व्हाईट सॉस - White Sauce

White Sauce in English



वेळ: १० मिनिटे

साधारण १ कप व्हाईट सॉस



साहित्य:

२ टेस्पून बटर

३ टेस्पून मैदा

दीड कप गरम दूध

२ चिमटी मीठ

१ टीस्पून साखर



कृती:

१) पॅनमध्ये बटर गरम करावे. बटर वितळले कि मैदा घालून मध्यम आचेवर एक-दोन मिनिटे परतावे. सतत परत राहा. परतायचे थांबल्यास मैदा जळेल. मैद्याचा रंग हलका गुलाबी आला पाहिजे. जास्त गडद रंग आल्यास सॉसचाही रंग बदलेल.

२) मैदा परतल्यावर त्यात गरम दुध घालून ढवळावे म्हणजे गुठळ्या होणार नाहीत. सॉस दाट होईतोवर ढवळावे.

३) मीठ आणि साखर घालून मिक्स करावे. गॅस बंद करून व्हाईट सॉस लगेच वापरावा.

लसूण चटणी - Garlic Chutney

Garlic Chutney in English

वेळ: १० मिनिटे
साधारण १/२ कप चटणी

साहित्य:
१० मोठ्या लसूण पाकळ्या किंवा १ मध्यम लसणीचा गड्डा
चवीपुरते मीठ (साधारण १/२ टीस्पून)
४ ते ५ टेस्पून भाजलेल्या शेंगदाण्याचा कूट (भरड)
१/२ टीस्पून आमचूर पावडर
१ टीस्पून लाल तिखट
२ टेस्पून तेल

कृती:
१) लसूण सोलून चिरून घ्यावी. खलबत्ता तयार ठेवावा. त्यात १ टीस्पून लाल तिखट घालून ठेवावे.
२) फोडणीसाठी लहान कढले घेऊन त्यात तेल गरम करावे. तेलात लसूण घालून लसूण थोडी ब्राऊन होईस्तोवर परतावी. हि फोडणी लाल तिखटावर घालावी आणि चमच्याने ढवळावे. (टीप १)
३) या मिश्रणात मीठ, शेंगदाणे कूट, आमचूर पावडर घालावी आणि चांगले कुटून काढावे.
हि चटणी पराठा, डोसा, किंवा नेहमीच्या जेवणात तोंडीलावणी म्हणून खाऊ शकतो.

टीप:
१) लाल तिखट फोडणीत घालू नये कारण तेल आणि कढले दोन्ही गरम असल्याने लाल तिखट करपण्याची शक्यता असते. म्हणून लाल तिखट खलबत्त्यात घालून त्यावर तेल ओतावे.

कैरीचे रायते - Kairiche Raite

Kairi Raita in English

वेळ: १० मिनीटे
साधारण १ कप

साहित्य:
१ कप कैरीचा गर (कृती - स्टेप १)
१/२ कप गूळ
१/२ टिस्पून लाल तिखट
चवीपुरते मिठ
१ टिस्पून तेल
२ कढीपत्त पाने
१/४ टिस्पून जिरे
चिमूटभर हिंग
१ लाल मिरची

कृती:
१) कूकरमध्ये १ कप पाणी घालावे. कूकरच्या डब्यात पाणी न घालता आख्खी कैरी ठेवावी. २ ते ३ शिट्ट्या करून कैरी वाफवून घ्यावी. कूकरची वाफ जिरली कि लगेच कैरी बाहेर काढून गरम असतानाच त्यातील गर काढून घ्यावा.
२) या गरामध्ये गूळ कुस्करून घालावा.
३) या मिश्रणात लाल तिखट आणि चवीपुरते मिठ घालावे. तेल, जिरे, हिंग, कढीपत्ता आणि लाल मिरची घालून फोडणी करावी. हि फोडणी कैरीच्या गरावर घालावी.
सर्व निट मिक्स करून जेवणात तोंडीलावणी घ्यावे.

टीप:
१) आवडीनुसार गुळाचे प्रमाण कमीजास्त करावे.

