केळ्याचे रायते - Kelyache Raite

Banana Raita in English

४ जणांसाठी
वेळ: १० मिनिटे

साहित्य:
२ मध्यम केळी, जरा जास्त पिकलेली
१/२ कप दही, घुसळलेले
१ हिरवी मिरचीची पेस्ट (किंवा चवीनुसार)
१ टेस्पून बारीक चिरलेली कोथिंबीर
१/४ टिस्पून मोहोरी पावडर
१ टिस्पून साखर किंव चवीनुसार
चवीनुसार मिठ

कृती:
१) केळं सोलून घ्यावी आणि त्याचे मध्यम तुकडे करावे
२) दह्यामध्ये १ ते २ चमचे पाणी घालून थोडे घोटून घ्यावे.
३) कोथिंबीर आणि थोडे मिठ एकत्र करून हाताने चुरडून घ्यावे. आणि दह्यात मिक्स करावे
४) दह्यात मोहोरी पावडर, साखर, मिरची पेस्ट, चुरडलेली कोथिंबीर घालून मिक्स करावे. आता चिरलेले केळं घालून मिक्स करावे.
जेवताना तोंडीलावणी म्हणून हे रायते सर्व्ह करता येते.

काकडीचा कायरस - Kakdicha Kayras

Kakdi Kayras in English

वेळ: १० ते १५ मिनिटे
वाढणी: ३ ते ४ जणांसाठी

साहित्य:
१ कप बारीक चिरलेली काकडी (सोलून)
१ टेस्पून चिंचेचा घट्ट कोळ
३ ते ४ टेस्पून किसलेला गूळ किंवा चवीनुसार
२ टेस्पून शेंगदाण्याचा कूट (थोडा भरडसर)
फोडणीसाठी: १ टेस्पून तेल, १/८ टिस्पून जिरे, २ चिमटी हिंग, १/८ टिस्पून हळद, १/४ टिस्पून लाल तिखट
२ टेस्पून बारीक चिरलेली कोथिंबीर
चवीपुरते मिठ

कृती:
१) चिंचेचा कोळ एका मध्यम वाडग्यात घ्यावा. त्यात साधारण १/२ कप पाणी घालून मिक्स करावे. मिठ, गूळ घालून गूळ विरघळेस्तोवर मिक्स करावे. (पाण्याची चव आंबटगोड असली पाहिजे, त्यानुसार चिंच किंवा गूळ आवडीनुसार वाढवावा)
२) चिंचेच्या पाण्यात काकडी घालावी. मिश्रण पातळसरच असावे, तेव्हा लागल्यास अजून थोडे पाणी घालावे. दाण्याचा कूटही घालावा.
३) कढल्यात तेल गरम करावे. जिरे, हिंग, हळद, लाल तिखट घालून फोडणी करावी. हि फोडणी कायरसावर घालावी. कोथिंबीर घालून मिक्स करावे.
काकडी कायरस जेवणात तोंडीलावणी म्हणून घ्यावे.

टीप:
१) आवडीनुसार चिंचेचा कोळ किंवा गूळ कमी जास्त करू शकतो.

दह्यातील काकडी कोशिंबीर - Cucumber Yogurt Raita

Cucumber Raita in English

वाढणी: २ ते ३ जणांसाठी
वेळ: १० मिनीटे

साहित्य:
१ कप बारीक चोचवलेली काकडी (आधी काकडी सोलावी)
३/४ कप दही, घोटून
१ हिरवी मिरची, बारीक चिरून
१/४ कप कोथिंबीर, बारीक चिरून
१ टिस्पून तूप
२ चिमटी जिरे
चवीपुरते मिठ

कृती:
१) चोचवलेली काकडी आणि दही एकत्र करावे. मिरची आणि थोडेसे मिठ एकत्र करून चुरडावे आणि दही-काकडीमध्ये घालावे.
२) लहान कढल्यात तूप गरम करून जिरे फोडणीस घालावे. जिरे तडतडले कि दही-काकडीत घालावे.
३) कोथिंबीर आणि लागल्यास मिठ घालून मिक्स करावे.
हे रायते रोजच्या जेवणात तोंडीलावणी म्हणून छान लागते.

टीपा:
१) रायते अजून तिखट हवे असल्यास अजून थोडी मिरची चुरडून घालावी.
२) सर्व दही एकदम काकडीत घालू नये. थोडे घालून मिक्स करून लागेल तसे दही घालावे. जर तुम्हाला जास्त दही हवे असेल तर अजून दही घातले तरीही चालेल.
३) १ ते २ टेस्पून दाण्याचा कूटही घालू शकतो.

