जाड पोह्यांचा चिवडा - Thick Poha Chivda

Fried Pohe Chiwda in Marathi

वेळ: साधारण १ तास
वाढणी: १० ते १२ प्लेट

साहित्य:
३ कप जाडे पोहे
१/२ कप शेंगदाणे
१/४ कप सुक्या खोबर्‍याचे पातळ काप
१/४ कप काजूचे तुकडे
१/४ कप चणा डाळं
५ ते ६ सुक्या मिरच्या किंवा १ टिस्पून लाल तिखट
५ ते ६ कढीपत्ता पाने
१/२ टिस्पून हळद
३ टिस्पून पिठी साखर
१/४ टिस्पून जिरेपूड
१ ते दिड कप तेल

कृती:
१) कढईत तेल गरम करा. तेलात शेंगदाणे, काजू, सुके खोबरे, कढीपत्ता, आणि चण्याचं डाळं वेगवेगळे तळून घ्या. एका परातीत हे सर्व काढून ठेवा.
२) उरलेल्या तेलात जाडे पोहे तळून घ्या. पोहे चांगले फुलले पाहिजेत पण रंग पांढरा शुभ्रच राहिला पाहिजे.
३) तळलेले पोहे परातीमध्ये काढावे. यामध्ये हळद, तिखट, जिरेपूड, मिठ आणि साखर घालून मिक्स करावे. तळलेले शेंगदाणे, काजू, खोबरे आणि डाळंही मिक्स करावे.
तळलेल्या पोह्याचा चिवडा तयार!

टीप्स:
१) पोहे शेवटीच तळावेत. कारण पोह्यातील बारीक कण जळून तेलाच्या तळाशी राळ बसतो.
२) पोह्यातील बारीक कण तेलात जळतात आणि तळाला बसतात. म्हणून कढईत एक लहान मेटलची चाळणी किंवा मेटलचे गाळणे घेऊन त्यात पोहे ठेवावे आणि हि चाळणी गरम तेलात बुडवून पोहे फुलेस्तोवर तळावे. पोहे फुलले कि लगेच चाळणी वर काढावी. म्हणजे पोहे तेलात सर्वत्र पसरणार नाहीत. तसेच तेलात जळलेले पोह्यातील कण तळाशीच राहतात.
३) चवीनुसार हळद, साखर, जिरेपूड, मिठ आणि लाल तिखट यांचे प्रमाण अड्जस्ट करावे. जर सुक्या लाल मिरच्या वापरणार असाल तर लाल तिखट घालू नये.
४) चण्याचं डाळं म्हणजे भाजकं डाळं जे आपण साध्या चिवड्यात वापरतो.

मलई चॉप - Malai Chops

Malai Chop in English

वेळ: ४५ मिनिट्स
नग: साधारण ६ ते ८ लहान पीसेस


साहित्य:
अडीच कप दूध (2 ‍% reduced Fat)
1 टीस्पून विनेगर
२ टेस्पून पाणी
१ कप साखर
३ कप पाणी
१०० ग्राम खवा
२ टिस्पून साखर
४ टेस्पून दूध/ व्हिपींग क्रिम (टीप १)
लहान चिमूट केशरी रंग (टीप २)
वेलची पूड (टीप १)
३ पिस्त्यांचे पातळ काप सजावटीसाठी

कृती:
पनीर (step by step images)
१) पनीर बनवण्यासाठी पातेल्यात अडीच कप दूध, मध्यम आचेवर गरम करत ठेवावे आणि ढवळत राहावे म्हणजे दूध पातेल्याला चिकटणार नाही. एका वाटीत १ ते दिड टिस्पून विनेगर आणि २ टेस्पून पाणी मिक्स करून ठेवावे. दूध गरम झाले कि हळूहळू विनेगर आणि पाण्याचे मिश्रण घालावे. गॅस मंद आचेवर करून ढवळत राहावे. पनीर आणि पाणी विलग होईल. सुती कपडा चाळणीवर पसरवून ठेवावा. आणि पनीर गाळून घ्यावे आणि त्यावर गार पाणी ओतावे म्हणजे विनेगरचा वास जाईल. कपड्याच्या कडा एकत्र करून पनीर घट्ट पिळून घ्यावे. एका फ्लॅट सरफेसवर किंवा एखाद्या ताटात हे पनीर मळून घ्यावे. त्यातील सर्व बारीक गुठळ्या मोडून एकदम स्मूद असा गोळा बनवावा. रवाळपणा एकदम गेला पाहिजे. याचे एकसारखे ८ गोळे बनवावे दोन बाजूंनी किंचीत दाब द्यावा.
पाक(step by step images)
२) एका पातेल्यात साखर आणि पाणी एकत्र उकळवत ठेवावे. मिश्रण उकळायला लागले कि त्यात पनीरचे गोळे टाकावेत आणि वरून झाकण ठेवून २० ते २२ मिनीटे शिजवावेत. (पातेले पुर्ण न झाकता ९० % झाकावे आणि १० % उघडे ठेवावे.). शिजवून झाले कि गॅस बंद करावा आणि पनीरचे गोळे किमान ३ ते ४ तास पाकात मुरू द्यावेत.
खव्याचे मिश्रण: (step by step images)
३) खवा गुलाबीसर भाजून घ्यावा. गार झाल्यावर बोटांनी चुरडून त्यातील गुठळ्या मोडून घ्याव्यात. त्यात दूध आणि साखर घालून मिक्स करावे. हे मिश्रण निट मळून घ्यावे आणि एकदम स्मूद अशी पेस्ट करावी. रंगासाठी केशरी रंग घालून निट मिक्स करावे. हे मिश्रण झाकून फ्रिजमध्ये ठेवावे.
मलई सॅंडविच (step by step images)
४) पनीरचे मुरलेले गोळे पाकातून बाहेर काढावेत. सुरीने सावकाशपणे हॉरिझॉंटल कापून दोन समान तुकडे करावेत. एका तुकड्यावर खव्याचे मिश्रण पसरवावे. दुसरा तुकडा त्यावर ठेवून अलगद चेपावे. पिस्ता काप घालून सजवावे. (टीप ३)
थोडावेळ थंड करून सर्व्ह करावे.