खजूर चटणी - Dates Chutney

Dates Chutney in English

साधारण १ कप चटणी
वेळ: १० मिनीटे


साहित्य:
१५० ग्राम खजूर (pitted baking dates) (टीप १)
लिंबाएवढा चिंचेचा गोळा (बिया काढून)
१/४ कप किसलेला गूळ (ऐच्छिक) (टीप २)
१ हिरवी मिरची किंवा १/४ चमचा लाल तिखट
४ ते ५ पुदीना पाने
१ टिस्पून धणेपूड
१/२ टिस्पून जिरेपूड
२ चिमटी काळे मिठ
चिमूटभर साधं मिठ

कृती:
१) चिंच, १/२ कप गरम पाण्यात भिजवून ठेवावी. किंवा १/२ कप पाणी उकळावे. पाणी उकळले कि गॅस बंद करावा. त्यात चिंच भिजवून ठेवावी आणि वरून झाकण ठेवून १/२ तास तसेच ठेवावे.
२) चिंचेचे पाणी कोमट झाले कि मिक्सरमध्ये पेस्ट करून घ्यावी. बारीक गाळण्याने व्यवस्थित गाळून घ्यावे आणि चोथा वेगळा करावा.
३) मी बिया काढलेले आणि अगोदरच मॅश केलेले खजूर वापरले होते. यामध्ये काही चमचे पाणी घालून हातानेच मॅश करावे.
४) मिक्सरमध्ये हिरवी मिरची, पुदीना, मॅश केलेला खजूर, चिंचेचा कोळ, गूळ, धणे-जिरेपूड, काळं मिठ, आणि साधं मिठ घालावे. सर्व एकत्र मिक्सरवर बारीक करावे.
हि चटणी चाट पदार्थांबरोबर, समोसा किंवा भज्यांबरोबर खुप चविष्ट लागतो. - चाट पदार्थांच्या रेसिपीजसाठी इथे क्लिक करा.

टीप:
१) जर तुम्ही साधे खजूर वापरणार असाल तर साधारण १३ ते १५ खजूर वापरावे. आधी त्यातील बिया काढून टाका. नंतर अगदी थोड्या कोमट पाण्यात साधारण दिड-दोन तास भिजवून ठेवावेत. पाणी बाजूला काढावे आणि खजूर मिक्सरमध्ये बारीक वाटून घ्यावेत. वाटताना बाजूला काढलेल्या पाण्यातील थोडेसेच पाणी वापरावे.
२) कधीकधी खजूराचा गोडपणा चटणीला तेवढा गोडपणा देत नाही. या चटणीत गोडपणा वाढवण्यासाठी मी यात गूळ वापरला आहे. त्यामुळे गूळ घालण्याच्या आधी चव पाहावी आणि गरज वाटल्यासच गूळ घालावा. तसेच गूळाऐवजी साखरही वापरू शकतो.

Labels:
Tamarind Chutney, Sweet and sour chutney, dates chutney, Khajoor Chutney, Mithi chutney.

उडदाचे डांगर - Urad Dangar

Urad Dal Dangar (Powder) in English

कोकणात हे डांगर तोंडीलावणी म्हणून वापरतात.

साहित्य:
दिड कप उडीद डाळ (शक्यतो सालासकट)
१ टेस्पून जिरे
१/२ टेस्पून हिंग
५-६ लाल सुक्या मिरच्या
१/२ टेस्पून तेल

कृती:
१) उडीद डाळ खमंग भाजून घ्यावी. लाल मिरच्यांचे तुकडे १/२ चमचा तेलावर भाजून घ्यावे. जर बिया नको असतील तर त्यातील बिया काढून टाकाव्यात.
२) भाजलेली उडीदडाळ, १ टेस्पून जिरे, १/२ टेस्पून हिंग आणि भाजलेल्या लाल मिरच्या एकत्र करून बारीक दळून आणावे.

१ चमचा डांगरात दही, कांदा किंवा लसूण आणि मिठ घालून तोंडीलावणी म्हणून खायला छान लागते.