कैरीचे रायते - Kairiche Raite

Kairi Raita in English

वेळ: १० मिनीटे
साधारण १ कप

साहित्य:
१ कप कैरीचा गर (कृती - स्टेप १)
१/२ कप गूळ
१/२ टिस्पून लाल तिखट
चवीपुरते मिठ
१ टिस्पून तेल
२ कढीपत्त पाने
१/४ टिस्पून जिरे
चिमूटभर हिंग
१ लाल मिरची

कृती:
१) कूकरमध्ये १ कप पाणी घालावे. कूकरच्या डब्यात पाणी न घालता आख्खी कैरी ठेवावी. २ ते ३ शिट्ट्या करून कैरी वाफवून घ्यावी. कूकरची वाफ जिरली कि लगेच कैरी बाहेर काढून गरम असतानाच त्यातील गर काढून घ्यावा.
२) या गरामध्ये गूळ कुस्करून घालावा.
३) या मिश्रणात लाल तिखट आणि चवीपुरते मिठ घालावे. तेल, जिरे, हिंग, कढीपत्ता आणि लाल मिरची घालून फोडणी करावी. हि फोडणी कैरीच्या गरावर घालावी.
सर्व निट मिक्स करून जेवणात तोंडीलावणी घ्यावे.

टीप:
१) आवडीनुसार गुळाचे प्रमाण कमीजास्त करावे.

वांग्याचे भरीत - vangyache bharit

Baingan Bharta in English

वेळ: वांग भाजण्यासाठी: भाजण्याच्या पद्धतीनुसार । पाकृसाठी वेळ: ५ ते १० मिनीटे
वाढणी: ३ ते ४ जणांसाठी

साहित्य:
१ मोठे वांगे
१ मोठा कांदा, बारीक चिरून (साधारण ३/४ ते १ कप)
३ हिरव्या मिरच्या, उभ्या चिरून
फोडणीसाठी: १ टेस्पून तेल, २ चिमटी मोहोरी, १ चिमटी जिरे, १/८ टिस्पून हिंग, १/८ टिस्पून हळद
चवीपुरते मिठ
कोथिंबीर सजावटीसाठी

कृती:
१) वांगं भाजून घ्यावं.
i) गॅसवर: गॅसच्या शेगडीवर वांगं भाजण्यासाठी आधी वांग्याला किंचीत तेल चोळून घ्यावे आणि आचेवर भाजावे. मधेमधे वांगं फिरवावे म्हणजे सर्व ठिकाणी वांगं निट भाजले जाईल. (नोट- गॅसवर वांगं भाजताना वांग्यातील पाणी शेगडीवर पडून डाग पडतात. पण थोडे घासून स्वच्छ करता येते.)
ii) ओव्हनमध्ये: ओव्हन ४०० F वर प्रिहीट करावे. वांग्याला बाहेरून तेल लावून सुरीने किंवा काट्याने (Fork) काहीवेळा टोचावे. अल्युमिनीयम फॉइलमध्ये गुंडाळून ४५ ते ५० मिनीटे बेक करावे. (या पद्धतीने वांग्याचा आतील गर शिजतो पण थेट विस्तवावर भाजल्याने जो स्वाद येतो तो मात्र येत नाही.)
iii) बार्बेक्यु ग्रिलसुद्धा वांगं भाजायला वापरू शकतो.
iv) फायरप्लेस (टीप): ऐकायला मजेशीर वाटेल पण मी वांगं फायरप्लेसमध्ये भाजलं. वांग्याला तेल लावून काहीवेळा सुरीने किंवा काट्याने टोचून घ्यावे. अल्युमिनीयम फॉइलमध्ये व्यवस्थित गुंडाळून घ्यावे. फायरप्लेसमध्ये वरच्या बाजूस धूर बाहेर जाण्यासाठी छोटी खिडकी असते ती प्रथम उघडावी. नंतर २ ते ३ जाडसर फांद्या फायरप्लेसमध्ये रचाव्यात. खाली १-२ नारळाच्या करवंट्या ठेवाव्यात. १-२ चमचे तेल फांद्यांवर शिंपडावे. जागा करून मधल्या जागी वांगं ठेवावे. आग पेटवावी. लागल्यास पेपर किंवा कार्डबोर्डचे तुकडे वापरून आग सुरू करावी. शेकोटी व्यवस्थित पेटल्यावर १० ते १५ मिनीटात वांग भाजलं जातं. वांगं भाजलं गेल्यावर अगदी सांभाळून पापड तळायच्या चिमट्याने बाहेर काढावे.