टीप:
१) मिठाईच्या दुकानात मलई सॅंडविचमधील खव्याच्या मिश्रणात वेलचीपूडऐवजी गुलाबपाणी वापरतात. जर गुलाबपाणी वापरायचे असेल तर ४ टेस्पून दूधाऐवजी ३ टेस्पून दूध घ्यावे आणि १ टेस्पून गुलाबपाणी घ्यावे. मी दुधाऐवजी व्हिपींग क्रिम वापरले होते त्यामुळे दाटपणा येतो.
२) केशरी रंगाऐवजी केशर वापरू शकतो.
३) सजावटीसाठी चांदीचा वर्खही लावू शकतो.

Labels:
Malai Sandwich, Bengali Sweets, Malai sandwich

कडबोळी - Kadboli

Kadboli in English

कडबोळी भाजणीची रेसिपी येत्या गुरूवारच्या पोस्टमध्ये नक्की पाहा!

नग: ३५ ते ४० कडबोळ्या
वेळ: ४० मिनीटे

साहित्य:
सव्वा कप कडबोळीची भाजणी - कडबोळी भाजणीची रेसिपी
सव्वा कप पाणी
१ टिस्पून तिळ
१ टिस्पून ओवा
दिड टिस्पून तिखट
१/४ टिस्पून हिंग
१ टिस्पून मिठ किंवा चवीनुसार
१ टिस्पून तेल
तळण्यासाठी तेल

कृती:
१) सव्वा कप पाणी गरम करण्यास ठेवावे. त्यात तिळ, ओवा, तिखट, हिंग, मिठ, तेल घालून ढवळावे.
२) पाण्याला उकळी आली कि गॅस बंद करून त्यात कडबोळीची भाजणी घालावी. चमच्याने मिकस करावे. वरती झाकण ठेवून ५ ते ८ मिनीटे वाफ मुरू द्यावी.
३) नंतर कोमट पाण्याचा हात घेऊन पिठ मऊसर मळून घ्यावे.
४) पिठाचा एक ते दिड इंचाचा गोळा घेऊन त्याची एकसंध लड वळावी (साधारण रूंदी १ सेमी) आणि लडीच्या एका टोकाभोवती उरलेली लड गोलाकार फिरवून कडबोळी बनवावी.
५) तळणीसाठी तेल गरम करून कडबोळ्या तळून घ्याव्यात (टीप).

टीप:
१) कडबोळ्या तळताना आच मिडीयम आणि हायच्या मधे असावी. कडबोळी तळताना तेलाचे बुडबूडे कमी होवून कडबोळी खाली बसायला लागली कि ती निट तळली गेली आहे हे समजावे. तसेच खुप काळी होईस्तोवर तळू नये चव कडसर लागते.

पाकातल्या पुर्‍या - Pakatlya Purya

Pakatlya Purya in English

वेळ: २५ ते ३० मिनीटे
नग: २५ ते ३० मध्यम पुर्‍या

साहित्य:
१ कप मैदा
१/२ कप बारीक रवा
१ टेस्पून तेल, मोहनासाठी
चिमूटभर मिठ
दही (टीप)
पाक करण्यासाठी:- दिड कप साखर आणि १/२ ते पाऊण कप पाणी
१/२ टिस्पून वेलची पावडर
४ केशराच्या काड्या
तळण्यासाठी तूप (टीप)

कृती:
१) मैदा आणि बारीक रवा एकत्र करून १ टेस्पून गरम तेलाचे मोहन घालावे. चिमूटभर मिठ घालावे. दही घालून घट्ट मळून घ्यावे. १ तास तसेच झाकून ठेवावे.
२) साखर आणि पाणी एकत्र करून २ तारी पाक करावा. केशर थोडे गरम करून किंचीत साखरेबरोबर कुटून पाकात घालावे. वेलची पावडर घालून मिक्स करावे.
३) जेवढी मोठी पुरी हवी असेल त्यायोग्य पुरीसाठी समान आकाराच्या लाट्या बनवाव्यात.
४) तूप गरम करून पुर्‍या तळून घ्याव्यात. पुर्‍या टिश्यु पेपरवर काढाव्यात. २-४ मिनीटांनी पाकात पुर्‍या टाकाव्यात. काही मिनीटे मुरू द्याव्यात. नंतर ताटात पाघळवत ठेवाव्यात.
सजावटीसाठी भरडसर वाटलेला पिस्ता पेरावा. या पुर्‍या पक्वान्नं म्हणून जेवणात वाढता येतात.

टीप:
१) दही वापरताना आंबट दही घ्यावे. तसेच जर दही वापरायचे नसेल तर साध्या पाण्याने पिठ भिजवावे आणि पाकामध्ये लिंबाचा रस घालावा म्हणजे गरजेचा आंबटपणा पुर्‍यांना येतो.
२) तूपाऐवजी तेलात पुर्‍या तळल्या तरी चालतात. पण तुपामुळे पुर्‍यांना खुप छान स्वाद येतो.

गुलाबजाम - Gulabjamun

Gulabjam in English

सर्व चकलीच्या वाचकांना नववर्षाच्या आणि गुढीपाडव्याच्या हार्दिक शुभेच्छा !!

साधारण १५ ते १८ गुलाबजाम
वेळ: साधारण १ ते सव्वा तास

साहित्य:
२५० ग्राम गुलाबजामचा खवा
साखरेचा पाक बनवण्यासाठी
दिड कप साखर
सव्वा कप पाणी
१/२ टिस्पून वेलचीपावडर
इतर साहित्य
तळण्यासाठी तेल किंवा तूप
१ टेस्पून मैदा
गरजेप्रमाणे दुध
चिमूटभर बेकिंग सोडा

