित शिजल्यावर मी अख्खे गरम मसाले काढून टाकले होते. नंतर हि ग्रेव्ही एकदा मिस्करमध्ये बारीक केली ज्यामुळे ती एकदम स्मूथ झाली. हि ग्रेव्ही मी परत पॅनमध्ये घेतली आणि स्टेप ८ फॉलो केली.
२) बटाटे व्यवस्थित मॅश करावेत. गुठळी राहिली तर कोफ्ते गरम तेलात फुटण्याची शक्यता असते.
३) जर गरम मसाला किवा इतर कुठलाही मसाला घातल्यास ग्रेव्हीचा रंग बदलेल. म्हणून अख्खे गरम मसाले वापरले आहेत, ज्यामुळे ग्रेव्हीला मसाल्यांचा हलकासा स्वाद येतो आणि ग्रेव्हीचा रंगही बदलत नाही.
४) सारणामध्ये काजू बदाम पिस्ता यांचे तुकडे घालू शकतो.
५) हाफ अँड हाफ म्हणजे १ भाग क्रीम आणि १ भाग दुध (होल मिल्क) यांचे मिश्रण.

सोया मेथी मटार - Soya Methi matar

Soya Methi Malai in English

वेळ: ४० मिनीटे
वाढणी: ३ जणांसाठी

साहित्य:
दीड कप मेथीची पाने, बारीक चिरून (महत्त्वाची टीप क्र १)
पाउण कप सोया चंक्स
१/२ कप मटार (फ्रोझन)
फोडणीसाठी १ टेस्पून तेल, २ चिमटी जिरे, १/८ टीस्पून हळद, १ टीस्पून आले-मिरचीची पेस्ट, १ टीस्पून लाल तिखट
२ टीस्पून किचन किंग मसाला
१/४ ते १/२ कप हेव्ही क्रीम
चवीपुरते मीठ
सजावटीसाठी २ टेस्पून बारीक चिरलेला टोमेटो

कृती:
१) मेथी धुवून बारीक चिरून घ्यावी. सोया चंक्स गरम पाण्यात ५ मिनिटे भिजवून ठेवावेत. गरम पाणी काढून टाकावे आणि गार पाणी घालावे. २ मिनिटानंतर सोया चंक्स हाताने घट्ट पिळून घ्यावे. हे सोया चंक्स सुरीने थोडे लहान तुकडे होतील इतपत बारीक करावे.
२) कढईत तेल गरम करावे. त्यात जिरे आणि आले-मिरचीची पेस्ट घालून थोडावेळ परतावे. नंतर कांदा, हळद, लाल तिखट, आणि २ चिमटी मीठ घालावे. कांदा लालसर होईस्तोवर परतावे.
३) मटार घालून २ मिनिटे परतावे. नंतर सोया चंक्स आणि मेथीची घालून परतावे. २ मिनिटे झाली कि किचन किंग मसाला घालावा. आता मेथी कोरडी होईस्तोवर झाकण न ठेवता परतावे. चव पाहुन मीठ आणि इतर मसाले लागतील तसे घालावे.
४) मेथी शिजली कि आच एकदम कमी करावी. आणि गरजेनुसार हेव्ही क्रीम घालावे आणि ढवळावे म्हणजे क्रीम फुटणार नाही. आच एकदम कमी असावी.
क्रीम घातल्यावर जास्त उकळवू नये त्यामुळे क्रीम भाजीत फुटण्याचा संभव असतो.
गरमागरम भाजी तोमतो ने सजवून पोळी किंवा रोटी/नान बरोबर सर्व्ह करावी.

टीपः
१) मेथीचा कडवटपणा कमी करायचा असेल तर चिरलेली मेथी मिठाच्या पाण्यात थोडावेळ भिजवून ठेवावी. नंतर पिळून काढावी आणि वापरावी. पण यामध्ये जीवनसत्वांचा नाश होतो. त्यामुळे कडवटपणा अगदीच नको असेल तर हि पद्धत अवलंबावी.
२) सोया चंक्स ऐवजी सोय ग्रानुअल्स वापरले तरीही चालतील.
३) या भाजीत जर मटार घालायचे नसतील तर फक्त सोया चंक्स आणि मेथी अशी सुद्धा भाजी करता येईल.
४) किचन किंग मसाल्या ऐवजी गरम मसाला वापरला तरीही छान चव येते. फक्त थोडा कमी मसाला घालावा.

काश्मिरी दम आलू - Kashmiri Dum Aloo

Kashmiri Dum Aloo in English

वेळ: साधारण १ तास
वाढणी: ३ ते ४ जणांसाठी

साहित्य:
१५ ते १८ लहान बटाटे (टीप)
१/२ कप कांदा, बारीक चिरून
१ कप टोमॅटो, बारीक चिरून
१/२ इंच आल्याचा तुकडा, बारीक चिरून
४ ते ६ मोठ्या लसूण पाकळ्या, बारीक चिरून
२ टेस्पून काजूची पूड
४ टेस्पून दही, फेटून
१/२ टिस्पून सुंठ पावडर, १ टिस्पून बडीशेप पावडर, २ चिमटी लवंग पावडर
१ टिस्पून धणेपूड
१/२ टिस्पून जिरेपूड
१ टिस्पून गरम मसाला
२ टिस्पून काश्मिरी लाल तिखट (टीप)
१ टिस्पून साधं लाल तिखट
१/४ टिस्पून हळद
चवीपुरते मिठ
३ टेस्पून तेल
तळणासाठी तेल
कृती:
१) बटाटे धुवून घ्यावेत. पातेल्यात मिठाचे पाणी उकळवावे. त्यात हे बटाटे सोडून १० मिनीटे झाकण ठेवून किंचीत शिजू द्यावे, जेणेकरून वरचे साल काढता येईल. १० मिनीटांनी पातेल्यातील गरम पाणी काढून गार पाणी सोडावे. आणि बटाट्याचे साल काढून घ्यावे.
२) कढईत तेल गरम करून त्यात बटाटे मिडीयम हाय आचेवर गोल्डन ब्राऊन तळून घ्यावे. खुप भरभर तळून काढू नये. नाहीतर बटाटे बाहेरून ब्राऊन होतात आणि आतून शिजत नाहीत. तळलेले बटाटे टिपकागदावर काढून घ्यावेत. काट्याने किंचीत टोचून घ्यावे, म्हणजे ग्रेव्हीमध्ये घातल्यावर आतपर्यंत ग्रेव्ही मुरेल.
३) कढईत २ चमचे तेल गरम करून त्यात आले लसूण परतावे. कांदा घालून लालसर होईस्तोवर परतावे. साधं लाल तिखट, काजूची पूड आणि टोमॅटो घालावा.मिठ घालून टोमॅटो अगदी नरम होईस्तोवर परतावे. हा मसाला थोडा गार होवू द्यावा. नंतर थोडे पाणी घालून मिक्सरमध्ये एकदम बारीक वाटून घ्यावे.
४) त्याच कढईत १ चमचा तेल घालून हळद आणि काश्मिरी लाल तिखट घालावे. त्यावर कांदा-टोमॅटोची प्युरी घालावी. प्युरी उकळायला लागली कि त्यात सुंठ पावडर, बडीशेप पावडर, लवंग पावडर, धणेपूड, जिरेपूड, गरम मसाला घालून मिक्स करावे.
५) दही घालण्यापूर्वी ५ मिनीटे आच एकदम कमी करावी. नंतर दही घालून भराभर मिक्स करावे म्हणजे दही फुटणार नाही. अंडं फेटायला जे beater वापरतो त्याने मिक्स करावे म्हणजे दही व्यवस्थित मिक्स होईल.
६) दही निट मिक्स झाले कि तळलेले बटाटे घालावेत आणि झाकण ठेवून १५ मिनीटे ग्रेव्ही आटू द्यावी. मधेमधे झाकण काढून ढवळावे म्हणजे ग्रेव्ही तळाला चिकटणार नाही.
गरजेइतका दाटपणा येऊ द्यावा. ग्रेव्ही भातावर किंवा पोळीबरोबर उत्तम लागते.