२) वांगं थोडं गार होवू द्यावं. सालं काढून शेंडी कापून टाकावी. आतील गर जाडसर कापून घ्यावा.
३) वांगं आणि कांदा एकत्र करावा. वांगं भाजल्यावर त्यातून जो रस निघतो तो फेकून देवू नये, तोही वापरावा.
४) कढईत तेल तापवून मोहोरी, जिरे, हिंग, हळद घालून फोडणी करावी. मिरची परतावी. नंतर कांदा-वांग्याचे मिश्रण घालून २-३ मिनीटे परतावे. कोथिंबीरीने सजवून भाकरीबरोबर सर्व्ह करावे.

टीप:
१) वांगं भाजण्यासाठी बाजारात जो फायर स्टार्टर लॉग मिळतो तो वापरला नव्हता कारण तो बनवण्यासाठी कोणत्या गोष्टी किंवा रसायनं वापरतात ते माहीत नसतं. म्हणून झाडाच्या तुटलेल्या फांद्याच वापरल्या होत्या.

सफरचंद डाळींब रायता - Apple Pomegranate Raita

Apple Pomegranate Raita in English

४ ते ६ जणांसाठी
वेळ: १० ते १५ मिनीटे

साहित्य:
१ कप डाळींबाचे दाणे
१ कप बारीक चिरलेले लाल सफरचंद (टीप)
१/२ कप दही
१ टेस्पून दूध
१ हिरवी मिरची, बारीक चिरून
१ टिस्पून साखर
१ टेस्पून कोथिंबीर, बारीक चिरून
चवीपुरते मिठ

कृती:
१) दही आणि दूध एकत्र घोटून घ्यावे. लागल्यास एखादा चमचा दूध घालावे. यामध्ये बारीक चिरलेले सफरचंद घालून मिक्स करावे.
२) आता डाळींबाचे दाणे, हिरवी मिरची, कोथिंबीर, साखर आणि मिठ घालून व्यवस्थित मिक्स करावे. तासभर फ्रिजमध्ये गार करावे. जेवणामध्ये तोंडीलावणी म्हणून सर्व्ह करावे.

टीप:
१) सफरचंद आधीच कापून ठेवू नये, काळे पडते. दही घोटल्यावर मग सफरचंद चिरायला घ्यावे आणि थोडे चिरून झाले कि दह्यात घालावे, म्हणजे सफरचंद काळे पडणार नाही.

फरसबी कोशिंबीर - Farasbi Koshimbir

Farasbichi Koshimbir in English

वाढणी: २ जणांसाठी
वेळ: १३ ते २० मिनीटे

साहित्य:
१ कप पातळ चिरलेली फरसबी (गोल चकत्या)
१ हिरवी मिरची
१/२ ते १ टिस्पून लिंबाचा रस
२ टेस्पून दाण्याचा कूट
२ टेस्पून ताजा खोवलेला नारळ
२ टेस्पून कोथिंबीर, बारीक चिरलेली
चवीपुरते मिठ
चवीपुरती साखर (साधारण १/२ टिस्पून)

कृती:
१) पातळ चिरलेली फरसबी कूकरमध्ये पाणी न घालता वाफवून घ्यावी. (टीप १)
२) मिरची बारीक चिरून त्यात चिमटीभर मिठ घालावे आणि मिरची व्य्वस्थित चुरडून घ्यावी.
३) वाफवलेली फरसबी एका वाडग्यात घ्यावी त्यात चुरडलेली मिरची, दाण्याचा कूट, नारळ, कोथिंबीर, मिठ, साखर घालून मिक्स करावे. चव पाहून कमी असलेला जिन्नस आवडीप्रमाणे घालावा.
जेवणात हि कोशिंबीर तोंडीलावणी म्हणून छान लागते.

टीप:
१) 'फरसबी पाणी न घालता शिजवावी' म्हणजे कूकरच्या तळाशी १ भांडे पाणी घालावे. तळाशी कूकरची जाळी असेल तर ती ठेवावी. कूकरच्या आतील डब्यात चिरलेली फरसबी ठेवावी व या डब्यात पाणी घालू नये. कूकर लावून साधारण १ ते २ शिट्ट्यांवर फरसबी शिजू द्यावी.
२) फोडणी न घालता ही कोशिंबीर छानच लागते, पण जर तुम्हाला जिर्‍याची फोडणी घालायची असेल तर, कढल्यात तूप गरम करून त्यात जिरे आणि हिंग घालून हि फोडणी तयार कोशिंबीरीत घालावी. आणि चमच्याने छान मिक्स करावे.
३) आवडत असल्यास थोडे दही घातले तरी छान चव येते. दही घातल्यास किंचीत मिरचीचे प्रमाण वाढवावे.