कृती:
१) खव्याचा गोळा बारीक किसणीवर किसून घ्यावा. यात मैदा आणि अगदी किंचीत बेकिंग सोडा घालावा. निट मिक्स करावे. किंचीत दुध शिंपडून मळून घ्यावे. लागल्यास अगदी थोडे तूप हाताला लावून मध्यम मळावे. ओल्या कपड्याने हा गोळा झाकून ठेवावा.
२) दिड कप साखर, सव्वा कप पाणी एकत्र करून उकळत ठेवावे. एकतारी पाक करून घ्यावा. वेलचीपूड घालावी. पाक तयार होत असतानाच मळलेल्या गोळ्याचे दिड ते दोन सेमीचे गोळे बनवावे. गोळ्यांना चिर असू नये त्यामुळे तेलात टाकल्यावर गुलाबजाम फुटतात.
३) तेल व्यवस्थित गरम करून आच मध्यम (मिडीयम लो) करावी. तेलाचे तापमान तपासण्यासाठी प्रथम एक गोळा टाकावा. जर गोळा लगेच वर तरंगला तर तेल जास्त तापले आहे असे समजावे. आधी गोळा तळाला जाऊन काही सेकंदांनी तेलावर तरंगला पाहिजे. म्हणजे तेलाचे तापमान बरोबर आहे असे समजावे. मग आता जास्त गोळे तळणास सोडावेत. हे तरंगलेले गोळे अलगदपणे झार्‍याने गोलगोल हलवावे म्हणजे सर्व बाजूंनी एकसारखा रंग येईल. तसेच तळताना गुलाबजामवर तेल उडवावे म्हणजे निट तळले जातील. लालसर रंग आला कि तळलेले गोळे तेलातून बाहेर काढावे. व गुलाबजामची दुसरी बॅच तळून होईस्तोवर वार्‍यावर ठेवावी.
४) वरील पद्धतीनेच गुलाबजामची दुसरी बॅच तळण्यास सोडावी. गुलाबजाम तळावेत, बाहेर काढावेत आणि तळलेली पहिली बॅच गरम पाकात सोडावी. पाक एकदम उकळता गरम असू नये तसेच कोमटही नसावा.
गुलाबजाम पाकात किमान ५ ते ६ तास मुरवावे. शक्यतो आदल्या रात्री करून मुरवल्यास व्यवस्थित मुरतात.

टीप:
१) काही जणांना गुलाबजामला गुलाबाचा सुगंध आवडतो त्यासाठी पाकात १ ते २ थेंब रोज इसेंस घालावा.
२) जरा वेगळ्या पद्धतीने गुलाबजाम करायचे असतील तर खव्याचा गोळा वळताना लहान आकाराचे ड्रायफ्रुटचे तुकडे (काजू तुकडा, पिस्ता), खडीसाखरेचा चौकोन किंवा वेलचीचा दाणा असे गोळ्याच्या मध्यभागी घुसवून निट गोळा वळावा आणि तळावे.
३) मैद्याऐवजी आरारूट पावडर किंवा कॉर्न फ्लोर वापरले तरी चालते.
४) गुलाबजाम तळताना तेलाचे तापमान फार महत्त्वाचे असते. जास्त गरम तेल असेल तर गुलाबजामला लगेच लालसर रंग येतो पण आतून कच्चाच राहतो. आणि पाकात टाकल्यावर न शिजलेल्या भागात पाक मुरत नाही. त्यामुळे सुरूवातीला एकदोन गुलाबजाम टाकून तापमान अड्जस्ट करून घ्यावे.
५) गुलाबजामसाठीचा पाक खुप घट्ट करू नये त्यामुळे पाक गुलाबजाममध्ये निट मुरत नाही.
६) गुलाबजामसाठी वेगळा रवाळ असा खवा मिळतो तो वापरावा.

Labels:
Gulabjamun, Gulabjam, gulabjam from khoya

कणकेच्या चकल्या - Kankechya Chaklya

Wheat Flour Chakli in English

साधारण १५ मध्यम चकल्या
वेळ: ४० मिनीटे

साहित्य:
१ कप गव्हाचे पिठ
१ टेस्पून दही
१/२ टिस्पून ओवा
१/२ टिस्पून तिळ
१ टिस्पून जिरेपूड
१ टिस्पून धणेपूड
१ ते दिड टिस्पून लाल तिखट
चवीनुसार मिठ
पिठ भिजवायला पाणी
तळायला तेल
जाड कापड (साधारण १ फुट)
बारीक भोकांची किसणी

कृती:
१) जाड कापडात गव्हाचे पिठ घट्ट बांधून घ्यावे. प्रेशर कूकरमध्ये तळाला २ ते ३ भांडी पाणी घालावे. लोखंडी तिपाई किंवा कूकरमधील भांडे ठेवून त्यावर एक स्टीलची चाळणी ठेवावी. त्यात गव्हाचे पिठ बांधलेली कापडाची पुरचूंडी ठेवावी. २ ते ३ शिट्ट्या कराव्यात आणि गॅस बंद करावा.
२) प्रेशर कूकर गार झाल्यावर त्यातील पुरचूंडी उघडून त्यात तयार झालेला पिठाचा घट्ट गोळा काढून घ्यावा. बारीक किसणीवर किसून घ्यावा. जर छोट्या गुठळ्या राहिल्या असतील तर हाताने फोडून घ्याव्यात किंवा बारीक चाळणीने चाळून जाडसर गोळे फोडून घ्यावेत. पिठ एकदम बारीक असावे.
३) या पिठात दही, ओवा, तिळ, जिरेपूड, धणेपूड, लाल तिखट आणि मिठ घालावे. पाणी घालून घट्टसर मळून घ्यावे.
४) चकलीच्या सोर्‍याला आतून तेलाचा हात लावावा. आणि १ चकली पाडून बघावी. जर चकली तुटत असेल तर अगदी थोडे पाणी घालून पिठ मळून घ्यावे.
५) तेल गरम करून मिडीयम-हाय गॅसवर चकल्या तळून घ्याव्यात. थोडावेळ जाळीवर गार होण्यासाठी ठेवाव्यात आणि मग लगेच हवाबंद डब्यात भरून ठेवाव्यात.

Labels:
Wheat flour chakli, kankechya chaklya

बेक्ड करंजी - Baked Karanji

Dryfruit Karanji (baked) in English

३० ते ३५ लहान करंज्या
वेळ: ५० मिनीटे (सारण तयार असल्यास)

संबंधित पाककृती:-
ओल्या नारळाच्या करंज्या **** दिवाळी फराळ **** मेथी शंकरपाळे **** मटार बटाटा करंजी

साहित्य:
२ कप मैदा
३ टेस्पून तूप, पातळ
चिमूटभर मिठ
ड्रायफ्रुटचे सारण
दुध, पिठ भिजवण्यापुरते

स्टेप बाय स्टेप फोटोनुसार प्रेझेंटेशनसाठी इथे क्लिक करा.