टीपा:
१) जर लहान बटाटे नसतील बटाट्याचे मोठे तुकडे करून वरीलप्रमाणेचे वापरता येतील.
२) काश्मिरी तिखट रंग येण्याकरता घातले आहे. या मिरची पावडरला तिखटपणा नसतो म्हणून नेहमीच्या वापरातील लाल तिखटही घालावे.

खोया पनीर मटर - Khoya paneer Matar

Khoya matar Paneer in English

वेळ: ३५ ते ४० मिनीटे
वाढणी: २ ते ३ जणांसाठी


साहित्य:
३/४ कप मटार (फ्रोझन)
३/४ कप खवा, भाजलेला
१५० ग्राम पनीर, लहान चौकोनी तुकडे (टीप १)
३/४ कप टोमॅटो प्युरी,
१/२ कप दुध/ पाणी
१ टिस्पून तूप
१ लहान आल्याचा तुकडा, बारीक किसून
१/२ टिस्पून लाल तिखट
१/२ टिस्पून जिरे (ऐच्छिक)
१ टिस्पून धणेपुड
१/२ टिस्पून जिरेपूड
७ ते ८ काजू बी, (थोडे सजावटीसाठी ठेवावे)
१ टेस्पून बेदाणे + अजून थोडे सजावटीसाठी
१ टिस्पून साखर
चवीपुरते मिठ
अख्खा गरम मसाला= १ तमाल पत्र, २ लवंगा, ३ ते ४ मिरीदाणे, २ हिरवी वेलची, १ लहान दालचिनीची काडी किंवा १/२ टिस्पून दालचिनी पावडर

कृती:
१) कढई गरम करून त्यात आख्खे गरम मसाले हलके भाजून घ्यावे. भाजले गेल्यावर लवंगा फुगतात आणि वेलची फुगून फुटते. हे सर्व मसाले कुटून घ्यावे किंवा मिक्सरमध्ये बारीक करावे.
२) कढईत तूप गरम करावे. त्यात काजू, जिरे, आलं आणि टोमॅटो प्युरी घालावी. कढईवर झाकण ठेवून २-३ मिनीटे शिजू द्यावे.
३) भाजलेला खवा घालून मिक्स करावे. जमतील तेवढ्या गुठळ्या फोडाव्यात. तरी, बारीक बारीक गुठळ्या आणि रवाळ टेक्स्चर अपेक्षित आहे. चांगले मिळून येईस्तोवर परतावे (३-४ मिनीटे)
४) आता मटार आणि दुध/ पाणी घालावे. मिक्स करून झाकण ठेवावे व ४-५ मिनीटे शिजू द्यावे.
५) धणे-जिरेपूड, साखर, लाल तिखट, बेदाणे आणि मिठ घालून मिक्स करावे. २-३ मिनीटे उकळी काढावी.
६) शेवटी पनीर घालून १-२ मिनीटे उकळी काढावी.
गरमच सर्व्ह करावी.

टीपा:
१) जेव्हा विकतचे पनीर वापरत असाल तेव्हा पनीरचे लहान चौकोनी तुकडे करावेत. गरम पाण्यात २ मिनीटे बुडवून ठेवावेत. पनीर छान मऊसुत होईल आणि तळायला लागणार नाही.
२) जर टोमॅटोला आंबटपणा नसेल तर थोडीशी आमचूर पावडर घालावी.
३) दुध घातल्यावर ग्रेव्ही व्यवस्थित मिक्स करावी नाहीतर दुध फुटते आणि ग्रेव्ही चोथापाणी होते.
४) जर दालचिनी पावडर वापरणार असाल तर ती इतर मसाल्यांबरोबर भाजू नये, भाजल्यास करपते. म्हणून धणे-जिरेपूड बरोबर दालचिनी पावडर भाजीत घालावी.

मेथी पनीर - Methi Paneer

Methi Paneer in English

वाढणी: २ ते ३ जणांसाठी
वेळ: २५ ते ३० मिनीटे


साहित्य:
१ मोठी जुडी मेथी, पानं खुडून धुवून घ्यावी.
१५० ग्राम पनीर, लहान तुकडे (टीप)
१ लहान कांदा, पातळ उभा कापून
१ मध्यम टोमॅटो, मध्यमसर चौकोनी तुकडे
१/२ इंच आलं
३ ते ४ मोठ्या लसूण पाकळ्या, चिरून
२ ते ४ काळी मिरी
१ टेस्पून दही
१/२ कप क्रिम (टीप)
फोडणीसाठी: १ + १ टेस्पून तेल, चिमूटभर हळद
१ टिस्पून धणे पावडर
चवीपुरते मिठ