Labels:
Farasbi koshimbir, Maharashtrian Koshimbir recipes, Raita recipes

पाइनॅपल रायता - Pineapple Raita

Pineapple Raita in English

वाढणी : २ जणांसाठी

साहित्य:
३/४ कप अननस लहान फोडी
१ कप दही
१/८ टिस्पून जिरेपूड
चवीपुरते मिठ
१ टेस्पून साखर
१ लहान हिरवी मिरची (ऐच्छिक)
१ टिस्पून कोथिंबीर
१ चेरी सजावटीसाठी (ऐच्छिक)
४ ते ५ अननसाचे लहान तुकडे सजावटीसाठी

कृती:
१) दही चांगले फेटून घ्या. त्यात साखर आणि थोडे मिठ घालावे. जर थोडा तिखटपणा हवा असेल तरच मिरची घालावी.
२) फेटलेल्या दह्यात अननसाच्या फोडी घालाव्यात. चव पाहून साखर मिठ आवडीनुसार वाढवावे, मिक्स करावे. सर्व्हींग बोलमध्ये घालून त्यावर जिरेपूड भुरभूरावी. नंतर अननसाच्या फोडी, कोथिंबीर आणि चेरीने सजवावे. थोडावेळ थंड करून सर्व्ह करावे.

टीप:
१) जर फक्त गोड रायते हवे असेल तर हिरवी मिरची वगळावी.
२) काही जणांना गोड रायते आवडते. त्यांनी आवडीनुसार साखर वाढवावी.
३) किंचीत मिरपूड घातल्याने छान स्वाद येतो. फक्त ती सर्व्ह करण्याआधी दह्यात मिसळू नये, त्यामुळे दह्याचा रंग बदलेल. म्हणून जिरपूडसारखीच वरून भुरभूरावी.

बुंदी रायता - Boondi Raita

Boondi Raita in English

वाढणी: ३-४ जणांसाठी


साहित्य:
१ कप बुंदी (साधी)
३/४ कप पातळ ताक
३/४ कप दही
१/४ कप दूध
चवीपुरते मिठ
१/४ टिस्पून मिरपूड
::इतर जिन्नस::
१/२ टिस्पून जिरेपूड
१/४ टिस्पून लाल तिखट
१/४ टिस्पून चाट मसाला
२ टेस्पून बुंदी (न भिजवलेली)
थोडीशी कोथिंबीर

कृती:
१) सर्वप्रथम बुंदी ताकामध्ये साधारण २० मिनीटे भिजवून ठेवावी. २० मिनीटांनंतर बुंदी चेपून त्यातील ताक काढून टाकावे. खुप जास्त जोरात पिळू नये नाहीतर बुंदी मोडू शकते. ताक पुढील वापरासाठी ठेवून द्यावे.
२) ३/४ कप दही फेटून घ्यावे त्यात दूध, चवीपुरते मिठ आणि मिरपूड घालून निट ढवळून घ्यावे. मिठ थोडे कमीच घालावे कारण विकतच्या बुंदीमध्ये अगोदरच थोडे मिठ असते. दह्यात बुंदी घालून मिक्स करावे. जर मिश्रण खुप घट्ट वाटले तर किंचीत उरलेले घालून मिक्स करावे.
३) चव पाहून रायते सर्व्हींग प्लेटमध्ये घालावे. वरून जिरेपूड व किंचीत लाल तिखट भुरभूरवावे. मध्यभागी थोडी बुंदी घालावी. रायते खाताना मधेमधे थोडी कुरकूरीत बुंदी छान लागते. कुरकूरीत बुंदीवर अजून थोडे लाल तिखट, चाट मसाला व कोथिंबीर भुरभूरवावी. अर्धा एक तास फ्रिजमध्ये थंड करण्यास ठेवावे.
जेवताना थंड असे बुंदी रायते सर्व्ह करावे.

टीप:
१) जर आवडत असेल तर रायते आणि seasonings एकत्र मिक्स करू शकतो, पण रायत्याचा रंग लालसर होतो, चवीत फार फरक पडत नाही.
२) रायते थंड आवडत नसेल तर रेफ्रिजरेट न करताही सर्व्ह करू शकतो, छानच लागते.