कृती:
१) मैदयात तूप आणि मिठ घालून तूप सर्व मैद्याला चोळून घ्यावे. दुध घालून मध्यमसर कणिक मळून घ्यावी. १५ मिनीटे झाकून ठेवावी.
२) कणिक २५ ते ३० समान छोटे गोळे करून घ्यावे. गोळा साधारण १ इंचाचा तरी असावा.
३) गोळा लाटून गोल पुरी करावी. मध्यभागी १ टेस्पून ड्रायफ्रुटचे सारण घालावे. अर्ध्या गोलाच्या कडेवर थोडे पाणी लावावे. दुसरी बाजू दुमडून पाणी लावलेल्या कडेवर आणावी. कडा चिकटवून घ्याव्यात. काटा-चमच्यातील काट्याने कडेवर डिझाईन बनवावे आणि कातणाने १/२ सेमी जागा सोडून कड कापावी. कापलेली पट्टी पुन्हा कणकेत मिक्स करावी किंवा ३ ते ४ करंज्या केल्यावर त्यांच्या पट्ट्या एकत्र करून नवी करंजी बनवावी.
४) सर्व करंज्या बनवून घ्याव्यात. सर्व बाजूनी तूपाचा हलकासा हात फिरवावा. बेकिंग ट्रेमध्ये अल्युमिनम फॉईल पसरवून त्यावर करंज्या अरेंज कराव्यात.
५) ओव्हन २७५ F वर प्रिहीट करावे. ओव्हन प्रिहीट झाल्या कि ४० ते ४५ मिनीटे बेक करावे.
खुप जास्तवेळ बेक करू नये. यामुळे छान ब्राऊन रंग येईल, पण आत भरलेले सारण जळेल.

टीप:
१) या जरी बेक केलेल्या करंज्या असल्या तरी पूर्ण डाएट करंज्या नाहीत, कारण पिठात आपण थोडे तूप घातले आहे. जर तूप घातले नाही तर करंज्या खुपच ड्राय होतात. आणि पटकन जळतात. म्हणून यामध्ये जे तळतानाचे तेल करंजीत शोषले जाते ते अवॉइड होते.

Labels:
Baked Karanji, Baked Gujiya, Diwali Recipes, Diwali Faral

ड्रायफ्रुट करंजीचे सारण

Dry Fruit Karanji Stuffing in English

वेळ: साधारण ५० मिनीटे
यिल्ड: साधारण २ कप
साहित्य:
३/४ कप बारीक रवा
१/२ कप खवा, भाजलेला (रिकोटा चिजपासून खवा)
१/२ टिस्पून वेलची पूड
५ टेस्पून पिठीसाखर किंवा चवीनुसार
३ टिस्पून तूप
अर्धा ते पाऊण कप ड्राय फ्रुट्स, मी पुढीलप्रमाणे वापरली:
२ टेस्पून चारोळी
७ ते ८ काजू, बारीक तुकडे
७ ते ८ बदाम, पातळ चकत्या
६ ते ७ खजूर, बिया काढून बारीक चिरून घ्यावे
५ ते ६ खारका, बिया काढून बारीक चिरून घ्यावे.
१/४ कप किसलेले सुकं खोबरं, भाजून
२ टिस्पून खसखस, हलकीशी भाजून

कृती:
१) पॅनमध्ये २ टिस्पून तूप गरम करून त्यात चारोळी, काजूचे तुकडे, बदाम स्लाईसेस, चिरलेली खारीक घालून ५ ते ८ मिनीटे मध्यम आचेवर परतावेत. खजूर आधीच घालू नये. गॅसवरून पॅन बाजूला करायच्या आधी २ मिनीटे खजूर घालून परतावे. नंतर एका परातीत काढून ठेवावे.
२) त्याच पॅनमध्ये १ टिस्पून तूप गरम करून त्यात रवा गुलाबीसर रंगावर भाजावा. भाजताना आच मंद किंवा मध्यम असावी. बारीक रवा खुप मोठ्या आचेवर भाजल्यास करपू शकतो. तसेच पटकन ब्राऊन झाला तरी तो निट भाजला गेलेला नसतो. कचवट राहातो.
३) आता भाजलेला रवा, भाजलेला खवा, भाजलेली ड्राय फ्रुट्स, भाजलेली खसखस आणि वेलचीपूड घालून निट मिक्स करावे. खासकरून खवा निट मिक्स करावा कारण त्याच्या गुठळ्या होण्याची शक्यता असते. शेवटी चवीनुसार साखर घालून मिक्स करावे. (टीप १)

टीप:
१) साखर नको असेल तर गोडपणासाठी साखरेऐवजी खजूराचे प्रमाण वाढवावे.
२) घरातील उपलब्धतेनुसार तसेच आवडीनुसार कोणताही सुकामेवा वापरू शकतो जसे पिस्ता, अक्रोड, बेदाणे ईत्यादी.
३) या सारणापासून ड्रायफ्रुट करंजी किंवा ड्रायफ्रुट मोदक बनवू शकतो.

मूगडाळ हलवा - Moong dal halwa

Moong Dal Halwa in English

वेळ: साधारण १ ते दिड तास
२ ते ३ जणांसाठी

साहित्य:
३/४ कप पिवळी मूग डाळ
१/२ कप दूध, गरम
साधारण ३/४ ते १ कप पाणी (टीप ३)
१/४ ते १/२ कप खवा, भाजलेला
४ टेस्पून साजूक तूप
१/२ ते ३/४ कप साखर
१/२ टिस्पून वेलचीपूड
२ ते ३ बदाम