डोसा पोडी - Dosa Podi

Dosa Podi in English

साधारण १/२ कप
वेळ: २० मिनीटे



संबंधित पाककृती:
मसाला डोसा
उडीपी सांबार
मूगाचा डोसा

साहित्य:
१/४ कप उडीद डाळ
१/४ कप चणा डाळ
७ ते ८ सुक्या लाल मिरच्या
६ ते ७ कढीपत्ता पाने
१ टिस्पून तेल
चवीपुरते मिठ

कृती:
१) चणाडाळ आणि उडीद डाळ वेगवेगळ्या भाजून घ्याव्या. गुलाबी रंग येईस्तोवर परतावे. खुप जास्त गडद भाजू नये.
२) १ टिस्पून तेल गरम करून त्यात लाल मिरच्या आणि कढीपत्ता घालून काही सेकंद परतावे.
३) चणाडाळ, उडीद डाळ, लाल मिरच्या कढीपत्ता आणि मिठ मिक्सरमध्ये बारीक करावे. एकदम पिठ करू नये अगदी किंचीत भरड ठेवावे. डाळीचा बारीक रवा डोशाबरोबर चांगला लागतो.
हि पूड डोशावर भुरभूरावी.

टीप:
१) जर तुम्हाला डोसा पूड अजून तिखट हवी असेल तर १ टीस्पून लाल तिखट घालून मिक्स करावे.

Labels:
Dosa Podi recipe, South Indian Podi recipe

मिरचीचा खरडा - Mirchi Kharda

Mirchi Kharda in English

२ टेस्पून खरडा
वेळ: १० मिनीटे

साहित्य:
१५ हिरव्या मिरच्या,
६ ते ७ लसणीच्या पाकळ्या
१/२ टिस्पून मिठ
१/२ टिस्पून तेल

कृती:
१) मिरच्यांची डेखं काढून घ्यावीत, लसूण सोलून घ्यावीत. पॅन गरम करण्यास ठेवावा. २-३ चमचे पाणी घालावे, मिरच्या आणि लसूण घालून मंद आचेवर साधारण ५ मिनीटे झाकण ठेवून वाफ काढावी.
२) वाफ काढली कि झाकण काढून मिरच्या-लसूण कोरडे करून घ्यावे. गार झाले कि मिठ घालून खलबत्त्यात कुटून घ्यावे.
३) तेल गरम करून कुटलेला ठेचा थोडावेळ परतून घ्यावा.
हा खरडा भाकरीबरोबर सुरेख लागतो.

टीप:
१) ही बेसिक खरड्याची कृती आहे. यामध्ये आवडीनुसार कोथिंबीर, जिरे, हिंग (तेलात घालावे) घालून शकतो. तसेच थोडा शेंगदाण्याचा कूटही घालता येतो (फक्त परत एकदा कुटावे). काही लोकांना भाजलेले तिळही घालायला आवडतात.

Labels:
Mirchi Kharda, Mirchi Thecha, Green Chili Thecha

पास्ता सॉस - Homemade Pasta Sauce

Pasta Sauce in English

साधारण १ कप पास्ता सॉस
वेळ: ३५ मिनीटे
साहित्य:
६ टोमॅटो
२ टेस्पून रेडीमेड टोमॅटो पेस्ट
३ टेस्पून ऑलिव ऑईल
४ मोठ्या लसूण पाकळ्या, पातळ चकत्या
१/४ कप कांदा, उभा पातळ चिरून
१/२ टिस्पून लाल तिखट
१ टिस्पून ड्राय ओरेगानो
२ चिमटी मिरपूड
मीठ
पास्ता कसा बनवावा?

कृती:
१) प्रत्येक टोमॅटोचे दोन तुकडे करा. मोठ्या बेकिंग ट्रेमध्ये १ टेस्पून ऑलिव ऑईल घालून हाताने पसरवून घ्या. टोमॅटोची चिरलेली बाजू प्लेटला लागेल अशा रितीने ठेवा त्याच भांड्यात लसूण पेरा.
२) दुसर्‍या छोट्या बेकिंग भांड्यात कांदा आणि थोडे तेल असे मिक्स करा. ओव्हन ४०० F वर प्रिहीट करून टोमॅटो आणि कांदा-लसूण १५ मिनीटे बेक करा. दोन्ही भांडी मधल्या कप्प्यावर ठेवा. मधेमधे कांदा आणि लसूण जळत नाहीत ना हे चेक करा.
३) बेक झाल्यावर टोमॅटोला पाणी सुटलेले असेल. कांदा लसणीचा रंग किंचीत बदलला असेल. सर्व गार झाले कांदा बारीक चिरून बाजूला ठेवावा. टोमॅटो आणि लसूण मिक्सरमधून बारीक करून घ्यावे.
४) पॅनमध्ये ऑलिव ऑईल किंचीत गरम करावे त्यात लाल तिखट, कांदा घालून परतावे. नंतर टोमॅटोचे मिश्रण घालावे, ढवळावे. टोमॅटोची पेस्ट घालावी. निट मिक्स करावे आणि मंद आचेवर १०-१५ मिनीटे शिजू द्यावे.
५) सॉस थोडा दाट झाला कि त्यात ओरेगानो, मिरपूड आणि मिठ घालावे २ मिनीटे मंद आचेवर उकळू द्यावे. काचेच्या बरणीत काढून ठेवावा.
हा सॉस साधारण ५ ते ६ जणांच्या सर्व्हींगसाठी उपयोगी पडेल.