कृती:
१) १ टेस्पून तेल पॅनमध्ये गरम करावे. त्यात काळी मिरी, आले, लसूण आणि कांदा घालावा. कांदा लालसर होईस्तोवर परतावे. आता चिरलेला टोमॅटो घालून मऊ होईस्तोवर शिजवावा. गॅस बंद करून हे मिश्रण थंड होवू द्यावे. थंड झाले कि पाणी न घालता प्युरी करून घ्यावी.
२) मेथीची पाने बारीक चिरून घ्यावी. १ टेस्पून तेल पॅनमध्ये गरम करावे. हळद आणि मेथी घालावी बरोबर २-३ चिमटी मिठही घालावे. झाकण न ठेवता मेथी परतावी.
३) मेथीतील पाण्याचा अंश निघून कोरडी झाली कि कांदा-टोमॅटोची प्युरी आणि दही घालावे. निट ढवळून थोडावेळ शिजू द्यावे. धणेपुड आणि गरजेपुरते मिठ घालावे, मिक्स करावे.
४) गॅस अगदी मंद करावा (टीप). पनीर आणि क्रिम घालावे. तसेच लागल्यास थोडे पाणी घालून ढवळावे. खुप पाणी घालू नये कारण मिश्रण जास्त उकळवायचे नाहीये, फक्त खुप घट्ट वाटल्यासच पाणी घालावे.
तयार भाजी पोळी, नान बरोबर सर्व्ह करावी.

टीप्स:
१) रेडीमेड पनीर वापरत असाल तर पनीरचे लहान चौकोनी तुकडे करून गरम पाण्यात २-३ मिनीटे बुडवून ठेवावे. यामुळे पनीर नरम होते.
२) जर क्रिम उपलब्ध नसेल तर, १/२ कप मिल्क पावडर १/४ कप पाण्यात मिक्स करून वापरली तरीही चालेल.
३) गॅसची आच एकदम मंद करूनच क्रिम भाजीत घालावे तसेच एकदा क्रिम घातले कि भाजी जास्तवेळ गरम करू नये. यामुळे क्रिम भाजीत फुटते.

भोगीची भाजी - Bhogi Bhaji

Bhogichi Bhaji in English

वेळ: पूर्वतयारी २० मिनीटे । पाकृसाठी: १५ ते २० मिनीटे
वाढणी: ३ ते ४ जणांसाठी

साहित्य:
१ मोठा बटाटा, सोलून मध्यम फोडी (साधारण १ ते दिड कप)
१ मध्यम वांगे किंवा ३ ते ४ भरायची लहान वांगी (साधारण १ ते सव्वा कप मध्यम फोडी)
१ कप गाजराचे मध्यम तुकडे
१/२ कप ओले चणे (मी फ्रोजन वापरले होते)
१/४ कप भिजवलेले शेंगदाणे (२-३ तास भिजवणे)
१/४ कप पावट्याचे दाणे (ऐच्छिक)
६ तुकडे शेवगा शेंगेचे (३ इंचाचे तुकडे) (टीप)
फोडणीसाठी - २ टेस्पून तेल, २ चिमटी मोहोरी, २ चिमटी हिंग, १/४ टिस्पून हळद, १/२ टिस्पून लाल तिखट,१/४ टिस्पून जिरे
३-४ कढीपत्ता पाने
२ टेस्पून भाजलेल्या तिळाचा कूट
२ टिस्पून काळा मसाला - रेसिपीसाठी इथे क्लिक करा
२ टेस्पून चिंचेचा दाट कोळ
१ ते दिड टेस्पून किसलेला गूळ
१/४ कप ओलं खोबरं
चवीपुरते मिठ

कृती:
१) पातेल्यात तेल गरम करून मोहोरी, जिरे, हिंग, हळद, लाल तिखट, आणि कढीपत्ता घालून फोडणी करावी. प्रथम बटाटा, ओले चणे, पावटे, शेवग्याच्या शेंगा आणि शेंगदाणे घालून २ वाफा काढाव्यात.
२) नंतर वांगं आणि गाजर घालून मिक्स करावे. थोडे पाणी घालून पातेल्यावर झाकण ठेवावे. मध्यम आचेवर शिजू द्यावे.
३) भाज्या शिजत आल्या कि चिंच कोळ आणि काळा मसाला घालावा तसेच लागल्यास थोडे पाणी घालावे.
४) भाज्या शिजल्या कि गूळ, तिळाचा कूट, खोबरं घालावे. लागल्यास चव पाहून मिठ घालावे. एक उकळी काढून भाकरीबरोबर गरमागरम भाजी सर्व्ह करावी.

टीप:
१) शेवग्याच्या शेंगा कोवळ्या घ्याव्यात नाहीतर त्या आतपर्यंत शिजत नाहीत. जर शेंगा जुन असतील तर त्या थोड्या वाफवून घ्याव्या.
२) भाजी शिजायला थोडा वेळ लागतो. जर झटपट भाजी हवी असेल तर चणे, पावटे, शेंगा, शेंगदाणे कूकरमध्ये २ शिट्ट्या करून वाफवून घ्यावे. परंतु भाज्या बाहेर शिजवल्यावर जो स्वाद येतो, तो कूकरमध्ये भाज्या शिजवल्यास येत नाही.

सिमला मिरची रस भाजी - Simla Mirchi batata Ras Bhaji

Simla Mirchi Rassa in English

वेळ: ३० मिनीटे
वाढणी: ३ जणांसाठी



साहित्य:
२ कप भोपळी मिरचीचे मोठे तुकडे
१ कप बटाट्याचे मध्यम तुकडे
फोडणीसाठी: १ टेस्पून तेल, २ चिमटी मोहोरी, २ चिमटी हिंग, १/४ टिस्पून हळद, १/२ टिस्पून लाल तिखट
१/२ टिस्पून गोडा मसाला
२ टेस्पून शेंगदाणा कूट
१ टेस्पून ताजा नारळ
१ टेस्पून चिंचेचा कोळ
१ टेस्पून गूळ किंवा चवीनुसार
चवीपुरते मिठ

कृती:
१) कढईत तेल गरम करावे. त्यात मोहोरी, हिंग, हळद, लाल तिखट घालून फोडणी करावी. आधी बटाटे घालून मिक्स करावे. साधारण एक ते दोन मिनीट वाफ काढावी.
२) आता भोपळी मिरची घालून मिक्स करावे. अंदाजे ३/४ कप पाणी, गोडा मसाला, चिंचेचा कोळ आणि मिठ घालून मिक्स करावे. बटाटे शिजेस्तोवर शिजवावे. गरज वाटल्यास थोडे पाणी घालावे. भोपळी मिरची एकदम मऊ होईस्तोवर शिजवू नये. अगदी किंचीत कच्ची राहू द्यावी.
३) बटाटा शिजला कि भाजीत गूळ, नारळ आणि शेंगदाणा कूट घालावा. छान ढवळावे आणि गरम गरम पोळीबरोबर सर्व्ह करावे.