मूगडाळ हलव्याच्या स्टेप्सचे काही फोटो

कृती:
१) मूगडाळ मध्यम आचेवर साधारण गुलाबी-लालसर परतावे. साधारण ३० ते ३५ मिनीटे सतत ढवळावे. डाळ जळू देऊ नये किंवा खुप डार्क भाजू नये. तसेच एकसारखी भाजली गेली पाहिजे. मूगडाळ जरा कोमट झाली कि मिक्सरमध्ये बारीक पावडर करून घ्यावी. अगदी किंचीत भरड राहू द्यावी.
२) कढईत तूप गरम करून त्यात मूगडाळ पावडर घालून मध्यम आचेवर छान केशरी रंग येईस्तोवर भाजून घ्यावी. साधारण १० मिनीटे. नंतर १/२ कप गरम दुध थोडे थोडे घालून वाफ काढावी. बदामाचे काप घालावे. गॅस मंद करावा सर्व दुध घालावे आणि अगदी मंद आचेवर वाफ काढावी. मधेमधे ढवळावे, तळाला डाळ चिकटू देवू नये. नंतर गरम पाण्याचा हबका मारून ढवळत राहावे. डाळ पूर्ण शिजेस्तोवर मंद आचेवर वाफ काढावी.
३) डाळीचा रवा निट शिजला आणि थोडा फुलून आला कि त्यात १/२ साखर घालावी आणि खवा घालावा, वेलचीपूड घालावी. ढवळून अजून थोडावेळ वाफ काढावी. खवा निट मिक्स झाला पाहिजे, गुठळ्या राहू देवू नये.
गरमागरम मूगडाळीचा हलवा वरती बदामाचे काप घालून सर्व्ह करावा.

टीप:
१) शेवटी आपण पाण्याचा हबका देतो त्याऐवजी दुध आणि पाण्याचे मिश्रणही वापरू शकतो.
२) वाफ व्यवस्थित काढावी, घाई करू नये. एकदा साखर घातली कि काहीच करता येत नाही, म्हणून साखर घालायच्या आधी डाळ शिजली आहे कि नाही ते तपासावे.
३) जोवर डाळ शिजत नाही तोवर थोडे थोडे पाणी किंवा दूध + पाणी घालून ढवळत राहावे. यासाठी नक्की प्रमाण नाही, गरजेनुसार अंदाजाने घालत राहावे.

मेथी शंकरपाळे - methi shankarpale

methi Shankarpale in English

साधारण २ ते ३ जणांसाठी
वेळ: ३० मिनीटे

साहित्य:
३/४ कप गव्हाचे पिठ
१/४ कप मैदा
१ टेस्पून तेल
२ टिस्पून कसूरी मेथी
२ चिमटी ओवा
चवीपुरते मिठ
तळण्यासाठी तेल

कृती:
१) मैदा, गव्हाचे पिठ आणि मिठ एकत्र करून घ्यावे. त्यात १ टेस्पून गरम तेलाचे मोहन घालावे. चमच्याने ढवळावे.
२) कसूरी मेथी हाताने चुरडून पावडर बनवावी आणि पिठात घालावी. तसेच ओवा घालून मिक्स करावे. पाण्याने घट्ट भिजवून १५ मिनीटे झाकून ठेवावे.
३) १५ मिनीटांनी मळलेल्या पिठाचे २ समान भाग करावे. १ पिठाचा गोळा एकदम पातळ लाटावा आणि सुकू नये म्हणून त्यावरझाकण ठेवून झाकावा. नंतर दसर्‍या पिठाची पोळी लाटावी. त्याच्या वरील बाजूस तेल लावावे आणि झाकलेली पोळी त्यावर ठेवावी. वरून थोडे दाबून एकदा लाटून घ्यावी. खुप जोरात लाटू नये दोन्ही पोळ्या एकमेकांना चिकटाव्यात म्हणून लाटावे.
४) कातणाने शंकरपाळाच्या आकारात कापून तेलात मध्यम आचेवर तळून घ्यावेत. एकदम सर्व न तळता ३-४ विभागात तळावेत. मोठ्या आचेवर तळले तर वरून ब्राऊन होतात पण लगेच मऊ पडतात. म्हणून मंद किंवा मध्यम आचेवर कडक होईस्तोवर तळावेत.
चहाबरोबर हे कुरकूरीत शंकरपाळे मस्तच लागतात.

Label:
crunchy snacks, shankarpale, shankarpare

खव्याच्या पोळ्या

khavyachi Poli in English

वाढणी: १२ ते १५ मध्यम (५ इंच)


साहित्य:
सारण::::
१ कप खवा (रिकोटा चिजपासून खवा कसा बनवावा?)
१/२ ते ३/४ कप पिठीसाखर
२ टिस्पून तूप
६ टेस्पून बेसन (१/४ कप + २ टेस्पून)
१ टिस्पून वेलचीपूड
पोळी::::
३/४ कप मैदा
१/४ कप + २ टेस्पून गव्हाची कणिक
३ टेस्पून तेल
१/४ टिस्पून मिठ
१/२ कप मैदा पोळी लाटण्यासाठी

कृती:
१) पोळीसाठी आधी मैदा आणि कणकेचे पिठ भिजवून घ्यावे. मैदा आणि कणिक मिक्स करून घ्यावी, मिठ घालावे. ३ टेस्पून तेल कडकडीत गरम करून पिठात घालावे. थोडे पाणी घालून पिठ घट्टसर मळून घ्यावे. खव्याचे मिश्रण तयार होईस्तोवर पिठ झाकून ठेवावे.
२) खवा गुलाबीसर भाजून घ्यावा आणि एका भांड्यात काढून ठेवावा. खव्यात गाठी असतील फोडून घ्याव्यात. २ टेस्पून तूप गरम करून त्यात बेसन मध्यम आचेवर खमंग भाजून घ्यावे आणि एका वाडग्यात काढून ठेवावे. कोमटसर झाल्यावर खवा, बेसन, साखर आणी वेलचीपूड एकत्र करून मळून घ्यावे. हे मिश्रण जर खुप चिकट वाटले तर थोडे तूप हातावर घेऊन मळावे. मिश्रणात गुठळ्या नसाव्यात.
३) पोळ्या करायच्या आधी मैदा-कणकेचे मळलेले पिठ परत एकदा मळून घ्यावे. पोळी करायला खव्याच्या मिश्रणाची दिड ते २ इंचाचे गोळी करावी. आणि मैद्याच्या दोन गोळ्या कराव्यात, त्या खवा मिश्रणाच्या निमपट आकाराच्या असाव्यात. मैद्याच्या दोन लाट्या लाटून खव्याचे मिश्रण मधे भरावे. आणि कडा सिल करून हलक्या हाताने पोळी लाटावी. लाटताना थोडा सुका मैदा घ्यावा.
४) तवा गरम करावा त्यावर लाटलेली पोळी थोड्या तूपावर खरपूस भाजून घ्यावी. आच मध्यम ठेवावी, मोठ्या आचेवर भाजू नये त्यामुळे कव्हर कच्चे राहू शकते.