Labels:
Boondi Raita, Dahi Boondi, Bundi raita, yogurt and fried gram flour snack

भोपळा भरीत - Lal Bhoplyache Bharit

Bhoplyache Bharit in English

वाढणी: २ ते ३ जणांसाठी


साहित्य:
२ कप लाल भोपळ्याच्या मध्यम फोडी (साल काढून)
१/२ टिस्पून तूप
१/२ टिस्पून जिरे
३ हिरव्या मिरच्या, उभ्या चिरून
१/४ कप कोथिंबीर, बारीक चिरून
१/२ ते ३/४ कप दही
चवीनुसार मिठ, साखर

कृती:
१) भोपळ्याच्या फोडी कूकरमध्ये उकडून घ्याव्यात. थंड झाल्यावर चमच्याने मॅश करून घ्याव्यात. खुप गुठळ्या राहू देवू नये.
२) लहान कढल्यात तूप गरम करावे. तूप गरम झाले कि जिरे आणि मिरच्या घालून फोडणी करून उकडलेल्या भोपळ्यात घालावी. चवीनुसार मिठ आणि किंचीत साखर घालावी. दही आणि कोथिंबीर घालून निट मिक्स करावे.

टीप:
१) हे भरीत उपवासालाही चालते. उपवासाव्यतिरिक्त दिवशी फोडणीत हळद, हिंग, मोहोरी घातली तरी चालते.
२) शेंगदाण्याचा कूट घातल्यास चव छान येते.

Labels:
Bhoplyache Bharit, Bhopala Bharit, Pumpkin Raita, Kaddu Raita

बिटाची कोशिंबीर - Beetachi Koshimbir

Beetroot salad in English


साहित्य:
३/४ कप किसलेले बिट (साधारण १ बिट)
१/४ कप बारीक चिरलेला कांदा
१/४ कप बारीक चिरलेला टोमॅटो
१/२ टिस्पून जिरेपूड
१ टेस्पून शेंगदाणा कूट
१ टेस्पून कोथिंबीर, बारीक चिरून
१ टिस्पून लिंबाचा रस
मिठ साखर चवीनुसार

कृती:
१) बिट शक्यतो कच्चेच घ्यावे, पण कच्च्या बिटाची चव आवडत नसेल तर कूकरमध्ये १ शिट्टी करून अगदी थोडेच शिजवून घ्यावे. जास्त शिजवू नये.
२) बिटाचे साल काढून बिट किसून घ्यावे. त्यामध्ये वरील जिन्नस एकत्र करून चमच्याने एकजीव करून घ्यावे.

जेवणात हि बिटाची कोशिंबीर तोंडीलावणी म्हणून छान लागते.

Labels:
Beetroot raita, Beetachi koshimbir, beetroot recipe, beetroot salad recipe

रशियन सलाड - Russian Salad

Russian Salad (English Version)



साहित्य:
१/४ कप मटार
१/४ कप गाजर, (सोलून लहान चौकोनी तुकडे)
१/४ कप शिजलेला बटाटा (सोलून लहान फोडी)
१/४ कप पाती कांदा (बारीक चिरून)
१/४ कप काकडी (सोलून लहान चौकोनी फोडी)
१/४ कप टोमॅटो, बारीक चिरून
१/४ कप लाल सफरचंद (चौकोनी लहान फोडी)
१/४ कप अननसाचे तुकडे (चौकोनी लहान फोडी)
२ टेस्पून साखर
१/४ टिस्पून मोहोरी पावडर
२ टेस्पून व्हाईट सॉस
२ टेस्पून मेयॉनिज (एगलेस)
१/४ टिस्पून मिरपूड
कोथिंबीर सजावटीसाठी

कृती:
१) मटार आणि गाजराचे तुकडे वाफवून घ्यावे.
२) व्हाईट सॉस, साखर, मोहोरी पावडर एकत्र करून निट मिक्स करून घ्यावे. सर्व चिरलेल्या भाज्या व फळे एकत्र एका वाडग्यात घ्यावे. व्हाईट सॉस, साखर, मोहोरी पावडरचे मिश्रण त्यात घालून निट मिक्स करावे. मेयॉनिज घालून मिक्स करावे.
३) वरून थोडी मिरपूड घालावी. सर्व्हींग बोलमध्ये घालून फ्रिजमध्ये किमान अर्धा तास थंड करावे. जेवणाच्या वेळी थंड असे रशियन सलाड सर्व्ह करावे.