तोंडली डाळ मेथ्या - Tondli Ras bhaji

Tondli Dal Methya in English

वेळ: पूर्वतयारी-१० मिनीटे। पाकृसाठी-१५ मिनीटे
वाढणी: २ ते ३ जणांसाठी

साहित्य:
१/२ पौंड तोंडली (जवळपास पाव किलो)
१/४ कप तूर डाळ
१/२ टिस्पून मेथी दाणे
३ ते ४ लसणीच्या मोठ्या पाकळ्या, बारीक चिरून
फोडणीसाठी: १ टिस्पून तेल, २ चिमटी मोहोरी, १/८ टिस्पून हळद, १/२ टिस्पून लाल तिखट
१/२ टिस्पून गोडा मसाला
१ टिस्पून गूळ
१/२ टिस्पून चिंचेचा घट्ट कोळ किंवा २ कोकमाचे तुकडे
चवीनुसार मिठ
सजावटीसाठी चिरलेली कोथिंबीर

कृती:
१) तोंडली उभी चिरून मिठाच्या पाण्यात घालावी.
२) तूरडाळ धुवून १० मिनीटे पाण्यात भिजवून ठेवावी.
३) लहान कूकरमध्ये तेल गरम करावे. त्यात लसूण आणि मेथी दाणे फोडणीस घालावे. लसूण थोडी ब्राऊन होवू द्यावी. नंतर मोहोरी, हळद आणि लाल तिखट घालून फोडणी करावी. तोंडल्यातील पाणी निथळून फोडणीस घालावी. एकदा परतून तूरडाळ घालावी व मिक्स करावे.
४) यामध्ये गूळ, गोडा मसाला, मिठ, आणि कोकम घालावे. थोडे पाणीसुद्धा घालावे (साधारण १/२ कप). मिक्स करून कूकरचे झाकण बंद करावे.
५) ३ शिट्ट्या करून गॅस बंद करावा. वाफ जिरू द्यावी. कूकर उघडून रश्श्याची चव पाहावी आणि तिखट-मिठ-मसाला लागेल तसे अडजस्ट करावे.
कोथिंबीरीने सजवून गरमच पोळीबरोबर सर्व्ह करावे.

टीप:
१) पदार्थ शिजायला काही कूकरला जास्त शिट्ट्या लागतात तर काहींना कमी. ३ शिट्ट्यांमध्ये तोंडली शिजतीलच. आपल्याला डाळ शिजलेली हवी पण ती आख्खी राहिली पाहिजे, तीचे वरण होता कामा नये. म्हणून आपापल्या कूकरप्रमाणे किती शिट्ट्या कराव्या ते ठरवावे.

ऋषींची भाजी - Rishi Panchami Bhaji

Rishi Panchami Bhaji in English

४ जणांसाठी (प्रत्येकी १ मोठी वाटी)
वेळ: २० मिनीटे

साहित्य:
पाऊण ते एक कप भेंडीचे तुकडे (१ इंच)
४ अळूची मध्यम पाने (टीप)
१/२ कप पडवळाच्या चकत्या
२०० ग्राम लाल भोपळ्याच्या फोडी (मध्यम) (साले काढून)
१/४ कप मटारचे दाणे
१/४ कप पापडी दाणे
१/४ कप मक्याचे दाणे
५-६ बेबी कॉर्न, (१ इंचाचे तुकडे करावे)
२ टेस्पून शेंगदाणे (३ तास भिजवलेले)
२ टिस्पून चिंच (कोळ करून घ्यावा)
१ हिरवी मिरची
१/२ कप ताजा खवलेला नारळ
१ टिस्पून तूप
१/४ टिस्पून जिरे
चवीपुरते मिठ

कृती:
१) अळूची पाने धुवून त्याची देठं कापून घ्यावीत. देठ सोलून वेगळी ठेवावीत. त्याचे बारीक तुकडे करावेत.
२) पाने बारीक चिरून घ्यावीत. कूकरमध्ये अळू (फक्त पाने) १ शिट्टी करून शिजवून घ्यावा.
२) अळूची शिजवलेली पाने मिक्सरमध्ये वाटून घ्यावीत. वाटताना मिरचीही घालावी.
३) कूकर गरम करावा व त्यात तूप-जिर्‍याची फोडणी करावी. त्यामध्ये सर्व भाज्या अळूच्या देठांसह फोडणीस घालाव्यात. थोडावेळ परतून वाटलेली अळूची पाने घालावीत.
४) चिंचेचा कोळ घालावा. चवीपुरते मिठ आणि भाज्या शिजण्यापुरते पाणी घालावे.
५) कूकरचे झाकण बंद करावे आणि मध्यम आचेवर साधारण १५ मिनीटे भाजी शिजू द्यावी. १५ मिनीटांनी गस बंद करावा. वाफ मुरली कि कूकरचे झाकण उघडावे आणि ओला नारळ घालून मिक्स करावे. एक उकळी काढावी.
गरमा गरम भाजी, पोळी किंवा दशमीबरोबर सर्व्ह करावी. हि भाजी नुसती खायलाही चविष्ट लागते.

टीप:
१) मला जितक्या भाज्या मिळाल्या तेवढ्या मी वापरल्या. परंतु ऋषींच्या भाजीमध्ये अजूनही काही भाज्या वापरल्या जातात. यामध्ये मुख्यत: लाल माठ, चवळी, आंबट चुका, अंबाडी यासारख्या पालेभाज्या वापराव्यात. पालक, मेथी, शेपू यांसारख्या उग्र चवीच्या भाज्या वापरू नयेत, भाजीची चव बिघडते. तसेच सुरण, रताळे, अळकुडी (अर्बी) यांसारखे कंदही वापरावेत. काकडी, तोंडली आणि दोडकाही घालता येतो.
२) जर अंबाडीचा पाला वापरणार असाल तर चिंचेचा कोळ घालू नकात अथवा चव पाहून अगदी कमी प्रमाणात घालावा.
३) मी अळूची पाने उकडून, बारीक वाटून घेतली होती. याचे कारण भाजी चांगली मिळून येते. पालेभाज्या नुसत्या बारीक चिरून इतर भाज्यांबरोबर फोडणीस घातल्या तरीही चालेल.
४) आंबट चवीच्या भाज्या आणि चिंच वापरायची नसेल तर भाजी तयार झाल्यावर उकळी काढताना, आंबटपणासाठी १ वाटी घट्ट ताक घालावे आणि थोडावेळ ढवळावे म्हणजे ताक फुटणार नाही.
५) भाजीला तूप-जिर्‍याची फोडणी घातली नाही तरीही चालते. कूकरमध्ये सर्व भाज्या फोडणीशिवाय शिजवाव्यात (वरील कृतीप्रमाणे). आणि भाजी सर्व्ह करताना १ टिस्पून तूप घालून सर्व्ह करावी.
६) भाज्यांचे प्रमाण आवडीनुसार कमीजास्त केले तरीही चालते.