Labels:
Khoya Roti, Khava Poli, खव्याच्या पोळ्या

श्रिखंड using sour cream

Instant Shrikhand from Sour Cream recipe in English


साहित्य:
१ कप Sour Cream
१/२ कप साखर
चिमूटभर केशर
१ टेस्पून दूध
३ टेस्पून दही
१/२ टिस्पून वेलचीपूड
बदाम पिस्त्याचे काप

कृती:
१) दूध कोमट करून घ्यावे. त्यात केशर घालून मिक्स करावे. केशराचा रंग दूधात उतरू द्यावे. Sour Cream मध्ये साखर घालून साखर ढवळावे. दही फेटून Sour cream मध्ये घालावे. फ्लेवर येण्यासाठी वेलचीपूड आणि रंगासाठी केशर घातलेले दूध घालून ढवळावे.
२) निट मिक्स करून डब्यात भरून दोन ते तीन तास फ्रिजमध्ये ठेवावे. जेवणात वाढताना फिजमधून काढावे.

पुर्‍यांच्या रेसिपीसाठी इथे क्लिक करा

टीप:
१) Sour Cream उष्णतेमुळे लगेच पातळ होते. त्यामुळे श्रिखंड फ्रिजमध्येच ठेवावे.

घरगुती चक्क्यापासून श्रिखंड
दह्यापासून चक्का

Labels:
Instant Shrikhand, Shrikhand Puri

शाही टुकडा - Shahi Tukda

Shahi Tukda (English Version)



साहित्य:
३ ब्रेडचे स्लाईस
३ कप दूध (होल मिल्क)
१/२ कप कंडेन्स मिल्क (sweetened)
२ टेस्पून साखर
१ टेस्पून पिस्त्याचे काप (अनसॉल्टेड आणि रोस्टेड)
१ टिस्पून वेलचीपूड
चिमूटभर केशर
तळण्यासाठी तूप

कृती:
१) दूध मध्यम आचेवर उकळत ठेवावे. आटवून दिड ते पाऊणेदोन कप करावे. कंडेन्स मिल्क घालून ५ मिनीटे उकळवावे. २ टेस्पून साखर घालावी. गरजेनुसार साखर कमी किंवा जास्त करावी. यात वेलचीपूड आणि केशर घालावे. पिस्त्याचे काप घालावेत, थोडे सजावटीसाठी ठेवावेत.
२) ब्रेड स्लाईसच्या कडा काढून टाकाव्यात. ब्रेडचे त्रिकोणी किंवा आवडत्या आकारात तुकडे करावे. तुपात तळून किंवा मंद आचेवर शालो फ्राय करून घ्यावेत. ब्रेडचे स्लाईस कुरकूरीत आणि बाहेरून थोडे ब्राउन करून घ्यावेत.
३) सर्व्हींग प्लेटमध्ये तळलेले ब्रेडचे स्लाईस ठेवावेत त्यावर आटवलेले दूध घालून आणि फ्रिजमध्ये थंड करत ठेवावेत. थंड झाल्यावर दुध छान घट्ट होते. वरून पिस्त्याचे काप घालून सजवावे.

टीप:
१) ब्रेडचे स्लाईस तेलात शालोफ्राय केलेले चालतात. तळून झाल्यावर यातील सर्व अधिकचे तेल निघून गेल पाहिजे नाहीतर खाताना तेलाची चव लागते. त्यासाठी तळल्यावर ब्रेडचे स्लाईस काहीवेळ पेपर टॉवेलवर वर काढून ठेवावेत.

Labels:
Shahi Tukada, recipe for Shahi Tukda, Indian Shahi Tukda, Indian Sweets recipe, Dessert

शंकरपाळे - Shankarpale

Shankarpale (English Version)


साहित्य:
१/४ कप दूध
१/४ कप तूप
१/४ कप साखर
साधारण दिड कप मैदा

कृती:
१) दूध, तूप आणि साखर एकत्र करून साखर वितळेपर्यंत गॅसवर गरम करावे. हे मिश्रण थंड करून घ्यावे.
२) मिश्रण थंड झाल्यावर त्यात मैदा घालून मळावे. भिजवलेला मैदा एकदम घट्ट किंवा एकदम सैल मळू नये. मध्यमसर मळावे. मळलेले पिठ २० मिनीटे झाकून ठेवावे.
३) २० मिनीटांनंतर पिठ परत एकदा मळून घ्यावे. २ इंचाचा एक गोळा करून थोडा मैदा भुरभुरवून लाटावे. कातणाने त्याचे शंकरपाळे पाडावेत. आणि तूपात किंवा तेलात सोनेरी रंगावर तळून काढावेत.

Labels:
Shankarpale, shakarpari, Diwali Faral, Maharashtrian Diwali Faral, shakarpali

चिरोटे - Chirota

Chirote (English Version)

चिरोटे बर्याच प्रकारे बनवले जातात काही जण पाकातले करतात, काहीजण मैद्याचे करतात.
आमच्या घरी ज्या पद्धतीत चिरोटे बनवतात त्याची ही कृती..

वाढणी : साधारण १६ ते १७ चिरोटे

साहित्य:
१ कप मैदा
१/८ कप पातळ केलेले साजूक तूप
१/४ कप दूध
वरून पेरायला पिठी साखर
पेस्ट बनवण्यासाठी ४ चमचे साजूक तूप + ३-४ चमचे तांदूळ पिठ

कृती:
१) मैदा एका भांड्यात घ्यावा त्याला गरम गरम तूपाचे मोहन घालावे. तूप कडक तापवावे, जर मोहनासाठी तूप कमी गरम असेल तर चिरोटे नरम पडतात. दूध घालून मैदा घट्ट भिजवावा. थोडा वेळ झाकून ठेवावे.
२) भिजवलेला मैदा ६ भागात विभागून घ्यावा. त्याचे मध्यम गोळे करून घ्यावे. त्याच्या एकदम पातळ पोळ्या लाटून घ्याव्यात. जितक्या पातळ पोळया तितके चिरोटे हलके होतील आणि चिरोट्यांना छान पदर सुटतील.
३) एक लाटलेली पोळी घ्यावी. त्या पोळीवर पातळ केलेले साजूक तूप आणि तांदूळ पिठ याची दाटसर पेस्ट लावावी. त्यावर दुसरी पोळी ठेवावी परत त्यावर तूप आणि तांदूळ पिठाची पेस्ट लावावी. त्यावर तिसरी पोळी ठेवून परत पेस्ट लावावी.