टीप:
१) टोमॅटो पेस्टमुळे रंग छान येतो. जर टोमॅटो पेस्ट मिळत नसेल तर थोडा टोमॅटो केचप जो फार गोड नसेल असा वापरू शकतो. पण यामुळे चवीत किंचीत फरक पडेल.
२) जर ओरेगानो हर्ब मिळत नसेल तर बेसिल किंवा थाईमही या सॉसमध्ये वापरू शकतो, प्रत्येक हर्बची चव वेगवेगळे असते त्यामुळे चवीत हर्बच्या फ्लेवरनुसार फरक पडेल.

Labels:
pasta sauce, tomato pasta sauce, Oregano pasta sauce

नारळाची चटणी - Coconut Chutney

Coconut Chutney in English

वेळ: ५ मिनीटे
साधारण १ कप
साहित्य:
१ कप ताजा खवलेला नारळ
१/४ कप चण्याचं डाळं
चवीपुरते मिठ
१/४ टिस्पून साखर
१ हिरवी मिरची
फोडणीसाठी
१/२ टिस्पून तेल
१/८ टिस्पून मोहोरी
१/२ टिस्पून उडीद डाळ
१/८ टिस्पून हिंग
५ ते ७ कढीपत्ता पाने
१ सुकी लाल मिरची
१/८ आले पेस्ट

कृती:
१) नारळ, डाळं, हिरवी मिरची, मिठ आणि साखर मिक्सरमध्ये बारीक करून घ्या. त्यात गरजेपुरते पाणी घालून एकजीव वाटून घ्या. हे मिश्रण एका लहान वाडग्यात काढावे.
२) कढले गरम करून त्यात तेल घालावे. तेल तापले कि त्यात मोहोरी आणि उडीद डाळ घाला. उडीद डाळ लालसर झाली कि हिंग, कढीपत्ता, लाल मिरची, आणि आलेपेस्ट घालून फोडणी करून घ्या. हे मिश्रण नारळाच्या मिश्रणावर घाला. मिक्स करून हि चटणी इडली, मेदू वडा, मसाला डोसा, उत्तपा, आप्पे आणि इतर दाक्षिणात्य पदार्थांबरोबर सर्व्ह करा.

टीप:
१) वरील चटणीची रेसिपी उडीपी हॉटेलमध्ये मिळते तशा पद्धतीची आहे. आपल्या आवडीनुसार यामध्ये चिंच, लिंबू, दही, जिरे असे आवडीप्रमाणे घालावे.
२) चटणी प्रकार २

Labels:
coconut chutney, South Indian Chutney

नारळाची चटणी - Coconut Chutney

Coconut Chutney in English

साधारण ३/४ ते १ कप चटणी
वेळ: ५ मिनीटे

साहित्य:
१/२ नारळ खोवून
२ तिखट हिरव्या मिरच्या
१/२ कप कोथिंबीर, चिरून
१/४ टिस्पून जिरे
१/२ लिंबाचा रस
चवीपुरते मिठ
१/२ टिस्पून साखर

कृती:
१) जिरे किंचीत भाजून, कुटून घ्यावे. यामुळे स्वाद छान येतो.
२) खवलेला नारळ, हिरव्या मिरच्या, कोथिंबीर, भाजके जिरे, लिंबू रस, मिठ आणि साखर मिक्सरमध्ये एकत्र वाटून घ्यावे. थोडी सरसरीत चटणी हवी असेल तर २ ते ४ टेस्पून पाणी घालावे.
चटणीत २-४ मिरच्या वाढवून त्यात थोडे दही घालावे. दह्याचा स्वादही छान लागतो.