Labels:
Rishi Panchami Bhaji, Rishi chi Bhaji, Ganapati Recipes

व्हेजिटेबल कोर्मा - Vegetable Korma

Vegetable Korma in English

वेळ: ३० मिनीटे
वाढणी: ४ जणांसाठी

साहित्य:
दोन कप कॉलीफ्लॉवरचे मध्यम तुरे
१/२ कप मटार
२ मध्यम गाजरं, लहान चौकोनी तुकडे
१/२ कप फरसबीचे तुकडे (२ इंच तुकडे)
१/२ कप पनीरचे चौकोनी तुकडे (ऐच्छिक)
१/२ कप कांदा, बारीक चिरून
१/२ कप टोमॅटो, बारीक चिरून
५ ते ६ काजू
१ टिस्पून गरम मसाला
फोडणीसाठी: २ टेस्पून तेल, ३-४ लवंगा, १/८ टिस्पून मोहोरी, १/४ टिस्पून जिरे, चिमूटभर हिंग, १/४ टिस्पून हळद, १/२ टिस्पून लाल तिखट
१ टिस्पून लसूण पेस्ट
१ टिस्पून आले पेस्ट
१ टिस्पून धणेपूड
१/२ कप नारळाचे दूध
१/२ टिस्पून साखर
चवीपुरते मिठ

कृती:
१) कॉलीफ्लॉवरचे तुकडे, मटार, गाजराचे तुकडे, फरसबीचे तुकडे मायक्रोवेव सेफ भांड्यात घ्यावेत. भाज्या बुडतील एवढे पाणी घालावे. १ टिस्पून मिठ घालून मिक्स करावे. मायक्रोवेवमध्ये भाज्या अर्धवट शिजवून घ्याव्यात. (मी भाज्या ५ मिनीटे हाय पॉवरवर शिजवल्या होत्या)
२) कढईत तेल गरम करावे. त्यात लवंग आणि काजू घालून काही सेकंद परतावे. नंतर मोहोरी, जिरे, हिंग, हळद आणि लाल तिखट घालून फोडणी करावी. लसूण पेस्ट परतावी.
३) लसूण पेस्ट परतल्यावर कांदा घालून खमंग परतावा. नंतर टोमॅटो घालावा आणि टोमॅटो एकदम मऊ होईपर्यंत परतावे.
४) नंतर अर्धवट शिजवलेल्या भाज्या घालाव्यात तसेच थोडे (साधारण १/२ कप) पाणी घालावे. गरम मसाला आणि धणेपूड घालावी. झाकण ठेवून भाज्या शिजू द्याव्यात. नंतर नारळाचे दूध, आलेपेस्ट आणि पनीरचे तुकडे घालावे. मध्यम आचेवर २ मिनीटे उकळी काढावी. चवीपुरते मिठ आणि साखर घालावी.
गरमागरम कोर्मा पोळी, पुरी किंवा रोटी बरोबर सर्व्ह करावा.

टीप्स:
१) कोर्मा जर थोडा रस्सेदार केला तर भाताबरोबरही छान लागतो.
२) जर मायक्रोवेव नसेल तर पातेल्यात पाणी उकळवावे. त्यामध्ये भाज्या घालून १ मिनीटभर उकळी काढावी. गॅस बंद करावा आणि पातेल्यावर झाकण ठेवून वाफेवर भाज्या अर्धवटच शिजवाव्यात.
३) कांदा आणि टोमॅटो एकदम बारीक चिरावा.
४) पनीर जर फ्रोजन असेल तर तुकडे करून थोडावेळ गरम पाण्यात घालून ठेवावे. नरम झाले कि पाण्याबाहेर काढावे.
५) आवडीनुसार अजून दुसर्‍या भाज्याही यामध्ये घालू शकतो (उदा. बटाटा)
६) भाज्यांचे प्रमाण आवडीनुसार कमी-जास्त करावे.

Labels:
Vegetable Korma, Korma curry recipe, Indian Curry, Mixed vegetable curry

वांगी बटाटा रस्सा - Vangi batata Rassa

Vangi Batata Rassa in English

२ ते ३ जणांसाठी
वेळ: २० ते ३० मिनीटे

साहित्य:
५-६ लहान जांभळी वांगी (टीप १ आणि ३)
२ मध्यम बटाटे
१ टेस्पून तेल
फोडणीचे साहित्य: १/८ टिस्पून मोहोरी, १/४ टिस्पून जिरे, चिमूटभर हिंग, १/४ टिस्पून हळद, १/२ टिस्पून लाल तिखट, २ कढीपत्ता पाने
१ ते दिड टेस्पून दाण्याचा कूट
१ टिस्पून काळा मसाला
१ टेस्पून चिंचेचा कोळ
१ टेस्पून गूळ
चवीपुरते मिठ
१ टेस्पून बारीक चिरलेली कोथिंबीर

कृती:
१) वांग्याची देठं काढून टाकावीत. आणि प्रत्येक वांग्याचे ८ लहान तुकडे करावे. गार पाण्यात घालून ठेवावेत. बटाटे सोलून त्याचे मध्यम चौकोनी तुकडे करावेत आणि दुसर्‍या गार पाण्याच्या वाडग्यात ठेवावे.
२) कढईत किंवा जाड बुडाच्या पातेल्यात तेल गरम करावे. त्यात मोहरी, जिरे, हिंग, हळद, लाल तिखट, आणि कढीपत्ता घालून फोडणी करावी. बटाट्याच्या फोडी पाण्यातून उपसून काढाव्यात आणि फोडणीत घालाव्यात. २ ते ३ मिनीटे व्यवस्थित परतून घ्याव्यात. थोडावेळ वाफ काढावी.
३) त्यात वांग्याच्या फोडी घालाव्यात. त्यात थोडे पाणी घालून मंद आचेवर वाफ काढावी. त्यात मिठ, चिंचेचा कोळ, आणि काळा मसाला घालून बटाटा आणि वांग्याच्या फोडी शिजू द्याव्यात. गरज लागल्यास थोडे पाणी घालावे.
४) बटाटा आणि वांग्याच्या फोडी शिजल्या नंतरच त्यात गूळ घालावा (टीप २). दाण्याचा कूट घालून उकळी काढावी.
गरमागरम रस्सा पोळी किंवा भाकरीबरोबर सर्व्ह करावा.