४) नंतर दोन बाजूंनी गुंडाळी करत मध्यापर्यंत यावे. एका बाजूची गुंडाळी दुसर्या गुंडाळीवर ठेवून थोडे चेपावे. आणि हि तयार गुंडाळी त्यातील तूप सुकेस्तोवर ठेवून द्यावी. अशाच प्रकारे उरलेल्या ३ पोळ्यांची गुंडाळी बनवून घ्यावी.


५) या गुंडाळ्यांचे १ इंचाचे तुकडे करून घ्यावे.

६) हे चिरोटे दोन आकारात बनवता येतात.
पहिली पद्धत म्हणजे प्रत्येक तुकडा वरील बाजूने हाताने हलका चेपून त्यावर एकदा उभे आणि एकदा आडवे असे लाटणे फिरवावे.


दुसरी पद्धत म्हणजे गुंडाळीचे तुकडे वरील बाजूने न लाटता जिथून कापले आहे त्या बाजूला हलके दाबून एकदा उभे आणि आडवे असे लाटणे फिरवावे. या चिरोट्यांचा आकार गोल येतो. आणि दिसायलाही आकर्षक दिसतात. पण यामध्ये आत लावलेली तूप आणि तांदूळपिठाची पेस्ट तळताना बाहेर पडते आणि तूप वाया जाते.
७) तळण्यासाठी तेल तापत ठेवावे. तेल गरम झाले कि आच मध्यम करावी. आणि चिरोटे गोल्डन ब्राउन तळून काढावे. पेपरवर काढून लगेच त्यावर २-३ चिमटी पिठीसाखर पेरावी.

टीप:
१)वरील प्रमाणानुसार आपण पिठाच्या एकूण दोन गुंडाळ्या बनवल्या आहेत. तूप आणि तांदूळपिठाची पेस्ट हि प्रत्येक गुंडाळीसाठी वेगवेगळी तयार करावी. कारण तूप घट्ट झाले तर हि पेस्ट पोळीवर पसरवता येत नाही. आणि एकदा तांदूळपिठ घातले कि ते तूप गरमही करता येत नाही.

Labels:
Maharashtrian sweets, Traditional Maharashtrian sweets, chirote recipe, chirota recipe, recipe for chirota, Indian sweets recipe

पाकातले बेसन लाडू - Besan Ladu

Besan Ladu (English Version)



बेसनाचे लाडू पाक न करता हि बनवता येतात. बिन पाकाच्या बेसन लाडूच्या कृती साठी या लिंकवर क्लिक करा
बिन पाकाचे बेसन लाडू (Easy Besan Ladoo Recipe in English)

साहित्य:
१ वाटी बेसन
१/२ वाटी साजूक तूप
पाऊण वाटी साखर
अर्धी वाटी पाणी
वेलची पूड
बेदाणे

कृती:
१) तूप पातेल्यात गरम करावे त्यात बेसन घालून मध्यम आचेवर खमंग भाजावे. बेसन गॅसवरून उतरवावे.
२) पाणी आणि साखर एकत्र गरम करत ठेवावे व त्याचा एकतारी पाक करावा.
३) तयार झालेला पाक गरम असतानाच भाजलेल्या बेसनात घालून ढवळावे. ढवळताना बेसनाची गोळी होण्याची शक्यता असते. त्याची काळजी घ्यावी.
४) हळूहळू पाक बेसनात मुरतो. मध्येमध्ये मिश्रण ढवळत राहावे. मिश्रणात वेलची पूड घालावी.मिश्रण थोडे घट्टसर झाले कि लाडू वळावेत. लाडू वळताना त्यावर एक एक बेदाणा लावावा.

टीप :
१) वरील कृतीमध्ये तूप बेताचेच घातले असल्याने मिश्रण पटकन आळते त्यामुळे मिश्रणावर लक्ष ठेवावे. मिश्रण जास्त आळले तर लाडू वळता येत नाहीत.

Labels:
Besan Recipes, besan laddu recipe, chickpea flour recipe, Indian sweets recipe, Indian sweet

रव्याचे लाडू - Rava Ladu

Rava Ladu in English

१५ मध्यम लाडू

साहित्य:
२ वाट्या बारीक रवा
१ वाटी पाणी
दिड वाटी साखर
१/२ वाटी साजूक तूप
१ लहान चमचा वेलची पूड

कृती:
१) प्रथम रवा मध्यम आचेवर तूपावर भाजून घ्यावा. खमंग वास आला कि गॅसवरून उतरवावा.
२) पातेल्यात साखर आणि पाणी एकत्र करून एकतारी पाक करून घ्यावा. (किंवा साखरेचा पाक पारदर्शक झाला कि एक उकळी काढून लगेच उतरवावा.) भाजलेल्या रव्यात पाक ओतावा. गुठळ्या न होता मिक्स करावे. त्यात वेलची पूड घालावी.
३) हे रव्याचे आणि साखरेचे मिश्रण झाकून ठेवावे. काही तासांनी मिश्रण आळते. मग लाडू वळावेत.

टीप:
१) जर लाडवाचे मिश्रण फळफळीत झाले तर अर्धी वाटी पाणी लहान पातेल्यात उकळावे. त्यात २-३ चमचे साखर घालावी. पाक बनवून तो मिश्रणात घालावा. मिक्स करावे. थोड्या वेळाने लाडू वळावेत.
२) रव्याच्या लाडवांसाठी शक्यतो बारीक रवा घ्यावा.