ही चटणी इडली, आप्पे, मेदू वडा आणि इतर तिखट मिठाच्या दाक्षिणात्य पदार्थंबरोबर छान लागते.

Labels:
Coconut Chutney, Naralachi chutney

मेथांबा - Methamba

Methamba in English

साधारण १/४ ते १/२ कप मेथांबा
वेळ: साधारण ३० मिनीटे

Health Tip: Health benefits of Methi (Fenugreek) Seeds

साहित्य:
१ कप सोललेल्या कैरीचे लहान तुकडे
१/२ कप गूळ
१/२ टिस्पून मेथी दाणे
१ टिस्पून तेल
१/८ टिस्पून मोहोरी
१/४ टिस्पून हळद
१/२ टिस्पून लाल तिखट, किंवा चवीनुसार
चवीपुरते मिठ

कृती:
१) लहान पातेल्यात तेल गरम करावे, मेथी दाणे घालून परतावे. मेथीदाणे परतले गेले कि त्यात मोहोरी, हिंग, हळद, आणि लाल तिखट घालून फोडणी करावी. लगेच कैरीच्या फोडी घालून मंद आचेवर कैरी नरम होईस्तोवर वाफ काढावी. गरज वाटल्यास थोडे पाणी घालावे. चवीपुरते मिठ घालावे.
२) कैरीच्या फोडी शिजल्या कि त्यात गूळ आणि थोडे पाणी घालावे. मंद आचेवर मिश्रण घट्टसर होईस्तोवर शिजू द्यावे. पाक आवडीनुसार घट्ट किंवा पातळ ठेवावा.

Labels:
Mango relish, Methamba

पुदीना चटणी - Mint Chutney

Mint Chutney in English

वाढणी: २ जणांसाठी

साहित्य:
१/२ कप पुदीना पाने
१/२ कप कोथिंबीर
१/४ कप बारीक चिरलेला कांदा
२ लसूण पाकळ्या (ऐच्छिक)
२ हिरव्या मिरच्या
१/२ टिस्पून जिरे
१/२ टिस्पून लिंबाचा रस
चवीपुरते मिठ
१/४ टिस्पून साखर

हि चविष्ट चटणी व्हेज. सॅंडविच, मटार खस्ता कचोरी, सोया कटलेट्स, मेथीच्या देठाची भजी, ब्रेड रोल, मटार बटाटा करंजी, पट्टी समोसा, ढोकळा आणि इतर मधल्या वेळच्या पदार्थांसोबत छानच लागते.

कृती:
१) सर्व साहित्य एकत्र करून मिक्सरमध्ये बारीक वाटून घ्यावे. गरज वाटल्यास २ ते ३ टेस्पून पाणी घालून वाटून घ्यावे.

टीप:
१) आंबट चवीकरीता लिंबाऐवजी आपण अनारदाना किंवा चिंचेचे पाणी वापरू शकतो, पण लिंबाची चव जास्त चांगली लागते तसेच लिंबू दैनंदिन वापरासाठी बहुतेकवेळा स्वयंपाकघरात असतेच.
२) कांदा घातल्याने चटणीला छान स्वाद येतोच तसेच चटणीला दाटपणा येतो.

Labels:
Mint chutney, Pudina Chutney, Pudine ki chatney

टोमॅटो चटणी - Tomato Chutney

Tomato Chutney in English

वाढणी: ४ ते ५ जण (१/२ ते ३/४ कप)

हि चटणी इडली, डोसा, उत्तप्पा तसेच पेसरट्टू (मूगाचा डोसा) अशा पदार्थांबरोबर छान लागते.