टीप:
१) जर लहान वांगी नाही मिळाली तर १ चायनीज वांगे वापरावे किंवा अर्धे मोठे वांगे (भरीताचे) वापरावे.
२) बटाटा आणि वांगे शिजल्यावरच त्यात गूळ घालावा, जर अगोदरच गूळ घातला तर बटाटा आणि वांगे आवठरतात आणि पटकन शिजत नाहीत.
३) कधी कधी मोठी वांगी घशाला खवखवतात, अशावेळी छोटी वांगी बरी पडतात.

मेथी मलई मटर - Methi Malai Mutter

Methi malai Matar in English

२ जणांसाठी
वेळ: ४५ मिनीटे

साहित्य:
३ कप मेथीची फक्त पाने
१/२ कप मटार
१ हिरवी मिरची
१/२ कप कांद्याची पेस्ट
१ टेस्पून बटर
२ काळ्या मिरी
१ वेलची
१ लहान दालचिनीची काडी
१/२ कप दुध
चवीपुरते मिठ

कृती:
१) कढईत बटर गरम करावे त्यात हिरवी मिरची घालून काही सेकंद परतावे. नंतर मिरी, वेलची आणि दालचिनीची काडी घालून त्यांचा छान वास येईस्तोवर परतावे.
२) या फोडणीत कांद्याची पेस्ट घालावी. मध्यम आचेवर परतावे. कांद्यातील सर्व पाणी निघून जाऊन कांदा शिजला कि त्यात धुवून स्वच्छ केलेली मेथीची पाने घालावीत. मध्यम आचेवर मेथी परतावी. शिजवताना कढईवर झाकण ठेवू नये, मेथीचा रंग बदलतो.
३) पाने थोडी शिजली कि त्यात मटार आणि दूध घालावे आणि मंद आचेवर शिजवावे. चवीनुसार मिठ घालावे. १ ते २ टेस्पून क्रिम घालावे आणि थोडावेळ मंद आचेवर शिजवावे.
हि भाजी छान मिळून यायला वेळ लागतो त्यामुळे शिजवताना घाई करू नये.

टीप:
१) आलेलसूण पेस्ट आवडीनुसार फोडणीत घालू शकतो.परंतु, त्यामुळे मेथीचा स्वाद एकदम कमी होतो आणि भाजी तेवढी फ्लेवरफुल लागत नाही.
२) फ्रेश क्रिममुळे भाजीला थोडी गोडसर चव येते. पण वाटल्यास चिमूटभर साखर घालावी.

Labels:
Methi Malai Matar, methi mutter malai

चिंचगूळातील भेंडी - Chinch gulachi Bhendi

Sweet Sour Okra Curry in English

३ ते ४ जणांसाठी
वेळ: साधारण ३५ मिनीटे

साहित्य:
पाव किलो भेंडी
१ टेस्पून तेल
फोडणीसाठी: १/४ टिस्पून मोहोरी, १/४ टिस्पून जिरे, १/८ टिस्पून हिंग, १/४ टिस्पून हळद, १/२ टिस्पून लाल तिखट, ४-५ कढीपत्ता पाने
२ टेस्पून खवलेला नारळ
मोठ्या लिंबाएवढ्या चिंचेचा कोळ
१ टेस्पून गूळ
१ टेस्पून शेंगदाणा कूट
२ टिस्पून गोडा मसाला
चवीपुरते मिठ
कोथिंबीर सजावटीसाठी

कृती:
१) भेंडी धुवून घ्यावी. स्वच्छ कपड्याने कोरडी करून गोल चकत्या करून घ्याव्यात.
२) चिंच पाण्यात भिजवून त्याचा कोळ करून घ्यावा. कोळात १ भांडे पाणी घालावे.
३) कढईत तेल गरम करून त्यात मोहोरी, जिरे, हिंग, हळद, तिखट आणि कढीपत्ता घालून फोडणी करावी. ताजा नारळ घालून काही सेकंद परतावा.
४) नंतर चिरलेली भेंडी घालून दोनेक मिनीटे मोठ्या आचेवर परतावे. त्यात चिंचेचे पाणी घालावे. मिठ घालावे आणि मध्यम आचेवर झाकण ठेवून भेंडी शिजेस्तोवर वाफ काढावी. गरज वाटल्यास पाणी वाढवावे.
५) भेंडी शिजत आली कि त्यात गूळ, गोडा मसाला, आणि शेंगदाण्याचा कूट घालून एक दोन वेळा उकळी काढावी.
कोथिंबीर घालून चिंचगूळाची भेंडी गरमागरम तूप भाताबरोबर वाढावी.

Labels:
Okra curry, Chinch gulachi bhendi

फ्लॉवर बटाटा रस्सा - Batata Rassa

Potato Curry in English

वेळ: ४० मिनीटं
३ ते ४ जणांसाठी

साहित्य:
३ मोठे बटाटे, (सोलून मध्यम तुकडे करून पाण्यात ठेवून द्यावे)
फ्लॉवरचे ८ ते १० मध्यम तुरे (फ्रोझन)
१ मोठा कांदा, बारीक चिरून
१/२ कप किसलेले सुके खोबरे, भाजून
४ ते ५ लसूण पाकळ्या, तुकडे करून
१ टिस्पून तेल
१ टोमॅटो (प्युरी करून)
२ टिस्पून कांदा लसूण मसाला
४ कप पाणी
फोडणीसाठी: १ टेस्पून तेल, १/४ टिस्पून मोहोरी, १/२ टिस्पून जिरे, १/८ टिस्पून हिंग, १/४ टिस्पून हळद, १ टिस्पून लाल तिखट, २-३ कढीपत्ता पाने
कोथिंबीर सजावटीसाठी
चवीपुरते मिठ