Labels:
Semolina Laddu Recipe, Indian Laddu Recipe, Indian Sweets recipe, Mithai recipe

बाकरवडी - Bakarwadi

Bakarwadi in English

साहित्य:
२ कप मैदा
२-३ मोठे चमचे बेसन (चणा पीठ)
चवीपुरते मीठ
१ ते दिड चमचा तेल
१ छोटा चमचा ओवा
सारणासाठी:
१ मोठा चमचा बेसन
१ छोटा चमचा तीळ आणि खसखस
१ छोटा चमचा आले किसून
१ ते दिड चमचा लसूण पेस्ट
३ चमचे लाल तिखट
१ ते दिड चमचा पिठी साखर
१ छोटा चमचा गरम मसाला
१ चमचा धणे पूड
१ छोटा चमचा बडिशेप
१ चमचा किसलेले खोबरे (सुके खोबरे)
३-४ मोठे चमचे बारीक शेव
मीठ


कृती
मैद्याची पोळी:
मैदा आणि बेसन एकत्र करून त्यात मीठ आणि ओवा घालावा.तेल गरम करून पीठात घालावे. आणि पाणी घालून घट्ट मळून घ्यावे. आणि झाकून १५-२० मिनिटे बाजूला ठेवावे.
सारण:
१) सर्व प्रथम तीळ आणि खसखस तव्यावर थोडी भाजून घ्यावी.
२) सारणासाठी दिलेले सर्व पदार्थ एकत्र करून १ चमचा तेलावर थोडे परतून घ्यावे.
बाकरवडी:
१) सारण तयार झाल्यावर भिजवलेल्या मैद्याची एक पातळ पोळी करून १-२ चमचे सारण त्यावर समान पसरावे.आणि घट्ट रोल करावा.. (जर रोल घट्ट नाही झाला तर त्यातील सारण बाहेर येते.)
२) सुरीने १ इंच आकाराचे तुकडे करावे.
३) गरम तेलामध्ये गोल्डन ब्राउन तळून घ्यावेत.
४) बाकरवडया थंड झाल्यावर हवाबंद डब्यात ठेवाव्यात.

बाकरवडीची रेसिपी मनोगत २००७ दिवाळी अंकात छापून आली होती.

नारळाच्या वड्या - Naralipak

नारळाच्या वड्या

वाढणी : २० ते २५ वड्या



साहित्य:
१ नारळ
३५० ग्रॅम साखर
तूप
वेलची पूड

कृती :
१) एक नारळ खवून घ्यावा. नारळ खवताना त्यातील काळपट भाग घेऊ नये.
२) नंतर कढईमध्ये दोन ते तीन चमचे तूप घ्यावे. तूप गरम झाल्यावर त्यात खवलेला नारळ घालावा.
३) मंद आचेवर थोडासा परतून घ्यावा.
४) २-३ मिनिटानंतर साखर घालून परतावे. हळूहळू साखर वितळू लागेल. मंद आचेवर ढवळत राहावे.
५) छोटा अर्धा चमचा वेलचीच पूड घालावी. हळूहळू मिश्रण घट्ट होऊ लागते.
६) एका परातीला तूप लावून घ्यावे आणि मिश्रण त्यात ओतावे. एका वाटीच्या तळाला तूप लावावे आणि मिश्रण पूर्ण परातीत समान पसरावे. अर्ध्या इंचाचा थर करावा.
७) मिश्रण गरम असतानाच सुरीने हलक्या हाताने वड्या पाडाव्यात. नाहीतर मिश्रण थंड झाल्यावर वड्या नीट पडत नाहीत.
८) मिश्रण थंड झाले की वड्या वेगवेगळ्या कराव्यात.

टिप:
१) वड्यांना केशरी रंग हवा असल्यास थोडे केशर किंवा खायचा केशरी रंग घालू शकतो.
२) जर आंब्याचा रस उपलब्ध असेल तर साखर घालताना थोडी साखर कमी करून थोडा आंबा रस घालावा. नारळ आणि आंबा एकत्र स्वाद अप्रतिम लागतो.

नारळाच्या वड्यांची रेसिपी मनोगत दिवाळी अंक २००७ मध्ये छापून आली होती.

चिवडा - Chivda

चिवडा (English Version)




साहित्य:
८ कप पातळ पोहे
दिड ते २ कप कुरमूरे
३/४ ते १ कप शेंगदाणे
१०-१२ काजू बी
१०-१२ हिरव्या मिरच्या
१०-१२ कढीपत्ता पाने
१/२ कप तेल
१/२ टिस्पून हिंग, १ टिस्पून हळद, १/२ टिस्पून मोहोरी, १/२ टिस्पून जीरे
चवीनुसार मीठ, साखर

कृती :
१) चिवडा जास्त कुरकूरीत राहण्यासाठी मोठ्या जाड बुडाच्या पातेल्यात पोहे कमी आचेवर कोरडेच भाजून घ्यावे. भाजताना तळापासून सारखे हलवत राहावे. पोह्यांचा रंग बदलू देवू नये. साधारण ७ ते ८ मिनीटे भाजावे. तसेच कुरमूरे २-३ मिनीटे भाजावेत. भाजताना सारखे ढवळत राहावे नाहीतर कुरमूरे जळतात.
२) पातेल्यात तेल गरम करावे. सर्वात आधी शेंगदाणे, काजू थोडे तळून घ्यावेत. शेंगदाणे आणि काजू ब्राऊन रंगाचे झाले कि एका वाडग्यात काढून ठेवावेत.
३) त्याच तेलात मोहोरी, जीरे, हिंग, हळद, मिरची आणि कढीपत्ता घालून फोडणी करावी. तळलेले शेंगदाणे, काजू घालून लगेच पोहे आणि कुरमुरे घालावे आणि सर्व पोह्यांना तेल लागेल असे मिक्स करावे. हे करताना गॅस बारीक ठेवावा. नाहीतर तळाला पोहे जळू शकतात.
४) गॅस बंद करून चवीनुसार मीठ आणि चमचाभर साखर घालावी. आणि व्यवस्थित ढवळून घ्यावे.

टीप:
१) चिवड्यात मनुका, सुक्या खोबऱ्याचे पातळ काप, डाळं घालायचे असेल तर शेंगदाण्यांबरोबर ते तळून घ्यावे.
२) फोडणी करताना लसणीच्या पाकळ्या कापून घातल्यास चिवड्याला लसणीचा छान स्वाद येतो.
३) चिवड्याला थोडा आंबटपणा हवा असल्यास, चिवडा गरम असताना १ टिस्पून आमचूर पावडर घालून मिक्स करावे.

Labels:
Chiwada, Chivada, Marathi Chivda

चिवड्याची रेसिपी मनोगत २००७ दिवाळी अंकात छापून आली होती.