साहित्य:
३ मध्यम टोमॅटो, मोठे चौकोनी तुकडे (Know more: health benefits of Tomato)
४ टेस्पून शेंगदाणे
२ टिस्पून उडीद डाळ
१ टेस्पून तेल
१/८ टिस्पून हिंग
१/४ टिस्पून मोहोरी
५ ते ६ सुक्या लाल मिरच्या, तोडून घ्याव्यात
१/२ टिस्पून साखर
चवीपुरते मिठ

कृती:
१) पॅनमध्ये तेल गरम करून त्यात मोहोरी घालावी. मोहोरी तडतडली कि त्यात हिंग आणि शेंगदाणे घालावेत. शेंगदाणे मध्यम आचेवर परतावेत. शेंगदाणे थोडे ब्राऊन होवू द्यावेत.
२) शेंगदाणे थोडे ब्राऊन झाले कि त्यात उडीद डाळ घालावी. उडीद डाळ आणि लाल मिरच्या ब्राऊन होईस्तोवर परतावे (साधारण १५ ते २० सेकंद). नंतर त्यात टोमॅटो घालून साधारण २ ते ३ मिनीटे परतावे. पॅनवर झाकण ठेवावे म्हणजे टोमॅटो पटकन शिजतील.
३) गॅस बंद करून मिश्रण थंड होवू द्यावे. थंड झालेल्या मिश्रणात चवीनुसार मिठ आणि थोडीशी साखर घालून मिक्सरमध्ये पेस्ट करून घ्यावी. पाणी घालू नये.

Labels:
Tomato chutney, Indian Condiments

कैरीचे इंस्टंट गोड लोणचे - Sweet Mango Pickle

Instant Mango Pickle in English

वाढणी: ३/४ कप

साहित्य:
१/२ ते पाउण कप साल काढलेल्या फोडी (१ सेमी आकाराच्या फोडी)
१/२ कप किसलेला गूळ
१ टेस्पून लाल तिखट
१ टिस्पून मिठ
फोडणीसाठी: १ ते दिड टेस्पून तेल, १/२ टिस्पून मोहोरी, १/४ टिस्पून हिंग, १/४ टिस्पून हळद

कृती:
१) फोडींना आधी १० मिनीटे मिठ चोळून ठेवावे.
२) गूळ एका पातेल्यात घेऊन त्यात एक टेस्पून पाणी घालावे. गूळ पातळ करावा. गूळ पातळ झाला कि लगेच गॅसवरून उतरवावा, कोमट होवू द्यावा. गूळ कोमट झाला कि फोडींवर घालावा, तिखट घालावे आणि ढवळावे.
३) कढल्यात फोडणी करताना, तेल गरम करावे त्यात मोहोरी, हिंग व हळद घालावी. हि फोडणी जरा कोमट झाली कि लोणच्यात घालावी.

हे लोणचे फार दिवस टिकत नाही त्यामुळे थोड्या प्रमाणातच करावे.

Label:
Mango Pickle, Kairiche Lonache, Tangy Pickle

पिझ्झा सॉस - Pizza Sauce

Pizza Sauce in English

साहित्य:
२ मोठे टॉमेटो, लालबुंद
१/४ टिस्पून लाल तिखट
१/२ टिस्पून साखर
१ लहान तुकडा दालचिनी
१/२ टिस्पून आलेलसूण पेस्ट
चवीपुरते मिठ

कृती:
१) टॉमेटो स्वच्छ धुवून घ्यावेत. पातेल्यात टॉमेटो बुडतील इतपत पाणी गरम करून त्यात टॉमेटो घालावेत ५ मिनीटे उकळवावेत. नंतर गॅस बंद करून ५ मिनीटे झाकून ठेवावेत.
२) साले आणि बिया काढून टाकाव्यात आणि टॉमेटोची प्युरी करून घ्यावीत.
३) एका नॉनस्टीक पॅनमध्ये टॉमेटोची प्युरी घालावी आणि त्यात लाल तिखट, साखर, दालचिनी, आलेलसूण पेस्ट, चवीपुरते मिठ घालून मंद आचेवर १० मिनीटे परतावे. दाटसर सॉस तयार झाला कि दालचिनी काढून टाकावी.