कृती:
१) कढईत १ टिस्पून तेल गरम करून त्यात लसूण आणि कांदा घालून, कांदा खरपूस होईस्तोवर परतावे. लगेच भाजलेले खोबरे घालून दोन मिनीटं परतावे. परतलेले मिश्रण गार झाले कि १/४ कप पाणी घालून मिक्सरमध्ये पातळ पेस्ट बनवून घ्यावी.
२) त्याच कढईत १ टेस्पून तेल गरम करावे त्यात मोहोरी, जिरे, हिंग, हळद, लाल तिखट आणि कढीपत्ता पाने घालून फोडणी करावी. बटाटे पाण्यातून उपसून लगेच फोडणीस घालावेत. मध्यम आचेवर ३ ते ४ वाफा येऊ द्याव्यात. आधीच पाणी घालू नये, थोडा पाण्याचा हबका मारावा तसेच मधे मधे चमच्याने परतावे म्हणजे बटाटा चिकटणार नाही.
३) बटाटयाचा थोडा शिजल्यासारखा वाटला कि लगेच फ्लॉवरचे तुकडे घालावेत. कांद्याची पेस्ट आणि टोमॅटो प्युरी घालावी ३ ते ४ कप पाणी घालावे. कांदा लसूण मसाला, मिठ घालून मध्यम आचेवर कढईवर झाकण ठेवून बटाटा आणि फ्लॉवर शिजू द्यावा. साधारण २५ ते ३० मिनीटे लागतील शिजायला. भाजी शिजत असताना मधेमधे ढवळावे. रश्श्याची चव पाहून गरजेनुसार कांदा-लसूण मसाला, मिठ, किंवा लाल तिखट घालावे.
कोथिंबीरीने सजवून भात, पोळी किंवा भाकरीबरोबर सर्व्ह करावी.

Labels:
Potato Rassa, Potato spicy curry

पालकाची आमटी - Spinach Curry

Spinach Curry in English

वाढणी: ३ जणांसाठी

साहित्य:
२ कप पालक, बारीक चिरलेला
१ टेस्पून तेल
१/२ टिस्पून जिरे, १/२ टिस्पून हिंग, १/४ टिस्पून हळद, १ टिस्पून लाल तिखट
२ टेस्पून शेंगदाण्याचा कूट
२ टेस्पून शेंगदाणे
१ टेस्पून चणाडाळ
१ टिस्पून सुक्या नारळाचे पातळ काप
२ टिस्पून चिंचेचा घट्ट कोळ
१ टिस्पून गूळ
२ टिस्पून तूप
३ ते ४ कढीपत्ता पाने
१ टेस्पून काजू
२ ते ३ लसणीच्या पाकळ्या, सोलून किंचीत ठेचलेल्या
चवीपुरते मिठ
कोथिंबीर आणि ताजा खोवलेला नारळ सजावटीसाठी

कृती:
१) चणा डाळ आणि शेंगदाणे एकत्र कोमट पाण्यात साधारण ४ तास भिजवून ठेवा.
२) कढईत १ टेस्पून तेल गरम करा. त्यात जिरे, हिंग, हळद आणि लाल तिखट घालून काही सेकंद परता. नंतर त्यात भिजवलेले शेंगदाणे आणि चणाडाळ घाला. एक मिनीटभर परता. चिरलेला पालक आणि साधारण १/२ टिस्पून मिठ घालून २ ते ३ मिनीटे परता. कढई न झाकता पालक चांगला शिजू द्यात.
३) त्यात १ ते दिड कप पाणी घाला आणि १ उकळी येऊ द्यात. चिंच, गूळ, शेंगदाणे कूट आणि गरम मसाला घाला. चव पाहून गरज वाटल्यास मिठ घाला. मध्यम आचेवर २ मिनीटे उकळू द्यात. तयार आमटी सर्व्हींग बोलमध्ये काढा.
४) छोट्या कढल्यात तूप गरम करा. त्यात कढीपत्ता आणि लसूण पाकळ्या घाला. लसूण जराशी सोनेरी होवू द्यात. लगेच काजू घाला आणि थोडा सोनेरी रंग चढेस्तोवर चमच्याने ढवळा. आता सुका खोबरं घालून ५ ते १० सेकंद परता आणि हि फोडणी तयार आमटीवर ओता.
हि आमटी गरमागरम भाताबरोबर सर्व्ह करा. तसेच हि आमटी भाकरीबरोबरही छान लागते.

टीप:
१) पालक एकदम बारीक चिरा, पालकाचे मोठे मोठे तुकडे चांगले लागत नाहीत.
२) या आमटीत शिजवलेली डाळ घातलेली नाहीये. म्हणून थोडी पातळ कटासारखी होते, यासाठी गरजेनुसार पाणी घालावे.

Labels:
Palak dal, Palak amti, palakachi amti, Spinach curry

राजमा मसाला - Rajma Masala

Rajma Masala bhaji in English

साहित्य:
३/४ ते १ कप राजमा (रेड बिन्स)
१ टिस्पून ते दिड टिस्पून आलेलसूण पेस्ट
३/४ कप कांदा, बारीक चिरून
३ मध्यम टोमॅटो
१ ते २ टेस्पून तेल
१ तमालपत्र
१ इंच दालचिनी तुकडा
१/२ टिस्पून जिरे
१/४ टिस्पून हळद
१ टिस्पून लाल तिखट (शक्य असल्यास काश्मिरी)
१ टिस्पून जिरेपूड
१/२ टिस्पून धणेपूड
१/४ टिस्पून आमचुर पावडर
१/२ टिस्पून गरम मसाला
चवीपुरते मिठ


कृती:
१) राजमा पाण्यात ६ ते ७ तास भिजत ठेवावा. प्रेशरकूक करून मऊसर शिजवून घ्यावा. खुप जास्त शिजवू नये नाहीतर दाणे फुटून करी चांगली लागणार नाही. शिजवताना मिठ घालावे
२) टोमॅटो धुवून उकळत्या पाण्यात १ मिनीट घालून लगेच गार पाण्यात घालावेत म्हणजे टोमॅटोची साले सुटायला मदत होते. टोमॅटो सोलून घ्यावेत, आतील बिया नको असल्यास काढून टाकाव्यात. उरलेला गर मिक्सरमध्ये घालून त्याची प्युरी करावी.
३) पॅनमध्ये तेल गरम करून त्यात तमालपत्र आणि दालचिनी घालून ३० सेकंद परतावे. जिरे, हळद आणि लाल तिखट घालून फोडणी करावी. लगेच आले-लसूण पेस्ट घालावी आणि परतावे.
४) नंतर कांदा घालून चांगला खरपूस परतावा. जर कांदा निट परतला नाही तर भाजीत आख्खे तुकडे दिसतात. तसेच कांदा परतताना मिठ घालू नये आणि झाकणही ठेवू नये. तेलावरच तो भाजला गेला पाहिजे. वाफेवर शिजवून आणि परतून या दोन्ही कृतींमुळे चवीत फरक पडतो.
५) कांदा परतला कि त्यात टोमॅटोची प्युरी करावी. मध्यम आचेवर झाकून शिजू द्यावे. गरजेपुरते पाणी घालावे. ३ ते ४ मिनीटांनी त्यात धणे-जिरेपूड, आमचूर पावडर आणि गरम मसाला घालावा. मिक्स करून एक दोन मिनीटे उकळी काढावी.
६) नंतर शिजवलेले राजमा बिन्स घालून ढवळावे, गरज वाटल्यास मिठ घालावे. मंद आचेवर राजमा २० मिनीटे शिजू द्यावा. ग्रेव्हीसाठी पाण्याचे प्रमाण कमीजास्त करावे.
गरम गरम भाताबरोबर राजमा करी खुपच चवदार लागते.