टीप:
१) जर मेयॉनिज वापरायचे नसेल तर दही सुती फडक्यात बांधून, एक तासभर टांगून ठेवावे. त्यातील पाणी निघून गेले कि घट्टसर भाग मेयॉनिज म्हणून वापरावा. दही शक्यतो फार आंबट नसावे.

Labels:
Russian Salad, Salad Recipe, Russian salad Recipe, quick and easy salad, healthy salad recipe

दह्यातील रायते - Dahi Rayate

रायते (English Version)



साहित्य:
काकडी : १/४ कप (सोलून चोचवणे)
कांदा : १/८ कप, बारीक चिरून
सिमला मिरची: १/४ कप, एकदम लहान चौकोनी तुकडे
टोमॅटो : १/४ कप, एकदम बारीक चिरून
३/४ कप दही (Fatfree)
१/८ कप दूध (Skimmed)
१ हिरवी मिरची बारीक चिरून
कोथिंबीर : २ टेस्पून बारीक चिरून
१/४ टिस्पून साखर
१/८ टिस्पून चाट मसाला
१/८ टिस्पून जिरेपूड
चवीनुसार मिठ

कृती:
१) सोललेली काकडी, कांदा, सिमला मिरची आणि टोमॅटो एकाच आकारात बारीक चिरून घ्यावे.
२) दही घोटून घ्यावे. दही पातळ करण्यासाठी पाणी न वापरता दूध वापरावे ज्यामुळे रायतं पांचट लागणार नाही. घोटलेल्या दह्यात दूध घालून ते थोडे पातळ करून घ्यावे.
३) या दह्यात कोथिंबीर, साखर, चाट मसाला, जिरेपूड, चवीनुसार मिठ घालावे व निट मिक्स करून घ्यावे.
४) दह्याच्या मिश्रणात चिरलेले काकडी, कांदा, सिमला मिरची आणि टोमॅटो घालून ढवळावे. फ्रिजमध्ये थंड करण्यस ठेवावे.
हे रायते तवा पुलावबरोबर खुप मस्त लागते.

Labels:
Dahi Raita, Yogurt Raita, Dahyatli Koshimbir, Indian salad Recipe, Mix veg salad, Mix veg Raita recipe

खमंग काकडी - Khamang Kakdi

Khamang Kakadi (English version)

वाढणी : ३-४ जणांसाठी



साहित्य:
२ कप चोचवलेली काकडी (कृती - क्र. १)
३ हिरव्या मिरच्या बारीक चिरून
१ टिस्पून लिंबाचा रस
१/२ टिस्पून तूप
१/४ टिस्पून जिरे
३ ते ४ टेस्पून शेंगदाण्याचा कूट
२ टेस्पून चिरलेली कोथिंबीर
१ टिस्पून साखर
चवीपुरते मिठ

कृती:
१) काकडीची शेवटची दोन टोके कापावीत, आधी काकडी कडू नाहीये ना! हे चव घेवून पाहावे. नंतर काकडी सोलून चोचवून घ्यावी. चोचवलेल्या काकडीला थोडे मिठ चोळून एका वाडग्यात ठेवावे. मिठामुळे काकडीला पाणी सुटेल. हे पाणी काढून टाकावे तसेच चोचवलेली काकडी दोन्ही हाताने पिळून त्यातील अधिकचे पाणी काढून टाकावे. अशी पाणी काढून पिळलेली टाकलेली काकडी आपल्याला २ कप लागेल.
२) ही काकडी वाडग्यात घेऊन त्यात शेंगदाण्याचा कूट, चिरलेली कोथिंबीर, साखर घालून मिक्स करावे.
३) कढल्यात तूप गरम करून त्यात जिरे आणि चिरलेल्या मिरच्यांतील थोडी मिरची घालून फोडणी करावी व काकडीत घालावी.
४) उरलेली मिरची एका वाटीत घ्यावी. त्यात अगदी किंचीत मिठ घालावे (कारण आधीच काकडीला मिठ लावले आहे). चमच्याने किंवा हाताने चुरडावी आणि काकडीला लावावी. लिंबाचा रस घालून मिक्स करावे.
हि चविष्ट अशी खमंग काकडी उपवासाला किंवा इतर दिवशीही कोशिंबीर म्हणून जेवणात समाविष्ट करू शकतो.

Labels:
Cucumber Salad, kakadi Koshimbir recipe, Cucumbar Raita, Indian cucumber Raita