पिझ्झा बेसची कृती (Pizza Base)

पिझ्झाची कृती (Paneer Pizza Recipe)

झटपट ब्रेड पिझ्झा

Labels:
Pizza Suace, Tomato Pizza Sauce, How to Make Pizza Sauce

हुम्मूस - Hummus

Hummus and pita bread (English Version)

हुम्मुस (Hummus) हा पदार्थ मिडल इस्टमध्ये बनवला जाणारा चटणीसारखा पदार्थ आहे. या पदार्थात काबुली चणे (छोल्याचे चणे) हे मुख्यत्वे वापरले जातात.
हुम्मुसमध्ये "ताहिनी" (Sesame Paste) म्हणजेच भाजलेले तिळ व ऑलिव्ह ऑइल (Olive Oil) एकत्र वाटून केलेली पेस्ट वापरली जाते, पण थोडे बदल करून खालील कृतीत मी फक्त भाजलेल्या तिळाचा वापर केला आहे.
हुम्मुसबरोबर जोडीला पिटा ब्रेड सर्व्ह केला जातो. पिटा ब्रेडच्या कृतीसाठी इथे क्लिक करा.

वाढणी : साधारण १/२ कप



साहित्य:
१-२ लसूण पाकळ्या
३/४ कप मऊसर शिजवलेले काबुली चणे
१ ते २ टिस्पून भाजलेले तिळ
१ टेस्पून लिंबाचा रस
१/४ कप पाणी
१ टिस्पून ऑलिव्ह ऑइल (टीप १)
१/४ टिस्पून मिरपूड
२ टेस्पून चिरलेली कोथिंबीर
चवीनुसार मिठ

कृती:
१) वरील सर्व पदार्थ मिक्सरमध्ये बारीक वाटून घ्यावेत. डब्यात बंद करून फ्रिजमध्ये काही तास थंड करावे.

टीप:
१) हुम्मुसमध्ये ऑलिव्ह ऑइल हा महत्त्वाचा पदार्थ आहे. मी ऑलिव्ह ऑइल वापरले नव्हते तरीही चव छान लागली, त्यामुळे आपल्या आवडीनुसार याचा वापर करावा.
२) हुम्मुस २-३ दिवस फ्रिजमध्ये सहज टिकते.

Labels:
hummus, pita bread, dip recipe, how to make hummus, chickpea hummus,hummus without oilve oil

हिरवी चटणी, चिंचगूळाची चटणी - Hirvi chatani Chichagulachi Chatani

Green and Tamarind Chutney in ENGLISH

::::हिरवी चटणी::::

वाढणी: १/४ कप

साहित्य:
१/२ कप चिरलेली कोथिंबीर,
६-७ हिरव्या मिरच्या
१/२ टिस्पून जिरेपूड
मीठ

कृती:
१) हिरवी चटणी: मिरची, कोथिंबीर, जिरेपूड आणि मीठ मिक्सरमध्ये थोडे पाणी घालून वाटून घ्यावे.

**--**--**--**--**--**--**--**--**--**--**--**--**--**--**--**--**--**--**--**--**--**
::::चिंचगूळाची चटणी::::

साहित्य:
१/४ ते १/२ कप चिंच
१/२ ते ३/४ कप गूळ
१ टिस्पून जिरेपूड
१ टिस्पून धणेपूड
१ कप पाणी
किंचीत मिठ

कृती:
चिंच १ कप पाण्यात घालून ३ मिनीटे उकळवून घ्यावी. गॅस बंद करून त्यावर झाकण ठेवावे. नंतर गूळ घालून ठेवावा. चिंच-गुळाचे पाणी गार झाल्यावर मिक्सरमध्ये फिरवून घ्यावे आणि गाळण्याने गाळावे. धणे-जिरेपूड आणि मिठ घालून मिक्स करावे.

**--**--**--**--**--**--**--**--**--**--**--**--**--**--**--**--**--**--**--**--**--**

वरील रेसिपी मध्ये खजूरसुद्धा घालू शकतो. पण वेगळी घट्टसर खजुराची चटणी हवी असेल तर पुढील लिंक वर क्लिक करा. - आंबट-गोड खजुराची चटणी

शेजवान सॉस - Schezwan Sauce

Schezwan Sauce in English

वाढणी : साधारण अर्धा कप

हा शेजवान सॉस चायनिज स्टर फ्राईड वेजिटेबल्स बरोबर सर्व्ह करावा तसेच इतर चायनिज पदार्थातही याचा वापर करता येतो.