Labels:
Rajama masala, Rajma Recipe, Red beans curry, Rajama bhaji

चण्याची उसळ आणि पाव - Chickpeas Spicy Curry

Usal pav Recipe in English

वाढणी: २ ते ३ जणांसाठी



साहित्य:
३/४ कप काबुली चणे (छोले)
२ टेस्पून तेल
१ कप टोमॅटो, बारीक चिरून
३/४ ते १ कप कांदा, बारीक चिरून
१/२ टिस्पून जिरे
१ टिस्पून लाल तिखट
२ हिरव्या मिरच्या
४-५ कढीपत्ता पाने
१ टिस्पून आलेपेस्ट
१ टिस्पून धणेपूड
१ टिस्पून जिरेपूड
१/२ टिस्पून दालचिनी पूड
१/२ टिस्पून गरम मसाला
२ टेस्पून चिंचेचा कोळ
१/८ टिस्पून मिरपूड
चवीपुरते मिठ

कृती:
१) चणे ८ ते १० तास पाण्यात भिजत घालावेत. नंतर कूकरमध्ये मऊसर शिजवून घ्यावेत. खुप जास्त शिजवू नये नाहीतर चणे फुटतात. चणे शिजवताना मिठ घालावे.
२) कढईत तेल गरम करावे. त्यात जिरे, लाल तिखट, मिरच्या आणि कढीपत्ता घालून फोडणी करावी. नंतर आलेपेस्ट घालावी. काही सेकंद फ्राय करून चिरलेला कांदा फोडणीस घालावा, किंचीत मिठ घालावे. मध्यम आचेवर कांदा शिजू द्यावा. कांदा शिजला कि त्यात धणेजिरेपूड, दालचिनी पूड घालून साधारण २० सेकंद ढवळावे. नंतर त्यात चिरलेला टोमॅटो घालून मध्यम आचेवर शिजू द्यावे.
३) टोमॅटो निट शिजला कि त्यात शिजवलेले चणे घालावेत. साधारण १ कप पाणी घालावे. ढवळून मध्यम आचेवर एक वाफ काढावी. नंतर त्यात चिंचेचा कोळ, मिरपूड, आणि गरम मसाला घालून थोडावेळ उकळू द्यावे. चणे शिजवताना आणि कांदा शिजवताना आपण मिठ घातले होते त्या अंदाजानुसार रश्श्याची चव पाहून मिठ घालावे.
सर्व्ह करताना वरून कोथिंबीर, चिरलेला कांदा पेरावा. स्लाईस ब्रेडबरोबर किंवा लादी पावाबरोबर गरम गरम सर्व्ह करावे.

Labels:
Chana Masala, Chanyacha Rassa, Usal Pav

पालकाची पातळ भाजी - Palakachi Patal bhaji

Palakachi Patal Bhaaji (English Version)

मला अळूची भाजी प्रचंड आवडते. पण या अमेरीकेतील Indian Stores मध्ये कोमेजून गेलेला अळू बघून तो घ्यावासाच नाही वाटत !! यावर माझ्या सासुबाईंनी एक मस्त आयडीया सांगितली. अळूच्याच भाजीची चव असलेली पालकाची सुद्धा भाजी करता येते !!
हि पालकाची भाजी चवीला अगदी अळूच्या भाजीसारखी लागते (अळूचे फदफदे). ज्यांना अळूची भाजी आवडते आणि अळू जर सहज उपलब्ध नसेल तर हि भाजी नक्की करून पाहा.

साहित्य:
१ जुडी पालक
१ मूठ शेंगदाणे
१ मूठ चणाडाळ
२-३ चमचे तुकडा काजू (ऑप्शनल)
फोडणीसाठी : ४ चमचे तेल, मोहोरी, हिंग, हळद, २-३ हिरव्या मिरच्या
१/२ लहान चमचा मेथी दाणे (ऑप्शनल)
१ चमचा भरून चणापिठ
१ चमचा काळा मसाला
३-४ चमचे चिंचेचा कोळ
१ ते दिड चमचा किसलेला गूळ
मिठ

कृती:
१) शेंगदाणे आणि चणाडाळ ७-८ तास पाण्यात भिजत ठेवावेत. चणाडाळ आणि शेंगदाणे भिजले कि कूकरमध्ये २-३ शिट्ट्या करून शिजवून घ्यावे. शिजवताना किंचीत मिठ घालावे.
२) पालकाची पानं खुडून ती पाण्यात स्वच्छ करून घ्यावीत. थोडावेळ मोठ्या भोकाच्या चाळणीत पाघळत ठेवावी. नंतर पाने बारीक चिरून घ्यावीत.
३) पातेल्यात तेल गरम करावे. मोहोरी, हिंग, हळद, मिरच्यांचे बारीक तुकडे, मेथीदाणे घालून फोडणी करावी. मध्यम आचेवर त्यात चिरलेला पालक घालावा. पालकाला पाणी सुटले कि त्यात चणापिठ घालावे. आणि चणापिठाबरोबर पालक चांगला घोटावा. चणापिठाच्या गुठळ्या होवू देवू नयेत. २-३ मिनीटे परतावे. चणापिठ घातल्याने पालक चांगल्याप्रकारे घोटला जातो.
४) पालक चांगला घोटला गेला कि त्यात शिजवलेले शेंगदाणे आणि चणाडाळ घालावी, आवडत असल्यास काजूचे तुकडे घालावे. काळामसाला घालावा. थोडे पाणी, चिंचेचा कोळ, मिठ, आणि गूळ घालावा. १ -२ वेळा उकळी काढावी.
हि भाजी जरा घट्टसरच असते अळूच्या भाजीसारखी त्यामुळे आवश्यक तेवढेच पाणी घालावे.

टीप:
१) या भाजीत आवडत असल्यास लसूण फोडणीत घालू शकतो.

Labels:

Spinach Curry, Indian spinach curry, Spicy spinach curry, spinach soup, healthy recipe