साहित्य:
१ टिस्पून लसूण पेस्ट
२ टिस्पून चिरलेले लसूण
२ टेस्पून पाती कांदा
१ टेस्पून पाती कांद्याची पाती
१ टेस्पून चिरलेली कोथिंबीर
१ टेस्पून चुरडलेल्या लाल मिरच्या
दिड टेस्पून लाल तिखट
१/३ कप टोमॅटो प्युरी
१ टेस्पून सोया सॉस
दिड टेस्पून व्हिनेगर
२ टेस्पून तेल
१ टिस्पून कॉर्न फ्लोअर
१/४ टिस्पून साखर
१/४ टिस्पून मिरपूड
चवीनुसार मिठ

शेजवान सॉस याही पद्धतीने करता येईल - Schezwan Sauce

कृती:
१) कढईत तेल गरम करावे. त्यात लसूण फोडणीस घालावे, थोडा रंग बदलला पाती कांदा, कोथिंबीर आणि चुरडलेल्या लाल मिरचीची पूड घालून मिक्स करावे. १ ते २ मिनीटे परतावे.
२) नंतर लाल तिखट, टोमॅटो प्युरी, सोया सॉस, व्हिनेगर घालून निट मिक्स करावे. साखर, मिरपूड आणि मिठ घालावे. सर्व एकत्र ढवळून घ्यावे.
३) १ टिस्पून कॉर्न फ्लोअरमध्ये २ टेस्पून पाणी घालावे आणि मिक्स करावे. हे मिश्रण सॉसमध्ये घालावे व ढवळून मध्यम आचेवर १-२ मिनीटे उकळू द्यावे.
सॉस दाटसर झाला कि गॅसवरून उतरवावा. वरून चिरलेल्या पाती घालून मिक्स करावे.

टीप:
१) हा सॉस खुप तिखट असतो त्यामुळे वापरताना गरजेपुरताच वापरावा किंवा लाल तिखटाचे प्रमाण कमी करावे.
२) उरलेला शेजवान सॉस लहान डब्यात भरून फ्रिजमध्ये ६-७ दिवस सहज टिकतो.

Labels:
Schezwan Sauce, szechwan, Sichuan sauce, Chinese Food

आमसूल चटणी - Amsool Chatani

Amsool Chutney (English Version)



साहित्य:
५-६ आमसुलं
आमसुल गोळ्याच्या दुप्पट गूळ
३-४ मिरच्या
जिरं
मीठ

कृती:
१) आमसुलं १५-२० मिनीटे पाव वाटी गरम पाण्यात भिजत ठेवावीत. किंवा आमसुलाचे सार करून झाल्यावर उरलेली आमसुलं वापरावीत.
२) भिजवलेली आमसुलं, गूळ, मिरच्या, जिरं, मिठ एकत्र करून मिक्सरमध्ये वाटून घ्यावी.

Labels:
amsool chutney, amsoolachi chutney, Kokum Chutney

वाटली डाळ

Vatali Chana Dal (English Version)



साहित्य:
१ वाटी चणाडाळ
फोडणीसाठी: ४ टेस्पून तेल, १/२ टिस्पून मोहोरी, १/२ टिस्पून जिरे, १/२ टिस्पून हिंग, १ टिस्पून हळद, ४-५ कढीपत्त्याची पाने
३-४ हिरव्या मिरच्या
चवीपुरते मीठ
१/२ टिस्पून साखर
१/२ वाटी ओले खोबरे
लिंबाचा रस
कोथिंबीर

कृती:
१) चणा डाळ पाण्यात ३-४ तास भिजवावी. हि चणाडाळ पाणी न घालता भरडसर वाटून घ्यावी.
२) कढईत तेल गरम करावे. हिंग, हळद, मिरचीचे तुकडे, कढीपत्ता घालून फोडणी करावी. वाटलेली चणाडाळ फोडणीस घालावी. चणाडाळ मध्यम आचेवर परतत राहावी. चवीनुसार मिठ, साखर घालावे.
३) चणाडाळीला ३-४ वेळा वाफ काढावी. वाफ काढताना चणाडाळीला पाण्याचा हबका मारावा.
४) चणाडाळ निट शिजली कि थोडे ओलं खोबरं, कोथिंबीर घालावी.
वाढताना लिंबाचा रस घालून ढवळावे.

चकली

Labels:
Chana Dal, Vatali Dal, vatli Chana Dal, Spicy Chana Dal, Instant Chana Dal Recipe, Vatali Dal Recipe.